၂ ကရံၣ်သူး 2
2
1ကနဳၤအခဳးအစဲ, စာ်ဘိထဲၢ်ယတတမဲၤတမီၤ သးဘဲာ်ပီၢ်သံနီးအနံၤခံ, ယလဲၢ်လၤယသးအကတလ့ၤ ထၱးပ့ၤသံနီး. 2ယကမဲၤတမီၤသးသံနီးဒဳၣ်, အမဲၤသး ကနၢ်အံာ်ယဲၤပီၢ်ပွဲၤကအီၣ်ဒီ ပွဲၤ. 3ယကလ့ၤထၱးသံ ကၱာ်မဲၤတမီၤဘဲာ်ပၠၤထဲၢ်အမဲၤသးကနၢ် အံာ်ယဲၤတစီာ်အသးနီးနဳၤ အတသးအဲးနံၤယဲၤနီးအခဳးအစဲ, ယဝှ့းနံၤကဲၤ သံစဲာ်. မၤနဲၢ်, ယဘူၣ်သ့ပွ့ၤဒဳ ယကသးကနၢ်အံာ်ဒဳၣ်, သံမၱာ်မၱာ်သံ ကသးကနၢ်အံာ်ကိအပွဲၤလီၤလီၤ. 4ယဝှ့းနံၤသံစဲာ်အီၣ်ကၱာ်တဲၤ ကဳၤတဲၤကဲၢ်, သဳးလၤဘူၣ် သးလၤဓၢ် ကၱာ်တဲၤကၢ်ဓူထံလၤ, ပရၤဆါ တဘဲာ်တဲၤ မဲၤတမီၤသးသံအနံၤခံနီး, မၱာ်ယဘဲာ်လီၢ်သံလဳစါစဲးပွ့း ဓဲၢ်နဳၤ သံကသၱာ်ဟဲပီၢ်အနံၤခံလီၤ.
တဲၤဘါပျဲးပၠၤအတဲၤကမဲာ်
5ခဳနူၤယဳၤ, ပၠၤတပွဲၤပွဲၤ ကမဲၤတမီၤအလဝ့ၤတပွဲၤအသးဒဳၣ်, တဘဲာ်စမဲၤတမီၤယသးလီၤနီး, မၱာ်သံ လဳစါစဲးတကၱာ်တကီလီၤလီၤ. (ယဒီၣ်မၤကယဳၤနဲၢ်, မၱာ်သံတကြၱၢ်ပီၢ်စဲာ်တစီာ်နီးအနံၤခံနဳၤ.) 6ပၠၤကယဳၤ တပွဲၤအနံၤခံပၠၤအီၣ်အဲပွဲၤအတဲၤလဲၢ်တၤစဲာ်နဳၤအဘဲာ် နံၤပီၤနံၤထဳ. 7ခဳနူၤယဳၤစာ်ဘိထဲၢ်စကတအဳးသဳးအဳး သးဘဲာ်ပီၢ်အဇၱၢ်အဇိၢ်နီးနဳၤ, တးကၱာ်သံဘါပျဲးစတဲၤ ကမဲးကၱာ် အံာ်ခဳး အံာ်အါက့ၤပီၢ်စဲာ်. 8ယတၤမီၤဘဲာ် သံဒဳသံကအံာ်သၱာ်ဟဲပီၢ်စဲာ်ထဲၢ်သံဘဲာ်လီၢ်သ့ပွ့ၤတပွဲး စဲာ် နဳၤ. 9ယဝှ့းနံၤကဲၤသံစဲာ်မၱာ်ယသးအဲးသၱာ်ဟဲ သံခးကဲၤထာ်ပွ့းဓဲၢ်, ကၱာ်သံပြးနှဲးဆဲးနှဲးတပွဲးသံ န့ၤအကမဲၤကိာ်ယတဲၤဒဲလၱၢ်သံကျဲးနဳၤဧါ, နီးဧါ. 10သံ ကဘါပျဲးမၤပၠၤတပွဲၤပွဲၤအတဲၤကမဲာ်ဒဳၣ်, ယဲၤမၱာ် မၱာ်ယဘါပျဲးတပွဲးစဲာ်စဲာ်. မၤနဲၢ်အလ့ၤမၱာ်အီၣ်ဒဳ ယကဘါပျဲးတမံၤမံၤဒဳၣ်, ယကဘါပျဲးစဲာ်ဒဳခရၱာ် အလှီမီၢ်, ဒဳသံစဲလီၤ. 11စာ်ဘိထဲၢ်မဳၤဒဲးလၱး တနံၤဘဲာ်ပီၢ်အခွဲးအကအီၣ်ဒဳဝၤခဳးနီးနဳၤ. မၤနဲၢ် ဝၤသၱာ်ဟဲ စတဲၤကဳထာ်ကၠးလၤတစီာ်လီၤ.
စီၤပီလူးအတဲၤဘဲာ်ၡဳဘ့တြိၤအါအူး
12ဘ့ယလ့ၤဓဳၤတြိၤအါစာ်ဘိထဲၢ်ယကဒီ ထိး လၤခရၱာ်အတဲၤသးလဳၢ်သးလၤအံာ်အဝၱၤအကဲနဳၤ, ယကဲာ်ထၱးကဲၤဘၱာ်စဲာ်ဘါထာ်ကဲၤကျဲးဒဳ စတဲၤမဲၤဘ့နဳၤအနံၤခံ. 13ပရၤဆါဒဳၣ်ယတကဲာ် ထၱးကဲၤဝၤသဲပူၤဝ့ၤတံတူးဘ့နဳၤနီၤအခဳးအစဲ, အဘဲာ်ၡဳဘဲာ်မၤဆိးကဲၤယဲၤ. ယနှူဆဲးဝှါအူးဖဳးအအီၣ် ဘ့နဳၤတစီာ်ဒဳၣ်, ယလ့ၤကဲၤဒဳမၤက့းဒနံအက့ၤနဳၤ.
တဲၤနဳၤတဲၤပဲၤဒဳခရၱာ်အပူၤ
14ပရၤဆါ, ထါထာ်အံာ်ပီၢ်ကဘၱာ်စဲာ်အလှူၣ်အတါအဓဳၤ အဇၱၢ်. မၤနဲၢ်, ခရၱာ်အတဲၤနဳၤတဲၤ ပဲၤတဲၤခးပွဲခးလၤအဆဳအခဲနဳၤ ဘၱာ်စဲာ် သဲလ့ၤသဲာ် ယိဝၤအစာ်ဘိအဘဲာ်ပိာ်ဘဲာ်စဳတစီာ်, ပျဳာ်ပျဳာ်ကၱာ် ခရၱာ်အခဳး အစဲနဳၤ. စဆီၤသဳအံာ်ဝၤအစာ်ဘိဝၤကကဲာ်ထာ်ပီၢ်ခရၱာ်အတဲၤနှူဝံာ် ဒဳအလ့ၤတကွၢ်လဲၢ်နဳၤ. 15မၤနဲၢ်ကဒီၣ်ဓဳၤဒဳၣ်, ဝၤမၱာ်အစာ်ဘိ တဲၤနှူဝံာ်ထဲၢ်ခရၱာ်လှူၣ်လၤဒဳကဘၱာ်စဲာ်အအီၣ်, ထဲၢ်အနှူဝံာ် နံၤတကွၢ် လဲၢ်ပၠၤအနံၤဘဲာ်ထဳတဲၤယဳၤက့ၤစာ်က့ၤ တစီာ်ကၱာ်ပၠၤထဲၢ်အဟဲး ကဲလှဲမဲၢ်တစီာ်နဳၤ. 16ပၠၤထဲၢ်အဟဲးကဲလှဲမဲၢ်တစီာ် နဳၤအနံၤခံ မၱာ်အစာ်ဘိ တဲၤနှူသဳနှူခဲးထဲၢ်အမဲၤသံမဲၤလှဲမဲၢ်တဲၤကၱာ်ပၠၤအနံၤ ဘဲာ်ထဳတဲၤယဳၤက့ၤစာ်က့ၤတစီာ်အနံၤခံမၱာ်အစာ်ဘိ တဲၤတဲၤနှူဝံာ် ထဲၢ်အအံာ်တဲၤသမိနဳၤ. မဲၤကနဳၤ ဒဳၣ်, ပီၢ်ပွဲၤမဲၤဇၤ ဒီတဲၤကယဳၤ တပွဲၤပွဲၤ. 17ဝၤ တမၱာ်အစာ်ဘိပၠၤအလဝ့ၤအီၣ် အဲးအီးအီး. ထဲၢ်အဟဲးဆဲလါကဘၱာ် စဲာ်အလ့ၢ်အဝှဲးစာ်ဘိထဲၢ်တဲၤ အလံၢ် အပွၱၤတအီၣ်နီးအခီနဳၤနီး. မၱာ်ကဘၱာ် စဲာ်သဲလ့ၤဝၤအခဳးအစဲ, ဝၤယၱၢ်ဘဲာ်ဒဳစလှီမီၢ်, အီၣ် ကၱာ်သဳးသးအလှၱအပျါ, အစာ်ဘိခရၱာ်အခၱ အပွဲၤတစီာ်နဳၤ.
Currently Selected:
၂ ကရံၣ်သူး 2: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
