၂ ကရံၣ်သူး 12
12
စီၤပီလူးအတဲၤစာ်ထၱးကၱာ်တဲၤဒဲလၱၢ်
1အချဳထာ်မၤမ့ၤကတအီၣ်နီၣ်သီနီးနှီနူၤ, ယကထါအံာ်ဘဲာ်ဝ့ၤတပွဲးယန့ၤဧါ. မၱာ်ယကဒီၣ်ဒီ တဲၤစာ်ထၱးကၱာ်တဲၤဒဲလၱၢ်ဒဳဘၱာ်စဲာ်အီၣ်နဳၤတခီ. 2ဒဳခရၱာ်အပူၤနဳၤ ယသၱာ်ဟဲပၠၤအီၣ်တပွဲၤ, ထဲၢ်အဖျီးတလိးဝှါၡံးလွံၢ်ဒ့ာ်လှ့နဳၤ, ဘဲာ်ဇၢ်ထာ်ကဲၤဒဳမီၢ် ခဳးအထာ်ယၱၤကဓူနဳၤ. (မၱာ်အမဲၤသ့ပွ့ၤအန့ၤဧါ, မၱာ်တဲၤဒဲလၱၢ်ဧါ, ယတသၱာ်ဟဲနီး. အသၱာ်ဟဲမၱာ် ကဘၱာ်စဲာ်တပွဲၤလီၤ.) 3-4ယဒီၣ်ဝ့ၤ, ယသၱာ်ဟဲ ဘဲာ်ပၠၤအယဳၤတပွဲၤဘဲာ်ဇၢ်ထာ်ကဲၤဒဳပၤရဒံစူးနဳၤကၱာ် စသၱာ်ဟဲဘဲာ်ကဲၤတဲၤထဲၢ်ကတဒီဆးဇၤပၠၤလၢ်ခဳးဖဳး အလ့ၢ်အဝှဲးနီးနဳၤ. (မၱာ်အမဲၤသ့ပွ့ၤအန့ၤဧါ, မၱာ်တဲၤ ဒဲလၱၢ်ဧါ, ယတသၱာ်ဟဲနီး. အသၱာ်ဟဲမၱာ်ကဘၱာ်စဲာ် တပွဲၤလီၤ.) 5ယကထါအံာ်ကီပၠၤအနဳၤတပွဲၤ နဳၤ, အကဘဲာ်ယနံၤခံနဳၤယကထါအံာ်ကီးအံာ် ယတဲၤသီယီၢ်ပီၢ်လၤတစီာ်လီၤ. 6ယကထါအံာ် မၤယန့ၤဒဳၣ်, ယတကဓူၤဘဲာ်နီး, ကမၱာ်ယဒီၣ်တဲၤ အဘဲာ်လီၢ်. ပရၤဆါယတထါအံာ်တပွဲးယန့ၤနီး. မၤနဲၢ်ဒဳၣ်, စာ်ဘိထဲၢ်ပၠၤတပွဲကတကမဳၤဓဳၤပီၢ်ယဲၤ ဒဳၣ်လံကၱာ် စစာ်ထၱးဘဲာ်ယတဲၤဖၱးတဲၤမဲၤ ကၱာ်သၱာ် ဟဲဘဲာ်ယတဲၤယၱၢ်ဘဲာ်တစီာ်နဳၤနီးအနံၤခံလီၤ.
7ဒဳယကဲာ်ထၱးဘဲာ်တဲၤဒဲလၱၢ်အစီးကျၱးအီၣ် အဲမဳၤအခဳးအစဲ, စာ်ဘိထဲၢ်ယကတပဲၢ်ထာ်ထိပီၢ် ယန့ၤနီးအနံၤခံနဳၤ, တဲၤအံာ်လၤနံၤကဲၤယဲၤတဲၤ ဆူးဒဳယဟၱးကျဲနဳၤတပျ့ၤ, မဳၤဒဲးလၱးအပွဲၤဇဳၤတ့ၤ, ပဳၤကဲၤယဲၤ, စာ်ဘိထဲၢ်ယကဆီတဘးယၱၢ်ဘဲာ် ထာ်ယၱၤသွံးနဳၤ. 8ဒဳတဲၤယဳၤအစဲယတၤမီၤကဘၱာ်စဲာ်သဳပျာ် ဒဳအကဖၱးကဲနံၤပီၢ်ယဲၤနဳၤ. 9မၱာ်စဒီၣ်ယဲၤ, “ယ လှူၣ်ယတါမၱာ်အဆိအံာ်ဆဲးအံာ်နနံၤခံ, ယခဳးယအါ မၱာ်အအီၣ်ဒဳၣ်ချဳဒဳတဲၤသီယီၢ်ပီၢ်လၤအပူၤနဳၤ.” မဲၤကနဳၤယတဲၤသီယီၢ်ပီၢ်လၤကမၱာ်ကီယတဲၤထါအံာ် အန့ၤစာ်ဘိထဲၢ်ခရၱာ်အခဳးအအါကအီၣ်ယခဳး. 10ကနဳၤအစဲယသးကနၢ်အံာ် တပွဲးဒဳယတဲၤသီယီၢ်ပီၢ်လၤအပူၤ, ပၠၤအတဲၤမဲၤ ယဳၤမဲၤနှါ, တဲၤထဳးတဲၤပၤအပူၤ, တဲၤလိၤမဲၤဆဲး ညဲအပူၤနဳၤဒဳခရၱာ်အနံၤခံလီၤ. မၤနဲၢ်ဒဳတဲၤသီယီၢ် ပီၢ်လၤအပူၤနဳၤယခဳးယအါအီၣ်.
စီၤပီလူးအတဲၤဘဲာ်ၡဳဘဲာ်မၤ
11ယယၱၢ်ဘဲာ်ကဲၤအစာ်ဘိအပျူၤတပွဲၤနဳၤ. မၱာ်သံနှးနဳၤနှးပဲၤကဲၤယဲၤအကမဲၤကနဳၤလီၤ. သံမၱာ် ပၠၤအသဓဳယဲၤတစီာ်နဳၤ. ယတမၱာ်နီၣ်သီပၠၤတမံနီး နှီနူၤ, ယတလၤတီၤဒဳၣ်လံတပွဲးအပျဲၢ်အဘီၣ်ဓဳၤတစီာ်နီး. 12ယဒဲလၱၢ်ထာ်ထဳသံလှီမီၢ်ထဲၢ်ယမၱာ်အပျဲၢ်အဘီၣ် အတၱၢ်အမှးတပွဲၤဒဳတဲၤစီးကျၱးကၱာ်တဲၤပီၤတဲၤပၤ အမဳအမဳၤ ဒဳတဲၤသဳးဇိၤသးဇိၤအပူၤထဳ. 13ဒဳၣ် လံကၱာ်တဲၤအီၣ်ပျဳာ်အလဝ့ၤတစီာ်နဳၤ, သံနံၤဘဲာ် တဲၤအယီၤလၤအီၣ်ပီၢ်တမဳၤမဳၤဧါ. ယတအံာ်သံတဲၤထဳးတဲၤပၤနီးတဘဲာ်နီးဧါ. အယဳၤအခဳး အစဲဘါပျဲးပီၢ်ယဲၤ.
14ယအီၣ်ပြးနှဲးအကလ့ၤထၱးသံသဳပျာ်တပျာ်ပ့ၤ, ကၱာ်ယတမၱာ်ဘဲာ်ပ့ၤသံနံၤခံတဲၤထဳးတဲၤ ပၤနီး, ယသးအဲးနံၤသံလီၤ, တဘဲာ်သံတဲၤထီတဲၤ လၤနီး. ဖဳးလံၤတစီာ်တပူးလၤဆီထာ်ဘဲာ်မဳၤပာ် အနံၤခံနီး, မၱာ်မဳၤပာ်တစီာ်ပူးလၤဆီထာ်ဘဲာ်ဖဳးလံၤ အနံၤခံတခီ. 15ယသးအဲးအံာ်လၤလဳသဳးလဳသး ယန့ၤကၱာ်တဲၤအရါအအီၣ်နံၤယဲၤနဳၤ. ယကဘဲာ် လီၢ်ဒဳၣ်ချဳသံဒဳၣ်, သံကဘဲာ်လီၢ်တကၱာ်ဖဳးယဲၤဧါ.
16ယတမၱာ်နီၣ်သီတဲၤထဳးတဲၤပၤ သံနံၤခံ နီးနှီနူၤ, ပၠၤတပွဲၤပွဲၤကဒီၣ်ယဲၤမၱာ် ပၠၤအလၱးမးကး ကွဲကၱာ်အလှီးနံၤကဲၤသံဒဳၣ်, 17ဒဳယတဲၤသဓဳ လ့ၤသံအီၣ်ပၠၤအပူၤ, ယလှီးပျဲးအၣ်ဘဲာ်ကဲၤသံဧါ. 18ယနှးနဳၤနှးပဲၤကဲၤစီၤတံတူး ကၱာ် ယသဓဳလ့ၤ ပျဳာ်ကဲၤယခီတပွဲၤဒဳသံအီၣ်နဳၤ. စီၤတံတူးကလှီး ပျဲးအၣ်ဇၤ သံဧါ. သံတသၱာ်ဟဲထဲၢ်စဲာ်ကၱာ်ယဲၤ, ဝၤသးလၤ ယံၢ်ပျဳာ်ကၱာ် ဝၤဟဲးကိာ် ကဲၤကျဲးတဘီ လီၤနဳၤနီးဧါ.
19သံကကမဳၤသရီဝၤကးဆဲးဝၢ်ဆဲးအံာ် ဝၤနဲၤသံလှီမီၢ် တယိၤယိလီလီၤမီၢ်. တဘဲာ်ကနဳၤ နီး. အစာ်ဘိခရၱာ်အတဲၤသးအဲးနံၤ အီၣ်အဓ့နဳၤ, ဝၤယၱၢ်ဘဲာ်ဒဳကဘၱာ်စဲာ်အလှီမီၢ်လီၤ. ဘဲာ်လီၢ်သံ, အဳသဲ ပူၤဝ့ၤတစီာ်, ဝၤမဲၤတဲၤလဳစါစဲးမၱာ်သံနံၤခံ တခီ. 20ယဘဲာ်ၡဳဘဲာ် မၤ မၱာ်ဘ့ယဓဳၤလ့ၤထၱးသံနဳၤ, ယကပာ်ထၱးသံအစာ်ဘိတဘဲာ်ယသး အဲးပာ်ထၱးနီး, ကၱာ်သံကပာ်ထၱးယဲၤအစာ်ဘိတဘဲာ်သံ သးအဲးပာ်ထၱး နီးနဳၤ. ယဘဲာ်ၡဳဒဳသံတဲၤထာ်ဓဳၤထာ် ရၤ, တဲၤသးကျးသးဆဲ, တဲၤသဲးထဲးဒီၣ်ဒဲ, တဲၤချီးတဲၤယဳၤ, တဲၤဒီၣ်မ့ၢ်ဆ့းပွဲး, တဲၤဇံၤဇီၤမီၤသဳ ကၱာ်တဲၤကသီကရီၤကအီၣ်ထာ်သံကျဲနဳၤလီၤ. 21ယဘဲာ်ၡဳဘဲာ်မၤမၱာ်ဘ့ယကဓဳၤလ့ၤထၱးသံ တပျာ်ဗ့နဳၤ, ကဘၱာ်စဲာ်ကမဲၤသါဝၢ်ယဲၤဒဳ တဲၤအဳး သဳးအဳးသးပၠၤအမဲၤဝှါတဲၤခီၣ်ဝဲၤဒဳ တဲၤစၱးပိးဇၱၢ် သဳ, တဲၤလၤသူးလၤကမဲာ် ကၱာ်တဲၤမှူးပီးထီးအၱး အကျဲ, အကတဆးလၤက့ၤအသးနီးတစီာ်အခဳး အစဲနဳၤလီၤမီၢ် ယကမဳၤဓဳၤ.
Currently Selected:
၂ ကရံၣ်သူး 12: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
