ဖံးလံးပံၤ 4
4
တဲၤဒဲလၱၢ်ကျဲးသအီတစီာ်
1မဲၤကနဳၤဒဳၣ်, ယသီၣ်တစီာ်, ယဘဲာ်လီၢ် သံကၱာ်မှီးဘဲာ်ဇၱၢ်သံလီၤ. သံမၱာ်အမဲၤမီၤသဳးမီၤ သးဆိးဇၱၢ်ယဲၤ, ကၱာ်ယပဲၢ်ဓဳၤပဲၢ်မူၤသ့ပွ့ၤယန့ၤဒဳ သံခဳးသံစဲလီၤ. ဘဲာ်လီၢ်သံယသီၣ်တစီာ်, အယဳၤမၱာ်ကျဲး ဒဳသံကဆီထဳးအီၣ်မှ့းအီၣ်ကျဳၤ ဒဳဘၱာ်စဲာ်အပူၤနဳၤ.
2အဳ, နီၢ်အူၤအိဒံၤကၱာ်နီၢ်စူၣ်တူဃ့ၤ, ယတၤမီၤဘဲာ်သံဒဳ သံကအီၣ်ယံၢ်အီၣ်ဒွါလှဲးလၢ်ဝၤ တပွဲၤကၱာ်တပွဲၤအစာ်ဘိသဲပူၤဝ့ၤဒဳဘၱာ်စဲာ်အပူၤနဳၤ. လီၤ. 3ကၱာ်နဲၤ, ထဲၢ်အမၱာ်ယခီကလဳၢ်အနှဲး, ယသးအဲးနံၤ နကစာ်ကအိးကိာ် အမံၤမှူးတစီာ် ယဳၤအကါ. မၤနဲၢ်ကဒီၣ်ဓဳၤဒဳၣ်, စဲာ်တစီာ်သးကလဳၢ်မဲၤဇဳၤယဲၤဒဳယတဲၤဒီဆးတဲၤသးလဳၢ်သးလၤ အံာ်အဝၱၤအကဲနဳၤ, ပျဳာ်ပျဳာ်ကၱာ်စီၤကျ့မ့ၤ ကၱာ်အမဲၤပျဳာ်တဲၤအလဝ့ၤတစီာ်, ထဲၢ်အမံၤဘဲာ်ဝှ့းလၤ ကဲၤဒဳ ကဘၱာ်စဲာ်အစဲာ်သမိအပူၤနဳၤ.
4သံတဲၤသးလဳၢ်သးလၤကအီၣ်ပီၢ် ဒဳဘၱာ် စဲာ်အပူၤအသဲာ်ယိတကၱာ်. ယဒီၣ်ဝ့ၤသးလဳၢ်သးလၤအံာ်ပီၢ်.
5ဒဲလၱၢ်ထာ်ပီၢ်သံတဲၤသဳးဘၱာ်သးယူၢ် ဒဳ ပၠၤကိအပွဲၤအလှီမီၢ်နဳၤ. ဘၱာ်စဲာ်ကလၤဘိးထၱး ထဳ. 6ဘဲာ်ရှဳဘဲာ်မၤမဲးတမံမဲး, မၱာ်ဒဳတဲၤသဘဲတၤထာ်အပူၤကိအပျာ်နဳၤ, တၤပီၢ်စဲာ်တဲၤထဲၢ်နလဳၤပၤတစီာ်နဳၤ, တၤပီၢ်စဲာ် သးအတဲၤသၱာ်ဟဲထာ် က့ၤစတဲၤလှူၣ်တဲၤတါအပူၤနဳၤ. 7ကၱာ်ဒီ ကဘၱာ်စဲာ် အတဲၤစဳးတဲၤ ချံးထဲၢ်ပၠၤလၢ်ခဳးဖဳးတသၱာ်ဟဲထိး နီးနဳၤ, ကအူအံာ်ကီသံသဳးသံသး ကၱာ်သံတဲၤကမဳၤကမၢ်တစီာ်နဳၤဒဳယ့ၣ်ရှူးခရၱာ်အပူၤနဳၤ.
8တဲၤယၱၢ်ဘဲာ်အလ့ၤကါကဓူမၱာ်, သဲပူၤ သဲဝ့ၤတစီာ်, မဲၤပ့ထာ်ပီၢ်သံသးကၱာ်တဲၤအဝၱၤအအဲးထဲၢ်အမီၤကီၢ်အံာ်ထါအံာ်, အစာ်ဘိ တဲၤတၱၢ်တဲၤမှး, တဲၤရှံတၤထဲ, တဲၤအဘဲာ်အပီၤ, တဲၤစါတဲၤထံ, တဲၤဘဲာ်လီၢ်သီၣ်ကျဲကၱာ်တဲၤအမံၤအဲးခဲအဲးတစီာ်နဳၤ. 9စာ်လှိစာ်ဒီပီၢ်တဲၤထဲၢ်သံမဲၤလှိနံၤကဲၤယအီၣ်တစီာ်, ဒဳတဲၤယၱၢ်ဘဲာ် တတီၤကၱာ်တဲၤဖၱးတဲၤမဲၤနဳၤ. ကၱာ်ကဘၱာ်စဲာ်ထဲၢ်အအံာ်ကဲာ် တဲၤစဳး တဲၤမီၤတပွဲၤကအီၣ်ကိာ်ဒီဧဲၤသံကါ.
တဲၤဒီၣ်လှူၣ်ဒီၣ်တါ
10ယသးလဳၢ်သးလၤအံာ်ဆိးဒဳဘၱာ်စဲာ်အပူၤနဳၤ. မၤနဲၢ်ကဒီၣ်ဓဳၤဒဳၣ်, တဲၤအဆဳအခဲဖျီးတလိးဝှါပွ့တမံၤဝှါအလ့ၤကါဒဳၣ်, သံနံၤဘဲာ်အခွဲးဒဳ သံကဒဲလၱၢ်ထာ် သံတဲၤသဳးအီၣ်သးအီၣ်ယဲၤအခဳးအစဲနဳၤ. တဘဲာ်ယသးအဲးဒီၣ်ဒဳသံဆီတဘး တဲၤသဳးအီၣ်သးအီၣ်ယဲၤနီး. မၱာ်တဲၤအခွဲးအယာ် တအီၣ်နံၤသံဒဳ သံကဒဲလၱၢ်ထာ်သံတဲၤသဳး အီၣ် သးအီၣ်ယဲၤနီးအခဳးအစဲလီၤ. 11ယကမဳၤကဲၤ သံစာ်ဖျီးတလိးကဲၤယဲၤအစဲ, ယဒီၣ်ကီတဲၤယၱၢ် ဘဲာ်ကယဳၤတဘဲာ်နီး. ယသဲာ်ကဲၤယန့ၤအကအီၣ်ကၱာ်တဲၤသဳးမံသးမီၤ ဘ့တဲၤအီၣ်ကၱာ်ယဲၤအသရ့နဳၤ. 12တဲၤအလဳၤပၤမၱာ်တၤနဲၢ်, ကၱာ် တဲၤနံၤဘဲာ်ဒဳၣ်လံအလဳၤပၤမၱာ်တၤနဲၢ်နဳၤ ယသၱာ်ဟဲတပွဲး. ယမၤလှိထဳတဲၤဟူၣ်တဲၤဇီၤအယဳၤစာ်ဘိထဲၢ်ဒီၣ်လဲၢ်မၱာ်ဝၱၤ, ထိးဓဲၢ်မၱာ်ဝၱၤ, အကအီၣ်သၱာ်အီၣ်ဇၤနဳၤ. ယအၣ်ဘဲာ်ကဳးအီဘဲာ်ကဳး မၱာ်ဝၱၤ, ယသးဝံာ်လၤဒီၣ်မၱာ်ဝၱၤ, ယအဲအီၣ်ကဲအီၣ်အိးမၱာ်ဝၱၤ, အတအီၣ်နံၤယဲၤနီးမၱာ်ဝၱၤ, ယအီၣ်သၱးအီၣ်ဇၤတပွဲး. 13ယကထဲး ကျဲၢ်နံၤတဲၤစာ်တဲၢ်စာ်တဲၢ်နှီနူၤ, ယအီၣ်ကၱာ်တဲၤခဳးတဲၤအါအကခးရှံ တဲၤမဲၤအန့ၤလဳစါစဲး ဒဳတဲၤစိသလဲထဲၢ်ခရၱာ်အံာ်လၤယဲၤနဳၤ.
14ပရၤဆါဒဳတဲၤမဲၤဇဳၤယတဲၤပၤတဲၤဆဲအပူၤနဳၤ သံမဲၤအဲးဇၱၢ်လီၤ. 15သံပၠၤဖံလံးပံၤဖဳးတစီာ်, သံသၱာ်ဟဲသအူ သအဲးတပွဲးထဲၢ်ဘ့ယဟဲးထၣ်ဒဳ က့ၤမၤက့းဒနံ ကၱာ်ဒီထိးလၤသဲလဲၢ်ခဳး ခရၱာ်အတဲၤသးလဳၢ်သးလၤအံာ်အဝၱၤအကဲဝှါအလ့ၤကါနဳၤ, သံမၱာ်ကဲၤတဲၤအီၣ်ပျဳာ်ထဲၢ်အအံာ်လၤတဲၤကၱာ်အနံၤဘဲာ်တဲၤပျဳာ်ပျဳာ်ကၱာ် ယဲၤနဳၤ. 16ဘ့ယလဳၤပၤတဲၤမဲၤဇဳၤ ဘ့ယအီၣ် အူးသ့းစၤလနံ အပူၤနဳၤ, သံသဲနံၤယဲၤအီၣ်အဲးဒဳၣ် လံကၱာ်တပျာ်လီၤ. 17တဘဲာ် ယသးအဲးနံၤထ့ ယကနံၤဘဲာ်တဲၤအနံၤခံလီၤနီး. မၱာ်ယသးအဲးကဲာ် ထၱးအီၣ်အဲးထာ် သံတဲၤမဲၤအဝၱၤအအဲးတစီာ် အခဳးအစဲလီၤ. 18မဲၤကနဳၤဒဳၣ်, အယဳၤမၱာ်စဲာ်ကါ ကျဲး, ထဲၢ်ယနံၤဘဲာ်သံတဲၤအံာ်လၤယဲၤလဳစါစဲး အနံၤခံ, ကၱာ်ဒီအမၱာ်ကဲၤတဲၤအအီၣ်အဲးဒဳၣ်လံ ကၱာ်ယလဳၤပၤကဲၤတစီာ်နဳၤ. ခဳနူၤယဳၤ, ယနံၤဘဲာ် ကဲၤတဲၤယလဳၤပၤတစီာ်လဳစါစဲး, ဒဳစီၤအ့းပၤဖရီး ဒံတူးလ့ၤသဲနံၤယဲၤ သံတဲၤအံာ် တစီာ်အခဳးအစဲ, တဲၤအလဳၤပၤယနံၤခံတစီာ်အီၣ်ပ့ထာ်ဇီၤထဳတပွဲး. တဲၤအယဳၤတစီာ်မဲၤအစာ်ဘိတဲၤလှူၣ်နှူဝံာ်ဒဳအဘဲာ် လှူၣ်ထာ်အံာ်ကဘၱာ်စဲာ်အီၣ်, ထဲၢ်အဘဲာ်သးစဲာ် ကၱာ်အမဲၤမီၤသးစဲာ်နဳၤလီၤ. 19အစာ်ဘိကဘၱာ် စဲာ်မၱာ် အယဲၤဓၢ်ကဓူအခီနဳၤ စကအံာ်လၤနံၤ ဒီဧဲၤသံတဲၤဒဳ သံလဳၤပၤအသရ့ ဒဳယ့ၣ်ရှူးခရၱာ်နဳၤ. 20တဲၤဓီၤတဲၤသ့း ကဘဲာ်ဒီဧဲၤဝၤပာ်ဘၱာ်စဲာ် လၤထူလၤပျဳၤတကၱာ်. အၤမ့ၣ်.
တဲၤနှူဆဲးအလ့ၤကါကဓူ
21ယနှူဆဲးတပွဲးကဘၱာ်စဲာ်အပၠၤခွံဖဳးထဲၢ်အဘဲာ် ကၠးယ့ၣ်ရှူးခရၱာ်တပွဲၤကၱာ်ကိအပွဲၤနဳၤ. အဘူၣ် တဲၤအအီၣ်ပျဳာ်ယဲၤဘ့ယဳၤတစီာ် နှူဆဲးလ့ၤတပွဲး သံသံ. 22ကဘၱစဲာ်အပၠၤခွံဖဳးအအီၣ်ဘ့ယဳၤ တစီာ်ဆဳ ဝၱၤဆဳမီၤဘဲာ်လၤဆါဒဲဧဲၤ ပၠၤအဘဲာ်ကၠး ဆးဖြးအနၤဖဳးတစီာ်နဳၤ.
23ဘၱာ်စဲာ်ယ့ၣ်ရှူးခရၱာ်အလှူၣ်အတါ ကလၤဘဲာ်ဒီဧဲၤသံလီၤကိအပွဲၤနဳၤ.
Currently Selected:
ဖံးလံးပံၤ 4: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
