ဖံးလံးပံၤ 3
3
တဲၤတၱၢ်တဲၤမှးနှဲးနှဲး
1သဲပူၤဝ့ၤတစီာ်, အလ့ၤကါကဓူသးဒီဆး ယဲၤသံမၱာ်, သးလဳၢ်သးလၤပီၢ်ဒဳသံမၱာ်တဲၤတမံၤစဲ ဒဳဘၱာ်စဲာ်အပူၤနဳၤ. ယကဝှ့းဒီဆးက့ၤဒီတဲၤထဲၢ် ယဝှ့းနံၤထဳသံ လှ့အအူဆူးတစီာ်နဳၤမၱာ်တဘဲာ် တဲၤထဳးတဲၤပၤတပွဲးယနံၤခံနီး. မၱာ်သံကနံၤဘဲာ် ပီၢ်တဲၤအီၣ်ဟူၣ်အီၣ်ဘံာ်ဒဳၣ်ချဳအနံၤခံလီၤ. 2သဓံအံာ်ပီၢ်သံန့ၤ ပၠၤအမဲၤတဲၤကၱကဲာ်မဲၤလှီတစီာ်, ထဲၢ်အမၱာ်ထွံၣ်တစီာ်, ပၠၤထဲၢ်အနှးဆိးတဲၤဝှိရကၱ အဖ့းခံတစီာ်နဳၤ. 3အနံၤဘဲာ်ထဳတဲၤဝှိရကၱ အနှဲးနှဲးမၱာ်ဝၤ, တဘဲာ်စဲာ်တစီာ်နီး, မၤနဲၢ်, ဝၤ သဘဲထာ်ကဘၱာ်စဲာ် ဒဳကဘၱစဲာ်အသး ကၱာ်ဝၤ သးလဳၢ်သးလၤအံာ်ဝၤတဲၤအီၣ်သမိဒဳယ့ၣ်ရှူးခရၱာ် ခရၱာ်အပူၤအခဳးအစဲလီၤ. ဝၤတဘဲလါတဲၤဘူၣ်ဒဳ တဲၤ ထဲၢ်အလၱၢ်ထာ်ဖျီထာ်ဇၤတစီာ်အခဳးတမံနီး. 4ယပဲၢ်လၤယတဲၤဘူၣ်ဒဳတဲၤအနဳၤ တစီာ်အခဳးဇၤတပွဲး. ပၠၤတပွဲၤပွဲၤမၱာ်ကမဳၤဒဳအတဲၤဘူၣ်မၱာ်အလဳၤပၤ အကလၱၢ်ထာ်ဖျီထာ်ဒဳၣ်, ယအီၣ်ကၱာ်အဝၱၤအကဲဒဳၣ်ချဳလံကၱာ်အနဳၤလီၤ. 5ယနံၤဘဲာ်တဲၤဝှိရကၱအဖ့းခံ လှ့ယမၱာ်ဝ့ၤ ပၠၤတဆီးဒဲ ဖဳးလီၤနဳၤ. ယအီၣ်လၤဒဳပၠၤအံၣ်စရ့ လးဖဳး, စီၤဘံၣ် ယၤမံၣ် အခွံသလဲအပူၤ, ယဲၤ မၱာ်ဧ့ၤဘြံၤဖဳးအသွံၣ် စါစါလီၤ. ဘ့အဘဲာ်ကၠး ယူဒဖဳး အတဲၤသိၣ် တဲၤသီနဳၤ, ယဲၤမၱာ် ဖၤရံၤရှဲဖဳးတပွဲၤပွဲၤ, 6ကၱာ်ယသးဆိးထိကၱာ်ထဲၢ်, ယမဲၤကၱကဲာ်မဲၤလှီကဲၤတဲၤအီၣ်ပျဳာ်နဳၤ. ဘ့အဘဲာ် ကၠးကၱာ်ပၠၤတပွဲၤတၱၢ်မှးအံာ်ကိာ် တဲၤဆီးခ့န့း တဲၤသိၣ်တဲၤသီအတဲၤမှဲးလၤတစီာ်နဳၤ, တဲၤပဲၢ်ယလီၤတဲၤကမဲာ်အလ့ၤတအီၣ်တပွဲးတမံနီး. 7ပရၤဆါဒဳၣ်, တဲၤထဲၢ်ယပဲၢ် ဓဳၤပဲၢ်မူၤ အစာ်ဘိ တဲၤနံၤလှူၣ်နံၤတါယနံၤခံနဳၤ, ခဳနူၤယဳၤ, ယပဲၢ် ကဲၤစဲာ်အစာ်ဘိတဲၤရှူးတဲၤပး ယနံၤခံဒဳ ခရၱာ်အစဲနဳၤ. 8တဘဲာ်ထ့တဲၤအနဳၤတစီာ်လီၤနီး. ယပဲၢ် လၤတဲၤလဳစါစဲး အစာ်ဘိ တဲၤရှူးတဲၤပးယနံၤခံ လဳကျံးကျံး, ကၱာ်တဲၤအလံၢ်ဓဳၤပွၱၤသဲဒဳၣ် ချဳယနံၤခံ မၱာ်တဲၤသၱာ်ဟဲယဘၱာ်စဲာ်ယ့ၣ်ရှူးခရၱာ် နဳၤ. ယဝှ့ဖျီးမံကဲၤတဲၤလဳ စါစဲး ဒဳစခဳးစစဲလီၤ. ယပဲၢ်တဲၤလဳစါစဲးအစာ်ဘိ တဲၤကတဳၢ်အမှံသရ့နဳၤ, စာ်ဘိထဲၢ်ယကနံၤဘဲာ် ပီၢ်ခရၱာ်အနံၤခံ, 9ကၱာ် အီၣ်ပ့အီၣ်ဇီၤပီၢ်ဒဳစပူၤ အနံၤ ခံနဳၤ. ယန့ၤဘၱစဲာ်သဲန့ၤနဳၤ, ယတဲၤတၱၢ် တဲၤမှးတအီၣ်ပ့ၤနီး, ထဲၢ် တဲၤဆီးခ့န့းတဲၤသိၣ် တဲၤ သီ အတဲၤတၱၢ်တဲၤမှးနဳၤ. ခဳနူၤယဳၤ ယအီၣ် ကၱာ်ကဲၤတဲၤတၱၢ်တဲၤမှး ထဲၢ်ယနံၤဘဲာ်ဒဳ တဲၤ ဘူၣ် ခရၱာ်အပူၤ, တဲၤတၱၢ်တဲၤမှးထဲၢ် အအီၣ်ဒဳ ကဘၱာ်စဲာ်အီၣ်အလၤ ကၱာ်အဒီၣ်ကတီၤ အံာ်တဲၤ ဘူၣ်တဲၤနဲၢ်နဳၤ. 10တဲၤထဲၢ်ယသးအဲး နံၤမၱာ် တဲၤ သၱာ်ဟဲခရၱာ် ကၱာ် တဲၤသၱာ်ဟဲတဲၤထာ် ပဳၤ က့ၤအစိသလဲ, တဲၤခးဇဳၤနံၤခံ စတဲၤခးဘဲာ် ယးဘဲာ်တစီာ်နဳၤ, ကဲာ်ထာ် ပၠၤအလါကၱာ်စဲာ် ဒဳ တဲၤသံအပူၤ, 11အီၣ်ကၱာ်တဲၤမူၤလဲၢ်ဆးရှံ ဒဳ ယန့ၤဘၱစဲာ်သဲန့ၤ ကဘဲာ်ဘးဝဲၢ်ထဳးက့ၤတဲၤသံ ကျဲနဳၤ.
တဲၤစွဲးဓဳၤဒဳအလ့ၤကဓူၤ
12ယတဒီၣ်တပွဲးဒဳယနဳၤယပဲၤထဳ ကၱာ်ယပ့ယဇီၤထဳနီး. နီၣ်သီနှီနူၤ, ယဝူၤသဲတဲၤပၤဝ့ၤတပွဲးဒဳ ယကနံၤဘဲာ်တဲၤအံာ်ဆူးထဲၢ်အမၱာ်ယ့ၣ်ရှူး ခရၱာ်မဲၤနံၤထဳယဲၤ ဒဳစန့ၤဘၱစဲာ်အနံၤခံနဳၤ. 13သဲပူၤဝ့ၤတစီာ်, ယတကမဳၤတပွဲးဒဳယနံၤဘဲာ်ထဳ တဲၤအံာ်ဆူးနဳၤနီး. မၱမၱာ်, ယနံၤဘဲာ်တဲၤတမဳၤလီၤမၱာ်ကဲၤ တဲၤဆီးသိပိၢ်နှဲးကဲတဲၤထဲၢ်အအီၣ် ယလ့ၤကါ, ကၱာ်ယဝူၤသဲတဲၤပၤသ့ပွ့ၤသၱးလၱ စာ်ဘိထဲၢ် ယကဓဳၤဒဳတဲၤအအီၣ်ယလှီမီၢ်တစီာ် အအီၣ်နဳၤ. 14ကနဳၤအစဲ, ယစွဲးတနၢ်ထြံး သ့ပွ့ၤသၱးလၱဒဳ အလ့ၤကဓူၤစာ်ဘိထဲၢ် ယကနံၤဘဲာ်ဆူး, ထဲၢ်အမၱာ် ကဘၱာ်စဲာ်အတဲၤယဳၤဒဳယ့ၣ်ရှူးခရၱာ်ထဲၢ်တဲၤအီၣ် သမိဒဳမီၢ်ခဳးနဳၤ.
15ဝၤလဳစါစဲးထဲၢ်အဓဳၤဘးထာ်ကဲၤဒဳသး တစီာ်မီၤအီၣ်အံာ်တဲၤပဲၢ်သဳးပဲၢ်သးစာ်ဘိကနဳၤလီၤ. လီၤ. ပရၤဆါဒဳၣ်, ပၠၤတစီာ်စီာ်မၱာ်အီၣ်ကၱာ်တဲၤ ပဲၢ်သဳးပဲၢ်သးအလၤဆါဒဳၣ်, ကဘၱာ်စဲာ်ကအံာ် သၱာ်ဟဲတပွဲးသံ တဲၤအယဳၤလှၱလှၱပျါပျါလီၤ. 16စာ်တဲၢ်စာ်တဲၢ်ဝှးဝှါ, ဝၤကလ့ၤအလှီမီၢ်အစာ်ဘိ ဝၤလ့ၤနဲၤနီၤကဲၤထိခဳတနံၤယဳၤနဳၤ.
17ယသဲပူၤဝ့ၤတစီာ်, စာ်လှိစာ်ဒီပီၢ်ယဲၤ. စာ်နှဲအံာ်ပီၢ်ပၠၤ ထဲၢ်အလိၤစာ်ဒီကိာ်ဝၤလ့ၤကၱာ် မဲၤတဲၤအဲးတစီာ်နဳၤ. 18ယဒီဆးထဳသံတဲၤ အယဳၤတစီာ်အီၣ်အဲပျာ်ထဳ. ခဳနူၤယဳၤယဒီၣ်ဝ့ၤကဒီ ဒဳတဲၤကၢ်ဓူထံသဲနၱၤခၱအၱးအပူၤနဳၤ. ပၠၤအီၣ်ဝ့ၤ အီၣ်အဲပွဲၤ, ထဲၢ်အတဲၤအီၣ်သမိ နှးကဲာ်ထာ်စဲာ် တစီာ်ခရၱာ်အတဲၤခးသံအန့ၤသဳာ်ပျီၤထူၣ်စူညါ အဒ့ဒီၣ်တစီာ်နဳၤ. 19စဲာ်တစီာ်အကျဲးကူဓူၤဒဳလရာ်အပူၤ, မၤနဲၢ်ကဒီၣ်ဓဳၤဒဳၣ်, စဲာ်တစီာ်အဘၱာ်စဲာ်မၱာ်စန့ၤ ဘၱစဲာ်အတဲၤသးအဲးနံၤလီၤ. စပဲၢ်ဓဳၤပဲၢ်မူၤအံာ်စန့ၤဒဳ တဲၤအမီၤသါဝၢ်အံာ်တစီာ်နဳၤ ကၱာ်စကမဳၤ အံာ် တဲၤထ့အဘဲာ်ကၠးကၱာ်လၢ်ခဳးတစီာ်နဳၤလီၤ. 20ဝၤလဳစါစဲး မၱာ်ကဲၤ မီၢ်ခဳးအထံအက့ၤဖဳးတစီာ်, ကၱာ်ဝၤအီၣ်ဆိဧိၢ် တိၤအံာ်ကဲၤ အယဳၤက့ၤစာ် က့ၤကဲာ် ဘၱာ်စဲာ် ယ့ၣ်ရှူးခရၱာ်ကလ့ၤလၤဒဳမီၢ်ခဳး နဳၤ. 21စကဘါ ချဲးကဲကတဲၤခဳးဇ့ၤအါဇ့ၤ ထဲၢ် အသံဇၤအန့ၤဘၱ စဲာ်တစီာ်နဳၤ, ကၱာ်နှးကဲာ်ထာ် အစာ်ဘိစန့ၤဘၱစဲာ် အီၣ်ကၱာ်တဲၤရှံတဲၤထဲအခီနဳၤ, စကဆီးသဳအံာ် တဲၤစိသလဲထဲၢ်အအူအံာ်တဲၤ လဳစါစဲးဒဳစကါလဲၢ်နဳၤလီၤ.
Currently Selected:
ဖံးလံးပံၤ 3: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
