၂ ကရံၣ်သူး 3
3
တဲၤအဳလါဖျးလၤအသဲအတဲၤခၱတဲၤပွဲၤတစီာ်
1တဲၤအယဳၤတစီာ်မၱာ်အစာ်ဘိဝၤသးအဲး မဲၤဝၤမူၢ်ကါနဳၤဧါ. ဝၤတသးအဲးမဲၤတပွဲးသံမူၢ်ကါ ကၱာ်ပၠၤလဝ့ၤအမူၢ်ကါတဗွဲနီး. 2မၤနဲၢ်, သံသဲ န့ၤသံမၱာ်ကဲၤ အိးစဲာ် အအီၣ်ဝှ့းလၤ ဒဳဝၤသးအပူၤ နဳၤ, ထဲၢ်ပၠၤကိအပွဲၤကဲာ်ထၱးကၱာ်ဖးဇၤ, 3ဒဳခရၱာ် အစဲာ်ပရဳအတဝှ့းလၤအံာ်ကၱာ်မှၱးထံနီး, မၱာ်အဘဲာ် ဝှ့းလၤအံာ်ကၱာ်တဲၤသမိအဘၱာ်စဲာ်အသးစါထံ, တဘဲာ်အအီၣ်ဝှ့းလၤဒဳလဳၤဘ့ာ်အခဳးနီၤ, မၱာ်ဒဳသံသး အအီၣ်သမိအလီၤအခဳးအစဲနဳၤ.
4ဒဳကဘၱာ်စဲာ်အလှီမီၢ်ဝၤတဲၤဆးၡံအံာ် အီၣ်ဒဳခရၱာ်အီၣ်နဳၤ. 5တဘဲာ်ဒဳဝၤခဳးဝၤအါကၱာ် ဝၤနဲၤ, ဝၤကဲၤထာ်ကဲၤထီတဲၤမဲၤအခဳးအစဲနီး. ဝၤကဲၤထာ်ကဲၤထီမၱာ် လဳဒဳကဘၱာ်စဲာ်အီၣ်လီၤ. 6စဲာ်တပွဲၤလီၤ, စအံာ်ကဲၤဝၤတဲၤခဳးတဲၤအါအကစာ်အံာ်ခွဲး အံာ်တဲၤအဳလါဖျးလၤအသဲယဳၤနဳၤ, ထဲၢ် အတဘဲာ်ဝှ့းလၤအံာ်စဲာ်ဒူနီး, မၱာ်အဘဲာ်ဝှ့းလၤအံာ် ကဲၤသးစါထံနဳၤ, အဘဲာ်ဝှ့းလၤအံာ်စဲာ်ဒူဖျဳးမၱာ် အမဲၤနံၤဝၤတဲၤသံ, မၱမၱာ်သးစါထံအံာ်ဝၤတဲၤသမိ လီၤ.
7တဲၤသိၣ်တဲၤသီ အဘဲာ်ထးလၤ ကၱာ် စဲာ်ဒူဖျဳးဒဳ လဳၤဘ့ာ်တစီာ်အလီးကၱာ် ကဘၱာ်စဲာ်အတီၤအသ့းလၱၢ်ထာ်ဘ့အဘဲာ် အံာ်လၤအခၠၱးနဳၤ. တဲၤအကဲၢ်ကပြီၤဒဳ စီၤမိၤၡ့ အမူၢ်ကါလၤပၱၢ်ကဲၤ နီၣ်သီနှီနူၤ, အကဲၢ်ကပြီၤ ဝ့ၤအစဲအံၣ်စရ့လးဖဳးတစီာ် တစာ်ဝဲၢ်ကဲာ်ထာ် စမူၢ်ကါနီး. တဲၤသိၣ်တဲၤသီထဲၢ်အလ့ၤအံာ်တဲၤသံနဳၤ, ဘ့အခဳးဓဳၤအါဓဳၤ အခၠၱးနဳၤမၱာ်အီၣ်ကၱာ်တဲၤဟံတဲၤထဲပွ့ကနဳၤဒဳၣ်, 8တဲၤလှၱထဲၢ်အအီၣ် ခွဲဘးသးစါထံနဳၤ, အကကဲၢ်ကပြီၤ ဒဳၣ်ချဳကီ ပွ့းတဲၢ်လီၤ. 9တဲၤခး ဇိၤထဲၢ်အမဲၤနံၤဝၤ တဲၤစံးရးကလှၱဆ့း ကတြီၤမၤပွ့ကနဳၤဒဳၣ်, တဲၤခးဇိၤတဲၤထဲၢ်အမဲၤနံၤဝၤတဲၤလှိ ထာ်က့ၤနဳၤ အကလှၱဆ့းကတြီၤကီပွ့းတဲၢ်လီၤ. 10ကဒိးသီတြီၤမၤတဲၤလှၱ ဆ့းကတြီၤအယဳၤနဳၤ ဒဳၣ်, အအူဆူးတဓဲမဲၤစာ်ဘိအနှးနှါလီၤ. 11တဲၤ တဒဳးတဆးဖဳးအတဲၤလှၱတဲၤပျါကမၱာ်မၤကနဳၤဒဳၣ်, တဲၤအလၤ ထူလၤပျဳၤအတဲၤလှၱတဲၤပျါ ကမဲၤဒဳၣ်ချဳကီစာ်တဲၢ်လီၤ.
12ဝၤအီၣ်အံာ်တဲၤဆးၡံအံာ်အယဳၤဒဳၣ်, ဝၤသဳးဝၤသးခူထာ် ဇၱၢ်. 13ဝၤတဘဲာ်မၱာ်အစာ်ဘိ စီၤမိၤၡ့, ထဲၢ်အဘီဘံာ်အမူၢ်ကါ စာ်ဘိထဲၢ်အံၣ်စရ့လးဖဳးတစီာ်ကတကဲာ်ထၱးအလၤပၱၢ်နဳၤနီး. 14အသ့ပွ့ၤမၱာ်, စဲာ်တစီာ်အတဲၤကမဳၤခံးလၤ, ထိဓဳၤလၤခဳတနံၤဒဳစဖး စဲာ်စါထံသဲသၱးအလံၤနဳၤ တကၱယၢ်အီၣ်ဝ့ၤအဘီဘံာ်စမူၢ်ကါနဳၤ, မၤနဲၢ်ဒဳၣ်, အဖၱး ကဲကဲာ်ထာ်တကၱယၢ်မၱာ်ခရၱာ်လီၤအခဳးအစဲနဳၤ. 15ခဳနူၤယဳၤ, ပၠၤတစီာ်ဖးနီၣ်သီ စီၤမိၤၡ့အတဲၤ ထူးလၤမှဲးလၤအစဲာ်နှီနူၤ, တကၱယၢ်အီၣ်ဘီဘံာ်ဝ့ၤစတဲၤကမဳၤ. 16စတက့ၤဘးထၱး ကဘၱာ်စဲာ်နီးအသူသရ့, တဲၤကတဖၱးကဲနံၤကီစဲာ်တစီာ်နီး. 17ခဳနူၤယဳၤဘၱာ်စဲာ်မၱာ်သးစါထံကၱာ်ဘ့ဘၱာ်စဲာ် အသးစါထံအီၣ် နဳၤတဲၤ အီၣ်လှိအီၣ်လၤအီၣ်လီၤ. 18ကၱာ်ဒီဝၤလဳစါစဲးလှၱဘးက့ၤအံာ် ဘၱာ်စဲာ်အတဲၤလှၱဆ့းကတြီၤကၱာ်ဒီဝၤမူၢ်ကါအီၣ် အတဘါကဲၤ, ကၱာ် တဲၤလှၱဆ့းကတြီၤတမဳလီၤအယဳၤ, ထဲၢ်သးစါထံနဳၤ ဘါချဲးက့ၤဝၤအကလါကၱာ်စဲာ်ထဲၢ် အအီၣ်အံာ် တဲၤလှၱဆ့းကတြီၤဒဳၣ်ချဳတပွဲၤနဳၤ.
Currently Selected:
၂ ကရံၣ်သူး 3: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
