၂ ကရံၣ်သူး 7
7
1ဘဲာ်လီၢ်သဲပူၤသဲဝ့ၤတစီာ်, ဒဳတဲၤအၣ်မါခးအံာ်ယဳၤတစီာ် အပူၤ, ဝၤဟူစဘါဒီဧဲၤကယါအမဲၤဘီာ်ဇၤဝၤနဲၤဘၱစဲာ်ကၱာ်ဝၤသးတစီာ် နဳၤ, စာ်ဘိ ထဲၢ်ဝၤကနံၤဘဲာ်ပီၢ်တဲၤဝၱၤတဲၤစါထံအပ့ထာ်ဇီၤထာ်ဒဳတဲၤၡံး ဆါနံၤကဘၱာ်စဲာ်အလ့ၤအပူၤနဳၤ.
စီၤပီလူးအတဲၤသးကနၢ်အံာ်
2အံၤပီၢ်ဝၤအလ့ၤအကျဲးဒဳသံသးပူၤနဳၤ. ဝၤတမဲၤကဲ မဲၤဗြိၤကဲၤပၠၤတဗွဲနီး, ဝၤတမဲၤကဲမဲၤအိးကဲၤပၠၤတဗွဲနီးနီး, ကၱာ်ဝၤ တအါဝူၢ်အါသဖျဲးကဲၤပၠၤတဗွဲနီးနီး. 3ယဒီၣ်တဲၤအယဳၤမၱာ်တဘဲာ် ယသးပၢ်ဝဲၢ်သံလီၤတဲၤကမဲာ်နီး, အစာ်ဘိယဒီဆး ဝှါထဳသံနဳၤ, သံအီၣ်ကဲၤဒဳဝၤသးပူၤ, ဝၤသံပျဳာ် အီၣ်ပျဳာ်ပ့ၤလီၤ. 4ယတဲၤဆးၡံအံာ်အဓဳၤ ကဓူၤ အီၣ်ဒဳသံအီၣ်နဳၤ, ကၱာ်ယခူအံာ်ဟဲအံာ်ကဲၤသံပွ့ ဒဳ ဝၤတဲၤပၤတဲၤဆဲအခၠၱးနဳၤယအီၣ်ပ့ထာ်ကဲၤကၱာ်တဲၤ မဲၤမီၤထာ်က့ၤကၱာ်ယတဲၤသးကနၢ်အံာ်မၱာ်အလၤ ပျၱၤလၤပျိၤကဲၤနဳၤ.
5ဝၤဓဳၤလ့ၤဝှါဒဳမၤက့းဒနံက့ၤနှီနူၤ, ဝၤနၱၤ ဘၱစဲာ်တအီၣ်ဆီဓူၢ်ဆီးဒဲဘဲာ်နှၱနီး. ဝၤ စာ်ထၱးဘဲာ် ကဲၤတဲၤပၤတဲၤဆဲအီၣ်ခွဲဘးဝၤ, တဲၤ ထာ်ဓဳၤထာ် ရၤဒဳအချဳအသါပၤ, တဲၤၡံးဆါအီၣ် ဒဳဝၤအဳးလၢ် သးပူၤနဳၤလီၤ. 6ပရၤဆါကဘၱာ်စဲာ် ထဲၢ်အမဲၤမီၤ ထာ်က့ၤအမီၤခီၣ်ဝဲၤတစီာ်အသးတပွဲၤနဳၤ, မဲၤမီၤ ထာ်က့ၤကဲၤဝၤသးဒဳ စီၤတံတူးအတဲၤဓဳၤလ့ၤအပူၤလီၤ. 7ကၱာ်တဘဲာ်ထ့စတဲၤဓဳၤလ့ၤလီၤနီး, မၱာ် တဲၤမဲၤမီၤသးထဲၢ်စနံၤဘဲာ်ကဲၤဒဳသံအီၣ်နဳၤကိာ်ကိာ် အခဳးအစဲနဳၤ. စဒီဆးလဳကဲၤဝၤထဲၢ်သံသးအဲးကဲာ် ထၱးကဲၤယဲၤ, သံခီၣ်ဝဲၤကဲၤယဲၤ, သံဘဲာ်ၡဳဘဲာ်မၤ ကဲၤယနံၤခံနဳၤ, ခဳနူၤယဳၤယခူယမီၤထာ်က့ၤကဲၤ ပွ့တမံၤ ဒဳၣ်လံကၱာ်လှ့အအူဆူးနဳၤ.
8ဘ့ာ်မ့ယဝှ့းနံၤသံစဲာ်နဳၤ ကမဲၤဆဲးညဲသံ သးနဳၤ, မၱာ်ယတယၤတပွဲးယလ့ၤနီး. ဘ့ယစာ်ထၱး သံသးတမီၤနီးတဒဳးတဆးနဳၤ ယသးတအဲးတပွဲး နီး. 9ပရၤဆါခဳနူၤယဳၤ ယခူယမီၤထာ်က့ၤကဲၤ. အတဘဲာ်မဲၤယမဲၤဆဲးညဲသံအခဳးအစဲနီး, မၱာ်ဒဳ တဲၤဆဲးညဲမဲၤနံၤသံတဲၤပၤယၤလၤက့ၤအန့ၤအခဳး အစဲနဳၤ. သံတဲၤဆဲးညဲမၱာ်ကဘၱာ်စဲာ်အဳးလၤတဓဲ ကၱာ်သံမီၤခးဘဲာ်တဲၤဘဲာ်ၡဳဒဳဝၤအီၣ်တအီၣ်ပ့ၤကီ တမံနီး. 10တဲၤခးဘဲာ်အဘဲာ်ဘၱာ်စဲာ်အသးမၱာ် တဲၤဘါချဲးတဲၤအဲးအနံၤခံ ကၱာ်အမဲၤလှဲမဲၢ်တဲၤသး ပျဲၢ်နဳၤ. ပရၤဆါတဲၤခးဘဲာ်တဲၤဆဲးညဲ အဘဲာ်ကၠး လၢ်ခဳးတဘဲာ်ယဳၤမၱာ် အမဲၤနံၤပၠၤတဲၤသံလီၤ. 11စာ်ပီၢ်, ကဘၱာ်စဲာ်မဲၤဖၱထာ်ကဲၤသံတဲၤအဳးသဳး အဳးသး တၤနဲၢ်နဳၤ. သံသဳးဆိးသးဆိးကဲၤပွ့းတဲၢ်. သံဘဲာ်ဆး သကါအ ကဒဲလၱၢ်သံမၱာ်အအီၣ်လှိကဲၤ တဲၤကမဲာ်ပွ့း တဲၢ်. သံဘဲာ်မဲၤခ့းသးကဲၤပွ့းတဲၢ်. သံသးဖူးသးကနၢ် ကဲၤပွ့းတဲၢ်. သံသးအဲးနံၤဘဲာ်ကဲၤပွ့းတဲၢ်. သံအံာ်လၤကဲၤသံန့ၤပွ့းတဲၢ်. သံ သးအဲးနံၤတဲၤ ကစံးရး ပၠၤအမဲၤကမဲာ်တဲၤတစီာ်ပွ့းတဲၢ်. ဒဳတဲၤကိမံၤမံၤအပူၤ သံဒဲလၱၢ်ကဲၤထဲၢ်သံမီၤဘဲာ်ဒီၣ် ဘဲာ်ဆးတမံတအီၣ်နီးနဳၤ.
12ကနဳၤအစဲ, ယဝှ့းနံၤနီၣ်သီသံအိးစဲာ်နှီ နူၤ, တဘဲာ်ဒဳအမဲၤကမဲာ်တဲၤတပွဲၤအနံၤခံနီးနီး, အဘဲာ်မဲၤကမဲာ်တပွဲၤအနံၤခံနီးနီး. မၱာ်ဒဳကဘၱာ်စဲာ် အလှီမီၢ်နဳၤ, စာ်ဘိထဲၢ် ယယကမဲၤသၱာ်ဟဲပီၢ်သံ တဲၤဘဲာ်ၡဳဘဲာ်မၤဝၤနံၤခံတစီာ်နဳၤလီၤ. 13အနဳၤ မၱာ်အမဲၤနံၤဝၤတဲၤခဳးတဲၤအါအဇၱၢ်အဇိၢ်ဒဳး.
တဲၤအံာ်ခဳးအံာ်အါအယဳၤအခဳးအစဲ, အမဲၤ သးကနၢ်အံာ်ဒဳၣ် ချဳဝၤမၱာ်ဒဳဝၤစာ်ထၱးစီၤတံတူး အီၣ် သးလဳၢ်သးလၤအခဳးအစဲနဳၤ, တဲၤမီၤဘဲာ်သံဒဳသံ ကိအပွဲၤ မဲၤမီၤသဳးမီၤသးစဲာ်အစဲနဳၤ. 14ယထါအံာ်ကီာ်အံာ်သံဒဳစလှီမီၢ်နဳၤ, မၱာ်သံဒဲလၱၢ်ထာ်တပွဲးယဒီၣ်တဲၤအဘဲာ်လီၤ. ဝၤဒီဆးသံတဲၤအဘဲာ်အပီၤသဲာ်ယိလီၤကၱာ် ဝၤတဲၤထါအံာ်ကီာ်အံာ်သံဒဳ စီၤတံတူးအလှီမီၢ်နဳၤမၱာ်လဳ ဝၤဒီၣ်တဲၤအဘဲာ်လီၤလီၤ. 15စတဲၤဘဲာ်လီၢ်သံဓဳၤထာ်ဒဳၣ်ချဳမၱာ်ဒဳ စကမဳၤထာ်နံၤဒဳသံတဲၤဆိးသးဆိးကၱာ်သံယဳၤ သံ ကဲးကဲၤစဲာ် ဒဳတဲၤဒဳတဲၤယးအပူၤနဳၤ. 16ယသး ကနၢ်အံာ်ဆိးမၱာ်ဒဳယသၱာ်ဟဲထဳထဲၢ်ယဆးၡံအံာ် လဳသဳးလဳသးဇၤထဳတပွဲးသံအစဲနဳၤ.
Currently Selected:
၂ ကရံၣ်သူး 7: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
