ကလၤတံ 3
3
တဲၤသိၣ်တဲၤသီကၱာ်တဲၤဘူၣ်
1သံအအီၣ်ကလၤတံက့ၤပူၤတစီာ်သံပျူၤကဲၤဧါ. ပီၢ်ပွဲၤမဲၤတပ့ၤသံကၢ်ဓူပွဲၤ. သံဘဲာ်မဲၤသၱာ်ဟဲလှၱထာ်ထဳသံယ့ၣ်ရှူးခရၱာ်ဘဲာ်ခးတဲၤလၤ ကျဳၤသံဒဳသဳာ်ပျီၤအလီၤနဳၤထဳ. 2ယကဒဲစာ်မၤသံ, သံလိၤကိာ်မဲၤကိာ်တဲၤမှဲးလၤအခဳးအစဲ သံနံၤဘဲာ်ကီသးစါထံဧါ. မၱတမၱာ်နီးသံ ဘူၣ်ကဲၤတဲၤဒီထိးတစီာ်နဳၤဧါ. 3သံကူၤဓူၤနၤပါမၤပွ့ကနဳၤနဲၢ်. သံကဳၤထာ်ဝှါဒဳသးစါထံအပူၤ, သံကမဲၤကူဓူၤက့ၤအံာ်ဒဳ သံတဲၤခဳးတဲၤအိအပူၤ ပ့ၤလီၤနဳၤဧါ. 4သံကဲာ်ထၱးဘဲာ်သဲ န့ၤတစီာ်အကဲာ်ထာ်တဲၤအနှးနှါပ့ၤလီၤဧါ. အနှဲးနှဲးနဳၤတ ဘဲာ်အနှးနှါနီး. 5ဒဳသံလိၤကိာ်မဲၤကိာ်တဲၤမှဲးလၤအကါအခဳးအစဲ, ကဘၱာ်စဲာ်အံာ်နှးနှါကဲၤသးစါထံနဳၤဧါ. မၱတမၱာ်နီးသံသၱာ်ဟဲကဲၤကၱာ်ဘူၣ်ကဲၤတဲၤသးလဳၢ်သးလၤအဝၱၤအကဲအခဳးအစဲဧါ.
6စာ်ပီၢ်စီၤအၤဘြၤဟၣ်နဳၤ. အစာ်ဘိစဲာ်စါထံဒီၣ်, “စဘူၣ်ကဘၱာ်စဲာ်, ကၱာ်စတဲၤဘူၣ်အစဲကဘၱာ်စဲာ်မဲၤဝၱၤမဲၤစါကဲၤစဲာ်.” 7ကနဳၤအခဳးအစဲ, သံမၱာ်ပၠၤအအီၣ်အံာ်တဲၤဘူၣ်တစီာ်နဳၤအစဲ, သံဘဲာ်သၱာ်ဟဲထဲၢ်စီၤအၤဘြၤဟၣ်အခွံနှဲးနှဲးနဳၤ. 8စဲာ်စါထံဒီၣ်တီၤလီၤကဲၤထဲၢ် ကဘၱာ်စဲာ်ကမဲၤအံာ်တဲၤဘူၣ်အကမဲၤဝၱၤမဲၤစါပွဲၤသူကူာ်ဖဳးတစီာ်ဒဳတၤသးလဳၢ်သးလၤအံာ်အဝၱၤအကဲ အတဲၤသိၣ်တဲၤသီအပူၤဘ့စဒီဆးစီၤအၤဘြၤဟၣ်, “နခဳးနစဲပၠၤခွံဖဳးလဳစါစဲးကဘဲာ်ဝှိးဝၱၤကီ” နဳၤ. 9အစာ်ဘိစီၤအၤဘြၤဟၣ်အီၣ်အံာ်တဲၤဘူၣ်ဒဳၣ်စနံၤဘဲာ်တဲၤဝှိးဝၱၤအခီနဳၤ, ပၠၤအအီၣ်အံာ်တဲၤဘူၣ်တစီာ် ကနံၤဘဲာ်ကိာ်ကီတဲၤဝှိးဝၱၤအယၢ်သိးစဲာ်နဳၤ.
10အအီၣ်အံာ်တဲၤမှဲးလၤတစီာ်မၱာ်စအီၣ်တဲၤဝှိးကၱကဲာ်အကါလဲၢ်, မၤနဲၢ်ဒဳၣ်စဲာ်စါထံဒီၣ်, “ကယါပၠၤအတမဲၤကိာ်ပ့ထာ်ဇီၤထာ်တဲၤမှဲးလၤအကါနီးတစီာ်နဳၤ ကဘြာ်ဒီဧဲၤတဲၤဟိးကၱကဲာ်,” အဒီၣ်ဓဳၤ. 11တဲၤမှဲးလၤတမဲၤဝၱၤမဲၤစါပၠၤဒဳကဘၱာ်စဲာ်အလှီမီၢ်နီး. မၤနဲၢ်ဒဳၣ်စဲာ်စါထံဒီၣ်, “ပၠၤအတၱၢ်အမှးတပွဲၤနံၤဘဲာ်တဲၤအီၣ်သမိဒဳတဲၤဘူၣ်အပူၤလီၤ” အဒီၣ်ဓဳၤ. 12တဲၤမှဲးလၤမၱာ်အတအီၣ်သၣ်ကီတဲၤဘူၣ်အလီၤနီး. မၤနဲၢ်ဒဳၣ်တဲၤအဒီဆးဝၤအီၣ်, “ပၠၤတပွဲၤ ပွဲၤထဲၢ်အလိၤကိာ်မဲၤကိာ်တဲၤမှဲးလၤအကါတစီာ်နဳၤစနံၤဘဲာ်တဲၤအီၣ်ဒဳအပူၤလီၤ,” အဒီၣ်ဝ့ၤဓဳၤ.
13ခရၱာ်မဲၤလှိထာ်က့ၤဝၤ ဒဳတဲၤမှဲးလၤအ တဲၤဝှိးကၱကဲာ်အကျဲဒဳ စဲာ်သဲန့ၤခးဘဲာ်ကဲၤ တဲၤဝှိးကၱကဲာ်ဝၤနံၤခံအခဳးအစဲနဳၤ. မၤနဲၢ်ဒဳၣ်စဲာ်စါထံဒီၣ်, “အဘဲာ်ဝှိးကၱကဲာ်မၱာ်အဘဲာ်စဳးထာ်သံဒဳသဳာ်အလီၤတပွဲၤနဳၤ,” အဒီၣ်ဓဳၤ. 14အယဳၤမၱာ်စီၤအၤဘြၤဟၣ်အတဲၤဝှိးဝၱၤဒဳယ့ၣ်ရှူးခရၱာ်အလီၤနဳၤကမၱာ်ပီၢ် ပွဲၤသူကူာ်ဖဳးတစီာ်အနံၤခံခံ, ကၱာ်စာ်ဘိထဲၢ်ဒဳတဲၤဘူၣ်အပူၤဝၤကနံၤဘဲာ်ပီၢ်သးစါထံအတဲၤအၣ်မါခးအံာ်နဳၤ.
တဲၤမှဲးလၤကၱာ်တဲၤအၣ်မါခးအံာ်
15သဲပူၤဝ့ၤတစီာ်, ယအံာ်သံတဲၤအဒိတဓဲထဲၢ်တဲၤဖၱထာ်ဝၤတဲၤအီၣ်တနံၤတနံၤနဳၤ. ထိမၱာ်ပၠၤကၠံၢ်ပွဲၤအတဲၤအဳလါဖျးလၤလၢ်ဝၤတဲၤဝၱၤတဲၤ ကဲတမံၤမံၤကၱာ်ဆ့းလၤကဲၤအမံၤနဳၤ, ပၠၤတစာ်တလိးဇၤနီးနီး, တပျီာ်ထူဇၤနီးနီး. 16ခဳနဳၤယဳၤတဲၤဒီၣ်တီၤလီၤတစီာ်မၱာ်အလၤဘဲာ်စီၤအၤဘြၤဟၣ်ကၱာ်စခွံစသလဲ. မှါအံာ်ပီၢ်, ဒဳတဲၤဒီၣ်တီၤလီၤအပူၤနဳၤ, စဲာ်စါထံတမဲၤအံာ်တဲၤယၱၢ်ဘဲာ်အဒဲလၱၢ် စခွံသလဲအီၣ်အဲးအီးအီးနဳၤနီး, မၱာ်စခွံသလဲတပွဲၤ, ထဲၢ်ခရၱာ်လီၤနဳၤ. 17ယသးအဲးဒီဆးသံမၱာ်ကဘၱာ်စဲာ်အဳလါဖျးလၤဝှါစီၤအၤဘြၤဟၣ်ကၱာ် အၣ်မါခးအံာ်ကဲၤအကမဲၤပ့ထာ်ဇီၤထာ်စတဲၤအဳလါ ဖျးလၤနဳၤ. တဲၤမှဲးလၤအအီၣ် ထာ်ဝှါအလ့ၤကါ အဒ့ာ်လွံၢ်ကယဲၤကၱာ်ဆဳရှံအဓၢ်ပူၤနဳၤ, အတမဲၤကဲမဲၤလှဲမဲၢ်ကဲာ်ထာ်တဲၤအဳလါဖျးလၤကၱာ်ကဘၱာ်စဲာ် အတဲၤဒီၣ်တီၤလီၤနီး. 18ဘ့ာ်မ့ကဘၱာ်စဲာ်အတဲၤအံာ်လၤကမၱာ်မၤ အအီၣ်ထာ်ဒဳ တဲၤမှဲးလၤအလီၤနဳၤဒဳၣ်, တဘဲာ်အကအီၣ်ထာ် ကိာ်ဇၤဒဳ စတဲၤဒီၣ်တီၤလီၤအစဲ ကဘၱာ်စဲာ်မဲၤနံၤ ကဲၤတဲၤဟိးဝၱၤဒဳ စီၤအၤဘြၤဟၣ်အနံၤခံနဳၤ.
19မဲၤကနဳၤဒဳၣ်, တဲၤမှဲးလၤမၱာ်တၤအနံၤခံနဲၢ်. တဲၤမှဲးလၤဘဲာ်အ့ာ်လၤနံၤစာ်ဘိထဲၢ် အကဒဲလၱၢ်တဲၤမဲၤကမဲာ်မၱာ်တၤနဲၢ်နဳၤ. အယဳၤမၱာ်တဲၤဒီဆးလၤတံၤလၤဆ့းတဲၤကမဲာ် ထိစီၤအၤဘြၤဟၣ်အခွံသလဲအဘဲာ်ဒီၣ်တီၤလီၤတပွဲၤကဓဳၤလ့ၤနဳၤ. မီၢ်ခဳးပွဲၤဇဳၤတစီာ်မၱာ်အအံာ်လၤတဲၤမှဲးလၤ, ကၱာ်ပွဲၤဒီပၢ်မၱာ်အအီၣ်ပၠၤကၠံၢ်ဖဳးအမ့ၢ်ဇဳၤလီၤ. 20ပရၤဆါဘ့ပၠၤတပွဲၤအီၣ်ကဲၤနဳၤ, အတလဳၤပၤပ့ၤပွဲၤဒီပၢ်နီး. ကဘၱာ်စဲာ်မၱာ်တပွဲၤလီၤ.
တဲၤမှဲးလၤအတဲၤသးအဲးနံၤ
21မဲၤကနဳၤဒဳၣ် တဲၤမှဲးလၤကၱာ်ကဘၱာ်စဲာ် အတဲၤဒီၣ်တီၤလီၤထာ်ခဳးကါလၢ်ဝၤဧါ. တဘဲာ်နီး. တဲၤမှဲးလၤကအံာ်ဇၤမၤဝၤတဲၤအီၣ်သမိဒဳၣ်, ပၠၤကိအပွဲၤကဘဲာ်မဲၤဝၱၤမဲၤစါဒဳတဲၤဆီးခ့န့းတဲၤမှဲးလၤလီၤ. 22မဲၤကနဳၤစဲာ်စါထံဒီၣ်ကီ, လၢ်ခဳးသဒဲဘဲာ်အီၣ်ကဲၤဒဳ တဲၤခီၣ်ဝဲၤအတဲၤအူအံာ်အလဲၢ်လီၤ. ကနဳၤအခဳးအစဲတဲၤအဳလါဖျးလၤဘဲာ်အံာ်လၤနံၤကီဝၤဒဳတဲၤဘူၣ်ယ့ၣ်ရှူးခရၱာ်အပူၤနဳၤ, ကၱာ်အတဲၤဘူၣ်အီၣ်တစီာ်နံၤဘဲာ်ကီတဲၤအယဳၤနဳၤ.
23တချူကၱာ်တဲၤဘူၣ်ဓဳၤလ့ၤနှၱနီးနဳၤ, တဲၤမှဲးလၤတအံာ်ကဲၤဝၤတဲၤအီၣ်လှိအီၣ်လၤနီး, ဝၤဘဲာ်ဒဳးဝဲၢ်ကျဳၤအံာ်ကဲၤထိတဲၤဘူၣ်ဒဲလၱၢ်ထာ်နဳၤ. 24တဲၤမှဲးလၤမၱာ်အစာ်အံာ်ဝၤထိခရၱာ်ဓဳၤလ့ၤကၱာ် ဝၤဘဲာ်မဲၤဝၱၤမဲၤစါအံာ်ကၱာ်တဲၤဘူၣ်နဳၤ. 25ခဳနဳၤယဳၤအခၠၱးဘဲာ်ထဳဒဳတဲၤဘူၣ်အနံၤခံဒဳၣ်, ဝၤတအီၣ်ပ့ၤတဲၤစာ်အံာ်အူအံာ်အကါလဲၢ်တမံနီး.
26ကၱာ်သံကိအပွဲၤမၱာ်ကဘၱာ်စဲာ်အဖဳးဒဳတဲၤဘူၣ်ကၱာ်တဲၤအီၣ်ယံၢ်အီၣ်ဒွါဒဳယ့ၣ်ရှူးခရၱာ်အပူၤနဳၤ. 27သံဘဲာ်တဲၤဖဳးစူထံ ဒဳယ့ၣ်ရှူးခရၱာ်အပူၤနဳၤ, ကၱာ်ခဳနဳၤယဳၤသံကြဳၢ်ထာ်ဘူထာ်ထဳခရၱာ်. 28အခဳးအစဲဒဳၣ် တဲၤပ့ၢ်ဖးအန့ၤဒဳယူဒၤဖဳးကၱာ်ကြံးခ်ဖဳးအလဝ့ၤ, ဇိၤပွဲၤကၱာ် ပွဲၤအီၣ်လှိ, အမံၤခဳကၱာ်အမံၤမှူးအဇဳၤတအီၣ်ပ့ၤနီး. ဝၤမၱာ်လဳ ပၠၤတပွဲၤလီၤဒဳယ့ၣ်ရှူးခရၱာ်အပူၤနဳၤ. 29သံဘဲာ်ကၠးခရၱာ်ဒဳၣ် သံဖၱထာ်ကဲၤစီၤအၤဘြၤဟၣ်အခွံသလဲအတးနံၤဘဲာ်ကဘၱာ်စဲာ်အတဲၤဒီၣ်တီၤလီၤကဲၤတစီာ်နဳၤ.
Currently Selected:
ကလၤတံ 3: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
