ဧဇရ 10
10
ဖေႏအွဉ်ႏထွူထိုꩻကတောႏလမ်းတွမ်ႏလိုꩻမျိုꩻလင်ဖုံႏ
1ဧဇရနဝ်ꩻ အုံအွပ်ꩻငွိုးကော့ꩻ ဆုတောင်ꩻတဲင် အဝ်ႏဝွန်ႏခံႏတောင်ꩻပြန်ႏ အပဲစ်ယိုဖုံႏ ဗိမာန်ႏတောႏကျောင်ꩻ ဆꩻငါကျာꩻနဝ်ꩻ ဣသရေး လိုꩻအာတစွိုꩻ လိုꩻခိုဖုံႏ လိုꩻမူႏဖုံႏစွဉ်ႏ လိုꩻပေႏဖုံႏနဝ်ꩻ စုဗူႏခူဝွေꩻတွော့ꩻ ငွိုးကော့ꩻ မွေးနေးစွဉ်ႏ ထာꩻဖုံႏနဝ်ꩻသွူ။ 2နဝ်ꩻထွူ ဧလံခွိုꩻနွယ်ႏ ယေဟေလပိုခို သျေခနိနဝ်ꩻ ဒေါ့ꩻဖေႏဧဇရ “ကယွုမ်းအံႏဒါႏ ဗွေႏဘုရာꩻနဝ်ꩻ နီယားကုဲင်အီစွဉ်ႏ ကတောႏလမ်းဒါႏ လိုꩻမူႏ ခမ်းလင်သားဖုံႏ၊ ကွဲႏတွော့ꩻ ထွာစွဉ်ႏနုဲင်းနဝ်ꩻတဲ့ ဣသရေး လိုꩻမျိုꩻဖုံႏတာႏ ထာꩻအဝ်ႏမောင်ꩻနဝ်ꩻ အဝ်ႏနေကနဝ်ꩻသွူ။ 3ယိုခါ နီနဝ်ꩻ လိုꩻမူႏစားယိုဖုံႏစွဉ်ႏ ဝွေꩻသီး အပိုဖုံႏနဝ်ꩻ နီအီႏပသာညာꩻထိုꩻကျောင်ꩻ နီတွိုင်ႏတယ်ႏ အွဉ်ႏဂတိ တွမ်ႏနီဗွေႏဘုရာꩻ နဝ်ꩻသွူ။ နီဗွေႏတွမ်ႏ လိုꩻလင် အကရိုႏသေႏဒါႏ နီဗွေႏ ပညတ်ကျမ်ꩻသား ကဖေႏကျံႏဒါႏ နီအတွိုင်ꩻနဝ်ꩻ နီအီႏမာꩻလွဉ်ꩻဒျာႏ နဝ်ꩻသွူ။ ဗွေႏဘုရာꩻ ပညတ်ကျမ်ꩻ ကထွန်ႏအတွိုင်ꩻနဝ်ꩻ နီအီႏမာꩻလွဉ်ꩻဒျာႏ နဝ်ꩻသွူ။ 4ကအီႏမာꩻ ထာꩻမာꩻယိုနဝ်ꩻ နီဗွေႏ ထူႏဖေႏဗဲင်း တာႏဝွန်ႏမွိုင်။ နီနဝ်ꩻ မာꩻလွဉ်ꩻဒျာႏ နီဗွေႏဆꩻချာ၊ နဝ်ꩻမꩻ မာꩻထွူထဲ့ရီး ဖေႏခန်းနဝ်ꩻမွိုင်” နုဲင်းနဝ်ꩻသွူ။
5နဝ်ꩻမꩻ ယဇ်ပရောဟိတ် ခေါင်းဆောင်ဖုံႏ၊ လေဝိ ခေါင်းဆောင်ဖုံႏစွဉ်ႏ ကအဝ်ႏကုဲင်ဒါႏ လိုꩻအမျာꩻ ခေါင်းဆောင် လိုꩻတန်ဖုံႏ ဂတိနဝ်ꩻ အီႏမာꩻလွဉ်ꩻ နုဲင်းသျေခနိ ကဖေႏကျံႏဒါႏ အတွိုင်ꩻနဝ်ꩻ ဧဇရ အွဉ်ႏမာꩻစစွဉ်ႏ ဂတိနဝ်ꩻသွူ။ 6နဝ်ꩻထွူ အဝ်ႏဗိမာန်ႏတောႏ ကျောင်ꩻဆꩻငါ ဝွေꩻထွိုင်ႏတွော့ꩻလွေꩻ ဧလျာသျိပ်ပိုခို ယောဟနန် အခန်ꩻကိုတဲင် ပွိုးသꩻပေႏသꩻကုဲင်ငါႏ လိုꩻကခံႏဗာႏ ဝါးထန်ႏထိုꩻ ခမ်းထီသားဖုံႏ သစ္စာႏဖေါက်နဝ်ꩻမꩻ အုံနဝ်ꩻကို တနာꩻသူႏတဲင် ဝွေꩻတအံႏအွꩻတဝ်း တမုဲင်ꩻမုဲင်ꩻနဝ်ꩻသွူ။
7လိုꩻကခံႏဗာႏ ဝါးထန်ႏထိုꩻ ခမ်းထီသားဖုံႏ ကသဲင်ꩻလွဉ်ချာသားဖုံႏ ကားကအဝ်ႏနဝ်ꩻ ဖေႏကလွဉ်စုဗူႏ မော့ꩻခွဲလို့ဝင်ꩻ ဝေင်ꩻယေရုသလမ်ႏ ကိုဖုံႏနဝ်ꩻ အွဉ်ႏကေႏညာႏစွဉ်ႏ သတင်ꩻ ဝေင်ꩻယေရုသလမ်ႏစွဉ်ႏ ယုဒ တခမ်းလွုမ်းနဝ်ꩻသွူ။ 8စွဉ်ႏခေါင်းဆောင် လိုꩻတန်ဖုံႏ အမိန်းတွော့ꩻ သွံနီꩻယံꩻတွင်ꩻ ပေါႏတလွဉ်စုဗူႏတဝ်းနဝ်ꩻ ဝွေꩻသီး ဥစ္စာႏထာꩻခြိုꩻဖုံႏ ကားကအဝ်ႏနဝ်ꩻ အီႏခံႏဗာႏ အသိမ်ꩻတဲင် ခံႏဗာႏ အပယ်ႏထန်ႏထိုꩻ ဝွေꩻသီး အစွုမ်ꩻစွိုꩻကို နဝ်ꩻသွူ။ 9သွံနီꩻယံꩻတွင်ꩻ၊ ကွတ်ꩻလာ အနီနီဆီကိုနဝ်ꩻ လိုꩻခိုကအုံသော့ꩻဒါႏ ယုဒခမ်းစွဉ်ႏ ဗေင်ယာမိန် ဟံႏနယ်ႏကို သားဖုံႏနဝ်ꩻ လွဉ်ဝေင်ꩻယေရုသလမ်ႏကိုတဲင် စုဗူႏစွဉ်ႏ ဗိမာန်ႏတောႏကျောင်ꩻ တလင်ꩻကိုနဝ်ꩻသွူ။ အချိန်ႏနဝ်ꩻ ခမ်းလော့တန် မွေးနေးစွဉ်ႏထာꩻ နဝ်ꩻသွူ။ ကွပ်ပွိုး ရာႏသီႏဥတုစွဉ်ႏ အရေꩻတန် ပွယ်ꩻအုံကွံနဝ်ꩻအတွက် လိုꩻစွုမ်ႏဖြာꩻနဝ်ꩻ ငမ်းသꩻတနွော့ꩻ နေးစွဉ်ႏဖုံႏနဝ်ꩻသွူ။
10ယဇ်ပရောဟိတ် ဧဇရနဝ်ꩻ အုံထွိုင်ႏတဲင် ဒေါ့ꩻဖေႏဝွေꩻသီး။ ဝွေꩻရိုꩻ “သီးဖုံႏနဝ်ꩻ သစ္စာႏအဲဉ်ထဝ်းဖုံႏ။ တောႏလမ်းစွဉ်ႏ ခမ်းလင်သားမူႏဖုံႏတွော့ꩻ အီလွဉ်အပဲစ်တဲင် အွဉ်ႏထဲ့လူး ဣသရေး လိုꩻမျိုꩻဖုံႏ အလောင်းနဝ်ꩻသွူ။ 11နဝ်ꩻမꩻယိုခါ သီအပဲစ်ဖုံႏနဝ်ꩻ ဝွန်ႏခံႏထေ့သွော့ ထာဝရဘုရာꩻ သီမွိုးဖြား ဖါဖြားသီး ဗွေႏဘုရာꩻထျꩻတဲင် မာꩻသွော့ နုဲင်းဝွေꩻဗွေႏ ကကျွိုက်နစ်သက် ဒါႏဖုံႏနဝ်ꩻဟုဲင်း။ သီနမ်းနဝ်ꩻ အုံဖခေါ်ထိုꩻခန်းသွော့ ခမ်းလင်သားဖုံႏ ကအဝ်ႏအုံငီꩻသော့ꩻဒါႏ နီခမ်းထီကိုနဝ်ꩻတဲင် ဖထိုꩻခန်းသီမာ ခမ်းလင်သားမူႏဖုံႏ နဝ်ꩻဟုဲင်း” နုဲင်းနဝ်ꩻသွူ။
12လိုꩻဖုံႏ ခြဝ်လဝ်းချာနေး “နုဲင်းနီဗွေႏ ကဒေါ့ꩻနဝ်ꩻ နီအီႏမာꩻလွဉ်ꩻလို့ဒျာႏ” နုဲင်းနဝ်ꩻသွူ။ 13ကွဲႏတွော့ꩻ ဝွေꩻသီး ဒေါ့ꩻထဲင်းယင်း “လိုꩻစွိုꩻနဝ်ꩻ အာငါႏလွဉ်ꩻထာꩻတဲင် ခမ်းတဲ့ အဝ်ႏလော့တန်ငါႏနဝ်ꩻသွူ။ ထာꩻပြင်ႏဟာႏကိုနဝ်ꩻ နီတအုံထွိုင်ႏ နွောင်ꩻတဝ်းဒွုမ် နုဲင်းယို။ ကွပ်ပွိုး နီကမာꩻဒါႏအပဲစ် နုဲင်းယိုနဝ်ꩻ အာငါႏနဝ်ꩻမꩻ အီႏဆောင်ႏရွက်လွေꩻ ကိစ္စယိုနဝ်ꩻ တနီꩻနီနီꩻတဲ့ တထွူနွောင်ꩻတဝ်း နဝ်ꩻသွူ။ 14အွဉ်ႏသွော့ နီအာႏဏာႏပဲင်ႏသားဖုံႏနဝ်ꩻ အုံကုဲင်သော့ꩻ ဝေင်ꩻယေရုသလမ်ႏကိုတဲင် အွဉ်ႏထူႏသွော့ တာႏဝွန်ႏ အမုကိစ္စယိုဟုဲင်း။ နဝ်ꩻထွူ ပါꩻမုဲင်ꩻတယဝ်း မာ ခမ်းလင်သားဖုံႏ မဉ်ႏအဝ်ႏတဲ့ ကခဉ်ꩻသေꩻခါꩻဒါႏ အချိန်ႏနဝ်ꩻ တွမ်ႏခေါင်းဆောင် လိုꩻတန်ဖုံႏ၊ စွဉ်ႏဝွေꩻသီး ဝေင်ꩻတောႏ တရာꩻလိုꩻတန်ဖုံႏလွဉ်တဲင် ဗွေႏဘုရာꩻ ထာꩻသꩻလျား ဖေႏကရောင်းနဝ်ꩻ အွဉ်ႏမာꩻသွော့ တွမ်ႏအနယ်ꩻယိုဟုဲင်း” နုဲင်းနဝ်ꩻသွူ။ 15ပေါႏလွိုသွူ မေသျုလံစွဉ်ႏ လေဝိစွိုးခွိုꩻတဖြာꩻ သျဗ္ဗေတဲ ကထောက်ခံႏဖေႏဒါႏ အာသဟေလပိုခို ယောနတန်စွဉ်ႏ တိကဝပိုခို ယဟာဇိနဝ်ꩻ၊ ပါꩻမုဲင်ꩻတဖြာꩻတဲ့ တကန်ႏကွက်တဝ်း အကျံႏနဝ်ꩻသွူ။
16အကျံႏဉာဏ်ႏနဝ်ꩻနဝ်ꩻ လိုꩻကခံႏဗာႏ ဝါးထန်ႏထိုꩻ ခမ်းထီသားဖုံႏနဝ်ꩻ လက်ခံႏနဝ်ꩻမꩻ ယဇ်ပရောဟိတ် ဧဇရနဝ်ꩻခန်ꩻစွဉ်ႏ ခွိုꩻနွယ်ႏ ခေါင်းဆောင်ကို လိုꩻခိုဖုံႏယင်ဟန်ႏ တဲမ်းမတ်သေꩻစွဉ်ႏ ဝွေꩻသီး အမဉ်ꩻဖုံႏနဝ်ꩻသွူ။ အလာတဆီ ပထမနီꩻကိုနဝ်ꩻ ဝွေꩻသီး စုံႏစမ်ꩻစစွဉ်ႏ နဝ်ꩻသွူ။ 17နဝ်ꩻမꩻ ဝွေꩻသီး ကစုံႏစမ်ꩻထွားဒါႏ လိုꩻခိုတွမ်ႏ အမာ ခမ်းလင်သားမူႏဖုံႏ အမုနဝ်ꩻ သွံလာအတွင်ꩻ ထွူလို့စွဉ်ႏနဝ်ꩻသွူ။
လိုꩻခိုကလꩻဒါႏမာခမ်းလင်သားမူႏဖုံႏ
18လိုꩻခိုကလꩻဒါႏမာ ခမ်းလင်သားမူႏဖုံႏ မဉ်ꩻစရင်ꩻနဝ်ꩻ နုဲင်းယိုသွူ။
ယဇ်ပရေဟိတ်ခွိုꩻနွယ်ႏဖုံႏမဉ်ꩻစရင်ꩻ
ယောသျုခွိုꩻနွယ်ႏစွဉ်ႏ ဝွေꩻဖူးခိုဖုံႏ၊ ယောဇဒဲက်ပိုခိုဖုံႏနဝ်ꩻ ကထွာဒါႏ မာသေယ၊ အဲလိအာသာ၊ ယာရိပ်စွဉ်ႏ ဂေဒလိသီး နဝ်ꩻသွူ။ 19ဝွေꩻသီးအွဉ်ႏဂတိ အီႏအွဉ်ႏကုဲင် ဝွေꩻသီး အမာဖုံႏတဲင် ဝွေꩻသီးအပဲစ်တာႏ နုဲင်းယဇ်ထာꩻပူႏဇောႏအနေႏ ဝွေꩻသီးပူႏဇောႏ သွိုꩻတဗာႏနဝ်ꩻသွူ။
20ဣမေရခွိုꩻနွယ်ႏကိုနဝ်ꩻ ဟာနာနိစွဉ်ႏ ဇေဗဒိ။
21ဟာရိမ်ခွိုꩻနွယ်ႏကိုနဝ်ꩻ မာသေယ၊ ဧလိယ၊ သျေမာယ၊ ယေဟေလစွဉ်ႏ ဩဇိယ။
22ပါသျုရခွိုꩻနွယ်ႏကိုနဝ်ꩻ ဧလိဩနဲ၊ မာသေယ၊ ဣသျမေလ၊ နာတနေလ၊ ယောဇဗဒ်စွဉ်ႏ ဧလာသ။
23လေဝိခွိုꩻနွယ်ႏဖုံႏနဝ်ꩻ၊
ယောဇဗဒ်၊ သျိမိ၊ ကေလယ (ကဟဲ့ꩻဒါႏကေလိတ)၊ ပေတဟိ၊ ယုဒတွမ်ႏ အဲလိအာသာ။
24အဒုံႏအအူအနု ပညာႏသားဖုံႏနဝ်ꩻ၊
ဧလျာသျိပ်၊
ဗိမာန်ႏတောႏကျောင်ꩻပွေါစဲ့ꩻသားဖုံႏနဝ်ꩻ၊
သျလ္လုံ၊ တေလိမ်စွဉ်ႏ ဥရိ။ 25လိုꩻအလင်ဖုံႏနဝ်ꩻ၊
ပါရုတ်ခွိုꩻနွယ်ႏကိုနဝ်ꩻ ရာမိ၊ ယေဇိ၊ မာလခိယ၊ မိယာမိန်၊ ဧလျာသာ၊ မာလခိစွဉ်ႏ ဗေနာယ၊၊
26ဧလံခွိုꩻနွယ်ႏကိုနဝ်ꩻ မတ္တနိ၊ ဇာခရိ၊ ယေဟေလ၊ အာဗဒိ၊ ယေရိမုတ်စွဉ်ႏ ဧလိယ။
27ဇတ္တုခွိုꩻနွယ်ႏကိုနဝ်ꩻ ဧလိဩနဲ၊ ဧလျာသျိပ်၊ မတ္တနိ၊ ယေရိမုတ်၊ ဇာဗဒ်စွဉ်ႏ အာဇိဇ။
28ဗေဗဲခွိုꩻနွယ်ႏကိုနဝ်ꩻ ယောဟနန်၊ ဟာနာနိ၊ ဇဗ္ဗဲစွဉ်ႏ အာသလဲ။
29ဗာနိခွိုꩻနွယ်ႏကိုနဝ်ꩻ မေသျုလံ၊ မလ္လုတ်၊ အဒါယ၊ ယိုဗတ်၊ သျာလစွဉ်ႏ ယေရိမုတ်။
30ပါဟတ်မောအပ်ခွိုꩻနွယ်ႏကိုနဝ်ꩻ အဒန၊ ခေလာလ၊ ဗေနာယ၊ မာသေယ၊ မတ္တနိ၊ ဗေသလေ၊ ဗိန္နိစွဉ်ႏ မနာသျေ။
31-32ဟာရိမ်ခွိုꩻနွယ်ႏကိုနဝ်ꩻ အဲလိအာသာ၊ ဣသျိယ၊ မာလခိယ၊ သျေမာယ၊ သိမောင်၊ ဗေင်ယာမိန်၊ မလ္လုတ်စွဉ်ႏ သျမရိ။
33ဟာသျုန်ခွိုꩻနွယ်ႏကိုနဝ်ꩻ မတ္တနဲ၊ မတ္တတ၊ ဇာဗဒ်၊ ဧလိဖလဲက်၊ ယေရမဲ၊ မနာသျေစွဉ်ႏ သျိမိ။
34-37ဗာနိခွိုꩻနွယ်ႏကိုနဝ်ꩻ မာဒဲ၊ အာမရံ၊ ဝေလ၊ ဗေနာယ၊ ပေဒိ၊ ခေလုဟိ၊ ဝါနိ၊ မေရိမုတ်၊ ဧလျာသျိပ်၊ မတ္တနဲစွဉ်ႏ ယာသု။
38-42ဗိန္နိခွိုꩻနွယ်ႏကိုနဝ်ꩻ သျိမိ၊ သျေလမိ၊ နာတန်၊ အဒါယ၊ မာခနဒေဗဲ၊ သျာသျဲ၊ သျာရဲ၊ အဇရေလ၊ သျေလမိ၊ သျမရိ၊ သျလ္လုံ၊ အာမရိစွဉ်ႏ ယောသပ်။
43နေဗောခွိုꩻနွယ်ႏကိုနဝ်ꩻ ယေလ၊ မတ္တိတိ၊ ဇာဗဒ်၊ ဇေဗိန၊ ယာဒေါ၊ ယောလစွဉ်ႏ ဗေနာယ။
44လိုꩻခိုစားယိုဖုံႏ ကားကအဝ်ႏနဝ်ꩻ အမာ ခမ်းလင်သားမူႏဖုံႏ အဝ်ႏနဝ်ꩻသွူ။ ဝွေꩻသီးနဝ်ꩻ အွဉ်ႏကုဲင်ထိုꩻလို့စွဉ်ႏ အမာဖုံႏတဲင် အမာဖုံႏစွဉ်ႏ ဝွေꩻသီး အပိုဖုံႏနဝ်ꩻ ပသာညာꩻထိုꩻလို့စွဉ်ႏ နဝ်ꩻသွူ။
Currently Selected:
ဧဇရ 10: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
