ကလၤတံ 2
2
တဲၤလၤတ့ၢ်ပျဳာ်ဒဳယရူၤၡလ့ၣ်အူးပူၤ
1အလ့ၤကါၡံးလွံၢ်ဒ့ာ်ဖျီတလိးဝှါခၣ်လဲာ်ယထာ်ကီဒဳယရူၤၡလ့ၣ်အူးတပျာ်ပ့ၤ. 2ယလ့ၤကိာ်စီၤဘၤနါဘၤအကါကၱာ်ယဟဲးယဳၤအံာ်ကဲၤစီၤတံတူး. ယလ့ၤဒဳနဳၤမၱာ်တဲၤဒဲလၱၢ်ယဲၤအခဳးအစဲ, ကၱာ်ယဒီဆးကဲၤတဲၤအီၣ်ပျဳာ်အခဳးအန့ၤတစီာ်ဒဳယဒီၣ်အူဒီဆးပွဲၤသူကူာ်ဖဳးအကျဲတစီာ်နဳၤ. ယတသးအဲးနံၤယတဲၤဒီၣ်အူဆးအူလှ့အအူဆူးတစီာ်မၱာ်ဝၱၤ, ခဳနဳၤယဳၤတစီာ်မၱာ်ဝၱၤ ကတကဲာ်ထာ်တဲၤအနှးနှါနှးနှါနီး. 3ကၱာ်ဒီအမဲၤကဲၤစာ် တဲၢ်. စီၤတံတူးထဲၢ်အဟဲးကိာ်ယကါတပွဲၤနဳၤ, စမၱာ်နီၣ် သီကြံးခ်ဖဳးတပွဲၤနှီနဳၤ, စဖ့းခံတဘဲာ်ဟိရကၱနီး. 4တဲၤဒဲအီၣ်ထာ်မၱာ်ဒဳပၠၤအတအီၣ်တဲၤအီၣ်ပျဳာ်အပူၤနီးတစီာ်လ့ၤနံၢ်ဟူၣ်ဝှါဝၤခဳးဝၤကျဲ, စစာ်ဟူၣ်ကဲၤဝၤတဲၤအီၣ်လှိအီၣ်လၤဒဳခရၱာ်အပူၤ, ကၱာ်စသးဘဲနံၢ်ဝၤဒဳဇိၤဖဳးအပဳၤအဟီးအကျဲအခဳးအစဲနဳၤ. 5ယသးအဲးဝဳၢ်အံာ်ကဲာ်အံာ်တဲၤသဳးလဳၢ်သးလၤအဝၱၤအကဲအထာ်ပဳၤထာ် ဘါအခဳးအခဳးအစဲ, ယတအံာ်ကဲၤပၠၤအနဳၤတစီာ်အဆူးတကၱနီး.
6အကဓူၤလါပၠၤအဒီၣ်လၤအန့ၤအခဳးအန့ၤတစီာ်နဳၤ တမၱာ်ပ့ၤယနံၤခံပၠၤအယူၢ်ဓဳၤမူၤဓဳၤပ့ၤနီး. မၤနဲၢ်ဒဳၣ်, ကဘၱာ်စဲာ်တစာ်ပၠၤအမူၢ်ကါတဗွဲနီးအခဳးအစဲလီၤ. ပၠၤအခဳးအန့ၤအယဳၤတစီာ်အနံၤခံအမီၤပျီာ်ထူယတဲၤသိၣ်တဲၤသီတအီၣ်ကဲၤတမံနီး. 7မၱာ်စဲာ်တစီာ်စာ်ထၱးသၱာ်ဟဲဘဲာ်ကိာ်ကဲၤထဲၢ်ယဘဲာ်သဓဳလ့ၤအကဒီၣ်အူဒီဆးပွဲၤသူ ကူာ်ဖဳးတစီာ် အစာ်ဘိစီၤပ့းတရူးဘဲာ်သဓဳလ့ၤအကဒီၣ် အူဒီဆးပၠၤယူဒၤဖဳးတစီာ်နဳၤ. 8စဲာ်ထဲၢ်အလဲၢ်ထာ်စီၤပ့းတရူးယူဒၤဖဳးတစီာ်အနံၤခံ သဓဳဖဳးအခဳးတပွဲၤနဳၤ, အံာ်လၤကဲၤယဲၤအကဒီၣ်အူဒီဆးပွဲၤသူကူာ်ဖဳးတစီာ်နဳၤ. 9မဲၤကနဳၤစီၤယၤကိာ်, စီၤပ့းတရူးကၱာ်စီၤယိၤဟၣ်, ပွဲၤအခဳးအန့ၤကၱာ် ပွဲၤခၣ်ထူၣ်အယဳၤတစီာ်နဳၤဒးထဳးကဲၤစီၤဘၤနါဘၤ ကၱာ်ယစူးခီးအစာ်ဘိဝၤမၱာ်ပၠၤတဖဳးလီၤအခီနဳၤ. ဝၤလၤကျၤလှဲးကဲၤလၢ်ဝၤဒဳ ဝၤကလ့ၤထၱးဘဲာ်ပွဲၤသူကူာ်ဖဳးတစီာ်ကၱာ်စဲာ်တစီာ်ကလ့ၤထၱးကဲၤယူဒၤဖဳးတစီာ်နဳၤ. 10စဒီၣ်တကြၱၢ်နၱၢ်ဝၤအက ကမဳၤထာ်နံၤအကမဲၤဇဳၤဘဲာ်အဆဲးညဲဖဳးထဲၢ်ယဲၤမၱာ်မၱာ်ယသးအီၣ်အကမဲၤကနဳၤတဓဲနဳၤ.
စီၤပ့းတရူးကၱာ်စီၤပီလူးဒဳအၣ်တံၤအီာ်အူး
11ဘ့စီၤပ့းတရူးဓဳၤလ့ၤဒဳအၣ်တံၤအီၤအူးနဳၤ, ယတရၤကဲၤစဲာ်. မၤနဲၢ်ဒဳၣ်စမဲၤကမဲာ်ကဲၤတဲၤအခဳးအစဲလီၤ. 12စအၣ်ပျဳာ်အီပျဳာ်နဲၤနီၤကဲၤပွဲၤသူကူာ်ဖဳးတ စီာ်နဳၤ, ပရၤဆါဘ့စီၤယၤကိာ်အခီအသီၣ်တစီာ်ဓဳၤလ့ၤတပျာ်, စထၱးတပီၤကဲၤစန့ၤ. စဘဲာ်ၡဳဒဳအဖ့းခံဘဲာ်ဟိရကၱတစီာ်ကဒီၣ်ဘဲာ်ဆးဘဲာ်စဲာ်နဳၤ. 13ယူဒၤဖဳးတစီာ်မဲၤကိာ်ကဲၤစကါဒဳတဲၤမဲၤပရၤဆးအတဲၤမဲၤအပူၤနဳၤ, ကၱာ်စီၤဘၢ်နါဘၤ နှီနူၤလိၤဒီၣ်ကိာ်ကဲၤကဲၤ. 14ဘ့ယစာ်ထၱးစဲာ်တစီာ်တလ့ၤကိာ်တနၢ်ပံးတဲၤသးလဳၢ်သးလၤအံာ်အဝၱၤအကဲအကျဲးသအီနီးဒဳၣ်, ဒဳပၠၤကိအပွဲၤအလှီမီၢ်နဳၤ, ယဒီၣ်ကဲၤစီၤပ့းတရူး, “နမၱာ်နီၣ်သီယူဒၤဖဳးတပွဲၤနှီနူၤ, နအီၣ်ကဲၤအစာ်ဘိပွဲၤသူကူာ်ဖဳးတစီာ်နဳၤ. တဘဲာ်အစာ်ဘိယူဒၤဖဳး တပွဲၤ နဳၤအီၣ်အခီနီး. မဲၤကနဳၤဒဳၣ် နကနှးဇၤဒီပွဲၤသူကူာ် ဖဳးတစီာ် အကလိၤကိာ်ယူဒၤဖဳးအကျဲးသအီ စာ်တဲၢ်” ယဒီၣ်ကဲၤစဲာ်ဓဳၤ.
ယူဒၤဖဳးကၱာ်ပွဲၤသူကူာ်ဖဳးနံၤဘဲာ်တဲၤယဳၤက့ၤစာ်က့ၤဒဳတဲၤဘူၣ်
15ဝၤမၱာ်နီၣ်သီယူဒၤဖဳးနှီနူၤ, ဝၤတမၱာ်အစာ်ဘိပၠၤဒီၣ် “ပွဲၤသူကူာ်ဖဳးတဲၤခီၣ်ဝဲၤဖဳး” နီး, 16မၱာ်ဝၤသၱာ်ဟဲတပွဲး ပၠၤတပွဲၤဘဲာ်ပဲၢ် တၱၢ်ပဲၢ်မှးဒဳကဘၱာ်စဲာ်အလှီမီၢ်မၱာ်ဒဳ စတဲၤဘူၣ် ယ့ၣ်ရှူးခရၱာ်, ကၱၤတဘဲာ် စတဲၤမဲၤကိာ်တဲၤမှဲးလၤ အကါနဳၤနီး. ဝၤမၱာ်မၱာ် ဝၤဘူၣ်ယ့ၣ်ရှူးခရၱာ်စာ်ဘိထဲၢ်ဝၤကဘဲာ်ပဲၢ်တၱၢ်ပဲၢ်မှးပီၢ်ဒဳ ကဘၱာ်စဲာ် အလှီ မီၢ် အနံၤခံနဳၤ, ကၱာ်တဘဲာ်ဒဳဝၤမဲၤကိာ်တဲၤမှဲးလၤ အကါနဳၤနီး. မၤနဲၢ်ဒဳၣ်ဝၤဘူၣ်ကဲၤထဲၢ် ပၠၤတဘဲာ် ပဲၢ်တၱၢ်ပဲၢ်မှးကၱာ်ကဲၤတဲၤမှဲးလၤတဗွဲနီးနဳၤ. 17မဲၤကနဳၤဒဳၣ်, ဘ့ဝၤဝၢ်လှဲးတဲၤပဲၢ်တၱၢ်ပဲၢ်မှးဝၤ ကဘၱာ်စဲာ်အလှီမီၢ်ဒဳ ဝၤအီၣ်ပျဳာ်ဆီယံၢ်ခရၱာ်အပူၤ နဳၤအခဲယဳၤ, မၱာ်အမဲၤဖၱထာ်ဝၤတဲၤခီၣ် ဝဲၤဖဳးအစာ်ဘိပွဲၤသူကူာ်ဖဳးတစီာ်လီၤနဳၤဒဳၣ်, ခရၱာ်နှးဝၤမဲၤတဲၤခီၣ်ဝဲၤဧါ. တဘဲာ်တပွဲးကနဳၤနီး. 18ယမၱာ်ဘီာ်ထာ်ပြးထာ်က့ၤတဲၤ ထဲၢ်ယပၢ်ဖျီးမံဝှါထဳနဳၤဒဳၣ်, ယဒဲလၱၢ်ထာ်ယန့ၤဒဳယဲၤ မၱာ်ပၠၤအမဲၤကမဲာ်တဲၤသိၣ်တဲၤသီလီၤ. 19ဘ့အဘဲာ်ကၠးကၱာ်တဲၤသိၣ်တဲၤသီနဳၤယသံဝှါကဲၤ. အမဲၤ သံယဲၤမၱာ်တဲၤသိၣ်တဲၤသီသဲန့ၤ စာ်ဘိထဲၢ်ယက အီၣ် သမိဘဲာ်ပီၢ်ဒဳကဘၱာ်စဲာ်အနံၤခံနဳၤ. ယဘဲာ်ထးလၤကျဳၤသံပျဳာ်ပျဳာ်ကဲၤခရၱာ်ဒဳသဳာ်ပျီၤအလီၤနဳၤ. 20ကၱာ်ခူနူၤယဳၤယအီၣ်ကၱာ်ယသးအသမိယဳၤ, တဘဲာ်ယတဲၤအီၣ်နီး, မၱာ်ခရၱာ်အအီၣ်ဒဳယပူၤတပွဲၤအတဲၤအီၣ်တခီ. ယတဲၤအီၣ်သမိခဳနဳၤယဳၤ မၱာ်တဲၤဘူၣ်ကဘၱာ်စဲာ်အဖဳးထဲၢ်အဘဲာ်လီၢ်ယဲၤကၱာ် အအံာ်လၤအသးသမိယနံၤခံတပွဲၤအပူၤနဳၤ. 21ယတပၢ်ဖျီးမံကဲာ်ထာ်ကဘၱာ်စဲာ်အတဲၤလှူၣ်တဲၤတါတစီာ်နဳၤနီး. တဲၤမှဲးလၤကမဲၤဝၱၤမဲၤစါဇၤမၤယဲၤဒဳၣ်, ခရၱာ်အတဲၤသံကမၱာ်တပွဲးတဲၤအနှးနှါနှးနှါလီၤ.
Currently Selected:
ကလၤတံ 2: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
