Мисирден чыгъыу 39

Дин къуллукъчулагъа сыйлы кийимле тигиу

(Чыгъ. 28:1-43)

1Сыйлы Жерде къуллукъ этер ючюн, кёк, къызгъылдым, къызыл бетли иничге халыладан согъулгъан къумачдан кийимле этгендиле. Харуннга да сыйлы кийимле тикгендиле. Раббийни Муссагъа буюргъаны кибик этгендиле.

Эфод

2Эфодну алтындан, кёк, къызгъылдым, къызыл бетли халыладан, иничге ийирилип согъулгъан гетенден этгендиле. 3Ала алтынны тюйюп, жукъа чапыракъла этгендиле эмда кёк, къызгъылдым, къызыл бетли иничге гетен халыланы арасына салып, уста этилген къумач согъар ючюн, алтын чапыракъладан халы этгендиле. 4Анга, жалгъаннган имбашлыкъла этгендиле, ол эки къыйырындан жалгъанып эди. 5Эфодну тышындан къысылгъан белибауу да, аны бла бирча этилип, алтындан, кёк, къызгъылдым, къызыл бетли жюнден эмда иничге ийирилип согъулгъан гетенден этилгенди. Раббийни Муссагъа буюргъаны кибик этгендиле.

6Оникс ташланы жонуп, аланы алтын уяларына салгъандыла эм, мухургъа жазылгъанча, Исраил улуланы атларын оникс ташлада тужур этип жазгъандыла. 7Бу ташла Исраил улулагъа эсгертме болур ючюн, аланы эфодну имбашлыкъларына салгъандыла. Раббийни Муссагъа буюргъаны кибик этгендиле.

Ёшюнлюк

8Ёшюнлюкню да эфоднуча, ариу сырып, алтындан, кёк, къызгъылдым, къызыл бетли жюнден эмда иничге ийирилип согъулгъан гетенден этгендиле. 9Ол тёртгюл эди. Ёшюнлюкню эки къатлы этгендиле, узунлугъу бир къарыш, эни да бир къарыш болуп, ол эки къатланып эди. 10Аны ичине асыл ташланы тёрт тизгин этип салгъандыла. Бир тизгинде: къызыл накъут, топпас, жашил зумурут. Бу биринчи тизгин эди. 11Экинчи тизгинде: феруза, накъут, налмас. 12Ючюнчю тизгинде: кёк накъут, агат, аметист. 13Тёртюнчю тизгинде: сары накъут, оникс, яспис. Ала алтын уяларына салыннгандыла. 14Асыл ташла, Исраил улуланы атларына кёре, онеки тайпаны хар бирини кеси атына кёре, мухурну жазыууча хар бир ташха бирер ат тужур этип жазылып, онеки таш бола эдиле.

15Ёшюнлюкге сырма алтындан эшилген базыкъ сынжырчыкъла этгендиле. 16Эки алтын уя бла эки алтын тогъай этип, экисин да ёшюнлюкню эки къыйырына бегитгендиле. 17Эшилген эки алтын сынжырчыкъны, ёшюнлюкню къыйырларындагъы эки тогъайгъа такъгъандыла. 18Эки сынжырчыкъны бирси эки къыйырын а эки уягъа тагъып, эфодну бет жанында аны имбашлыкъларына бегитгендиле. 19Дагъыда, эки алтын тогъай этгендиле эмда аланы ёшюнлюкню бирси эки къыйырына, эфодну ич жанына айланнган къыйырына орнатхандыла. 20Дагъыда, эки алтын тогъай этгендиле эмда аланы эфодну бет жанында, аны тёбен жанында эки имбашлыгъына эфодну белибаууну тышындан келишдиргендиле. 21Ёшюнлюк эфодну белибаууну юсюнде турур ючюн эмда ёшюнлюк эфоддан айырылмазча, ёшюнлюкню тогъайларын эфодну тогъайларына тартма бла къысхандыла. Раббийни Муссагъа буюргъаны кибик этгендиле.

Дин къуллукъчуланы башха кийимлери

22Эфодну тюбюнден кийилген къапталны кёк жюнден саулай согъуп этгендиле. 23Аны ортасында башы кирирге баш тешик этип, тешик тёгереги седиреп кетмезча, кюбени баш тешигинеча санжох салгъандыла. 24Къапталны этеклерини тёгерегине кёк, къызгъылдым, къызыл бетли халыладан анар оюула салгъандыла. 25Сырма алтындан къонгуроучукъла этгендиле эмда къонгуроучукъланы къапталны этеклерини тёгерегиндеги анарланы араларында такъгъандыла. 26Къуллукъ этер ючюн, къапталны этегини тёгерегине къонгуроучукъ бла анар, къонгуроучукъ бла анар такъгъандыла. Раббийни Муссагъа буюргъаны кибик этгендиле.

27Харуннга бла аны уланларына узун кёлеклени иничге гетенден сокъгъандыла. 28Сарыхны да иничге гетенден, башлыкъланы бла ич кёнчеклерин да алай. 29Белибауну да, иничге гетенден бла кёк, къызгъылдым, къызыл бетли жюнден, накъышла салып, согъуп этгендиле. Ол да, Раббийни Муссагъа буюргъаны кибик, этилгенди.

30Сырма алтындан сыйдамланнган къангачыкъ этип, аны юсюне мухургъа жонулуп жазылгъанча, тужур этип: «Раббийни Сыйлысы», – деп жазып, сыйлы таж этгендиле. 31Аны сарыхны юсюне къысар ючюн, анга кёк тартма такъгъандыла. Раббийни Муссагъа буюргъаны кибик этгендиле.

Сыйлы Мекямны ишлеп бошайдыла

(Чыгъ. 35:10-19)

32Сыйлы Мекямны – Тюбешиу Чатырны – битеу ишлери алай бошалгъан эдиле. Исраил улулары барын да, Раббийни Муссагъа буюргъаны кибик, алай этгендиле. 33Сора Сыйлы Мекямны Муссагъа келтиргендиле. Чатырны бла аны битеу кереклерин, ыргъакъларын, илкичлерин, къурукъларын, багъаналарын, аякъ тюплерин, 34къызылгъа боялгъан къой териледен тыш жабыуун, кёк сахтияндан тыш жабыуун, бёлюучю жабыуун, 35Шагъатлыкъ Кюбюрню, аны къурукъларын бла аны жапхан Мархамат Жерни, 36столну бла битеу аны кереклерин, сыйлы ётмеклени, 37сырма алтындан ишленнген чырахтанны, аны юсюнде орнашдырылгъан чыракъларын, чырахтанны битеу кереклерин, чыракъ жауну, 38алтындан ишленнген ладан ийис чыгъарылыучу жерни, майлау жауну, ариу ийисли тютюн этиучю затланы, Чатырны эшик жабыуун, 39жезден ишленнген къурман этилиучю жерни бла аны жез чалдишин, аны къурукъларын бла аны битеу кереклерин, къол-аякъ жууаргъа суу орунну бла аны аякъ тюбюн, 40арбазны жабыуларын, къазыкъларын бла аякъ тюплерин, арбазны къабагъыны жабыуун, жыжымларын бла чюйлерин эмда Сыйлы Мекямда – Тюбешиу Чатырда – къуллукъ этгенде жюрютюллюк битеу затланы, 41Сыйлы Жерде къуллукъ этгенде кийиллик кийимлени, дин къуллукъчу Харуннга сыйлы кийимлени, аны уланларына дин къуллукъчулукъ этгенде киерик кийимлени да келтиргендиле.

42Исраил улулары битеу бу ишлени, Раббийни Муссагъа буюргъаны кибик, алай этгендиле. 43Мусса битеу тамамланнган жумушну шарт кёргенди, ала аны тынгылы этип бошагъанларын эслегенди. Раббий къалай буюргъан эсе да, алай этгендиле. Сора Мусса алагъа алгъыш айтханды.

Currently Selected:

Мисирден чыгъыу 39: МалкъСК

Highlight

Copy