Лебийлиле 16
16
Тазалау Кюн этилген къурманла
1Харунну эки уланы, Раббийни аллына келишмеген от келтирип, ёлгенден сора, Раббий Муссагъа сёлешгенди. 2Раббий Муссагъа былай айтханды:
– Къарындашынг Харуннга айт, ол ёлмез ючюн, жабыуну артындагъы Эм Сыйлы Жерге, Кюбюрню юсюндеги Мархамат Жерни#16:2 «Мархамат Жер» деп кёчюрюлген, «каппорет» деген чюйют сёз Аллахны ачыуу жумушатылгъан, халкъыны гюняхлары кечилген, ала Аллах бла жарашдырылгъан энчи жерни ангылатады. аллына кеси сюйген заманда кирмесин. Мархамат Жерни юсюнде Мен булут ичинден кёрюнюрюкме.
3Харун Эм Сыйлы Жерге гюнях ючюн къурманнга бугъа, толусунлай кюйдюрюлген къурманнга да къочхар келтирсин. 4Юсюне сыйлы гетен халат кийсин, аны тюбюнде гетен ич кёнчек болсун, белине гетен белибау байласын, башына да гетен сарых кийсин. Бу – сыйлы кийимди: санларын сууда жуууп, быланы юсюне алай кийсин. 5Исраил улуланы жамауатындан гюнях ючюн къурманнга эки теке бла толусунлай кюйдюрюлген къурманнга бир къочхар алсын.
6Харун кеси гюняхы ючюн къурманнга бир бугъа келтирсин; аны бла ол кеси эм юйюрю ючюн тазалау этсин. 7Сора эки теке алсын да, аланы Раббийни аллында, Тюбешиу Чатырны эшиги аллында сюесин. 8Харун бу эки текени юсюнден чёп атсын: бир теке Раббийге, экинчиси уа – ташлаугъа болсун#16:8 Оригиналда: «Азазелге». Чюйют тилде бу сёзню магъанасы, баям, «ташланнган теке» болур. Аны магъанасы: бу ташланыргъа белгиленнген теке гюняхланы къуу жерге элтеди. Аны кибик, 10 эм 26 аятлада.. 9Харун, чёбю Раббийге тюшген текени алсын да, аны гюнях ючюн къурманнга кессин. 10Чёбю ташлаугъа тюшген текени уа Раббийни аллына саулай сюеп, тазалау этер ючюн, аны къуу жерге элтип ташласынла.
11Харун кесини гюняхы ючюн къурманнга бугъа келтирсин, кеси эм юйюрю ючюн тазалау этсин эмда аны кесини гюняхы ючюн къурман этсин. 12Ол кёмюр табакъны алсын да, Раббийни аллындагъы къурман жерден мыдых бла толтурсун, юсюне ууатылгъан ариу ийис берген затладан эки уууч салсын да, жабыуну артына кийирсин. 13Анда ариу ийис берген затланы Раббийни аллындагъы отну юсюне салсын. Ариу ийис берген затланы букъусу Шагъатлыкъ Кюбюрню юсюндеги Мархамат Жери деген башын жабар. Харун алай этсе, ёлмез. 14Сора бугъаны къанындан алып, биразын бармагъы бла Мархамат Жерни ал жанына бюрксюн. Бираз къанны уа бармагъы бла Мархамат Жерни аллына жети кере бюрксюн.
15Сора, халкъны гюняхы ючюн къурманнга, теке кессин, аны къанын да жабыуну артына кийирип, бугъаны къанынча этсин: аны Мархамат Жерни юсюне эм Мархамат Жерни аллына бюрксюн. 16Алай бла ол Сыйлы Жерни Исраил улуланы харам ишлеринден, аманлыкъларындан эм хар тюрлю гюняхларындан тазалар. Аланы харамлыкъларыны арасында тургъан Тюбешиу Чатыргъа да, тамам алай этсин. 17Харун Сыйлы Жерде тазалау этер ючюн, ары киргенден сора, ол андан чыкъгъынчы, Тюбешиу Чатырда бир башха адам болмасын. Алай бла ол кесин да, юйюрюн да, битеу Исраилни жамауатын да тазалар.
18Харун Раббийни аллындагъы къурман жерге чыкъсын да, аны тазаласын. Бугъа тананы къанындан эм текени къанындан алсын да, къурман жерни битеу мюйюзлерине жакъсын. 19Сора къанны биразын бармагъы бла къурман жерге жети кере сепсин. Алай бла ол аны Исраил улуланы харамлыкъларындан тазаласын эм ариуласын.
Ташланырыкъ теке
20Ол, Сыйлы Жер ючюн, Тюбешиу Чатыр ючюн эмда къурман жер ючюн тазалау этип бошагъандан сора, сау текени келтирсин. 21Харун сау текени башына эки къолун салсын да, Исраил улуланы битеу аманлыкъларын, битеу гюняхларын ачыкъ айтсын эмда аланы текени башына салсын. Сора, бу жумушха белгиленнген адамдан, текени къуу жерге жиберсин. 22Алай бла теке, аланы битеу терсликлерин кесине алып, Харун жибертген къуу жерге элтсин.
23Харун Тюбешиу Чатыргъа кирсин, Эм Сыйлы Жерге кирирден алгъа кийген гетен кийимлерин тешсин да, анда къойсун. 24Ол сыйлы жерде жууунсун да, кесини бош кийимин кийсин. Сора чыкъсын да, кеси эмда халкъ ючюн тазалау этерге кесини эмда халкъны атындан толусунлай кюйдюрюлген къурманла келтирсин. 25Гюнях ючюн къурманны жауун къурман жерни юсюнде кюйдюрсюн.
26Ташланырыкъ текени элтген адам да кийимлерин, кесини санларын да жуусун. Сора къонушха кирсин. 27Гюнях ючюн къурман этилген, къанлары Сыйлы Жерде тазалау этер ючюн кийирилген бугъаны бла текени учаларын къонушдан тышына чыгъарсынла. Аланы терилерин, этлерин эмда кирлерин кюйдюрсюнле. 28Аланы кюйдюрген адам, кийимлерин да жуууп, кеси да жууунуп, къонушха алай къайтсын.
Тазалау Кюн
29Бу жорукъ сизге ёмюрге да болсун: жетинчи айны онунчу кюнюнде ораза тутугъуз, бир тюрлю ишге къатышмагъыз. Бу жорукъну кеси адамыгъыз да, арагъызда жашагъан тыш адамыгъыз да, толтурсунла. 30Бу кюнде, сизни ариулар ючюн, тазалау этиледи. Сора Раббийни аллында битеу гюняхларыгъыздан ариуланырсыз. 31Бу – толу тынчлыкъ кюндю, ораза тутугъуз. Бу – ёмюрге берилген жорукъду. 32Бу тазалауну атасыны орунуна баш дин къуллукъчу болургъа майланнган эм багъышланнган дин къуллукъчу этсин. Ол сыйлы гетен кийимлени кийсин да, 33Сыйлы Жер бла Тюбешиу Чатыр ючюн, къурман жер ючюн, дин къуллукъчула бла битеу жамауат ючюн тазалау этсин.
34Бу жорукъ сизге ёмюрге да болсун: Исраил улуланы битеу гюняхлары ючюн жылдан бир кере тазалау этсинле.
Алайды да, Раббий Муссагъа буюргъаны кибик болду.
Currently Selected:
Лебийлиле 16: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
