Мисирден чыгъыу 40

Сыйлы Мекямны орнатадыла

1Сора Раббий Муссагъа сёлешип былай айтханды:

2– Сыйлы Мекямны – Тюбешиу Чатырны – биринчи айда, айны биринчи кюнюнде къурурса. 3Шагъатлыкъ Кюбюрню аны ичинде салырса эмда Кюбюрню жабыу бла жабарса. 4Столну ары кийирирсе, битеу кереклерин аны юсюне тизип салырса, чырахтанны ары кийирирсе, аны чыракъларын юсюне салырса. 5Алтындан ишленнген ладан кюйдюрюлюучю жерни, Шагъатлыкъ Кюбюрню аллына орнатырса эмда Сыйлы Мекямны эшик жабыуун тагъарса.

6Толусунлай кюйдюрюлген къурман этилиучю жерни, Сыйлы Мекямны – Тюбешиу Чатырны – эшик аллында салырса. 7Къол-аякъ жууаргъа суу орунну, Тюбешиу Чатырны бла къурман этилиучю жерни арасында салырса эмда аны ичине суу къуярса. 8Чатырны тёгерегине арбаз къурурса эмда арбазны къабагъына жабыу тагъарса.

9Сора майлау жауну алырса эм Сыйлы Мекямны да, битеу аны ичинде болгъан затланы да майларса. Мекямны да, аны битеу кереклерин да сыйлы этерсе, сора ала сыйлы болурла. 10Толусунлай кюйдюрюлген къурман этилиучю жерни да, аны битеу кереклерин да майларса. Къурман этилиучю жерни сыйлы этерсе, сора къурман этилиучю жер бек сыйлы зат болур. 11Къол-аякъ жууаргъа суу орунну да, аны аякъ тюбюн да майлап, сыйлы этерсе.

12Харунну бла аны уланларын Тюбешиу Чатырны эшик аллына келтирирсе да, аланы суу бла жууундурурса. 13Харун Манга дин къуллукъчу болур ючюн, анга сыйлы кийимлени кийдирирсе, аны майлап, сыйлы этерсе. 14Аны уланларын келтирирсе да, алагъа узун кёлеклени кийдирирсе. 15Ала манга дин къуллукъчула болур ючюн, аталарын майлагъанынг кибик, аланы да майларса. Аланы майланмакълыкълары, аланы тукъумларында, аланы ёмюрге да дин къуллукъгъа салыр.

16Сора Мусса барын да, Раббий анга къалай буюргъан эсе да, алай этгенди.

17Экинчи жылны биринчи айыны биринчи кюнюнде Сыйлы Мекям къурулгъанды. 18Мусса Мекямны къурдургъанды, аны аякъ тюплерин салдыргъанды, аны илкичлерин сюетгенди, къурукъларын орнатдыргъанды, багъаналарын сюетгенди. 19Сыйлы Мекямны башына чатыр кердиргенди, чатырны юсюн да тыш жабыу бла жапдыргъанды. Ол да, Раббийни Муссагъа буюргъаны кибик, этилгенди.

20Шагъатлыкъны алып, Кюбюрню ичине салгъанды. Кюбюрню тогъайларына къурукъланы кийирген эди, башына да аны жапхан Мархамат Жерни салгъанды. 21Кюбюрню Сыйлы Мекямны ичине кийиртгенди, бёлюучю жабыуну жайдырып, Шагъатлыкъ Кюбюрню жапдыргъанды. Ол да, Раббийни Муссагъа буюргъаны кибик, этилгенди.

22Столну, Тюбешиу Чатырны ичинде, Сыйлы Мекямны шимал жанында, жабыуну тыш жанында салдыргъан эди. 23Столну юсюне, Раббийни аллында, ётмеклени тиздирип салдыргъанды. Ол да, Раббийни Муссагъа буюргъаны кибик, этилгенди.

24Чырахтанны да Тюбешиу Чатырны ичинде, Сыйлы Мекямны къыбыла жанында, столну аллында салдыргъанды. 25Раббийни аллында чыракъланы жандыртханды. Ол да, Раббийни Муссагъа буюргъаны кибик, этилгенди.

26Алтындан ишленнген ладан ийис чыгъартылыучу жерни да Тюбешиу Чатырны ичинде, бёлюучю жабыуну аллында салдыргъанды. 27Аны юсюнде ариу ийисли ладан кюйдюртюп, тютюн чыгъартханды. Ол да, Раббийни Муссагъа буюргъаны кибик, этилгенди. 28Сыйлы Мекямны эшигини жабыуун да такъдырып жайдыргъанды.

29Толусунлай кюйдюрюлген къурман этилиучю жерни да Сыйлы Мекямны – Тюбешиу Чатырны – эшик аллында орнатдырып, аны юсюнде толусунлай кюйдюрюллюк къурманла бла мирзеу саугъала этдиргенди. Ол да, Раббийни Муссагъа буюргъаны кибик, этилгенди.

30Къол-аякъ жууаргъа суу орунну да Тюбешиу Чатырны бла къурман этилиучю жерни арасында салдырып, къол-аякъ жууар ючюн, аны ичине суу къуйдургъанды. 31Мусса бла Харун эмда Харунну уланлары андан алып, къолларын бла аякъларын жууа эдиле. 32Ала Тюбешиу Чатыргъа кирлик эмда къурман этилиучю жерге жууукълашырыкъ заманларында къолларын бла аякъларын жууа эдиле. Ол да, Раббийни Муссагъа буюргъаны кибик, этилгенди.

33Сыйлы Мекямны бла къурман этилиучю жерни тёгерегине арбаз къурдургъанды эмда арбазны къабагъыны жабыуун такъдырып, жайдыргъанды. Алай бла, Мусса ишни буюрулгъаныча битдиргенди.

Раббийни аламатлыгъы кёрюнеди

34Ол заманда булут Тюбешиу Чатырны жапхан эди эмда Раббийни аламатлыгъы Сыйлы Мекямны толтургъанды. 35Мусса Тюбешиу Чатыргъа киралмагъанды, нек дегенде, булут аны юсюнде тура эди эмда Раббийни аламатлыгъы Сыйлы Мекямны толтургъанлай тура эди.

36Исраил улулары битеу жолоучулукъларында, булут Мекямны юсюнден кётюрюлген заманда, жолларына атлана эдиле. 37Булут кётюрюлмесе уа, ала, ол кётюрюлгюнчюге дери, жолгъа атланмай эдиле. 38Алай бла, битеу жолоучулукъларында, битеу Исраилни юйюрюню кёз алларында Раббийни булуту кюндюз Сыйлы Мекямны юсюнде эди, кечегиде уа анда от жана эди.

Currently Selected:

Мисирден чыгъыу 40: МалкъСК

Highlight

Copy