نامَه رومِه کلیسا را 1
1
1پولُسه طرف نه، مسیحْ عیسی نوکر،
که رسالته را دعوت بییَه و خدا انجیله را وقف بییَه؛ 2هَ انجیلی که خدا پرانتر، اِشتن پیغَمبران واسطه نه، چَوه وعدش مقدّسه نیوشته هانک آدییش به، 3چَوه زار درباره، که جسمه مطابق داوود پادشاه نسلک دنیا بامه، 4روح قدوسییت مطابق، اِشتن زنده آبییننه مردان دلک، قوتک اعلام ببه که خدا زا اِسه، یانی چاما خداوند عیسی مسیح. 5خدا مسیح واسطنه آماش فیض آدا تا چوه رسولان ببام و همهی قومان راهنمایی بکرام که مسیحه نامه ایمان بوعرنده و اَوک اطاعت بکرنده. 6و اِم شاما کین نی اِسه، که دعوت بییِران تا عیسی مسیح کین بِبا؛
7همهی کسانی که رومِه شهرک اِسنده، که خدا اَواننه خشه و دعوت بیینده تا مقدّسانک بیبینده:
فیض و سلامتی چاما په، خدا و عیسی مسیح خداونده طرفنه، شاما را بیبی.
پولس رومه شینه را ذوق داره
8اولاً که، چِمن خدا، عیسی مسیح واسطه نه، شاما همان واسنه شکر کرم، چون که شاما ایمانه خبر همهی دنیاک اَپیچسه. 9چون خدایی که اَوه، چِمن تمام دل و جاننه، چَوه زا انجیله کارک خِدمَت کَرِم، چِمن شاهده که چُنجوره اُوزون چِمن دعاهانک شاما ویر آورِم 10و اُوزون چِمن دعاهانک آخازم که اگم خدا بِگَشه آخِر سر بایم شاما ویندنه را. 11چون ذوق دارم شاما بینم تا روحانیه برکتان شاما ایمانه تقویته را آدیم شاما؛ 12یانی اِم که آما هندیگره ایمانک دلگِرم ببام هم شاما هم از. 13ای براران، نِگَمه بیخبر ببا که چندین سفر رایم به که بایم شاما وَر، امّا هر سفر ای چی ای پیش بامه. رایمه که شاما دلَک نی کملی ای محصول بودورنم، اَجوره زه که الباقی غیریهودیان دلَکم بودورنی.
14از اِشتن هم یونانیان و هم بَربَران، هم دانا آدمان و هم نادانه آدمان مدیون زانم. 15ایزه نی، پِر مشتاقم که انجیله شاما را که رومه دلک زندگی کرا، اعلام بکرم.
16چون از انجیلک عار ندارم، چِمه واسنه که انجیل، هر کسی نجاته را که ایمان بوعره، خدا قوت اِسه، اوّل یهود و چاوش غیر یهود. 17چون انجیلک، اَ صالح بیینی که خداکِه، دیار آبی، که اول نه تا آخر، ایمانه سر پا برجایه. اَجوره که حَبَقوقه پیغمبره کتابک نویشته بییه: «صالحه آدم ایمان نه زندگی کَره.»
خدا غضب، گناهکار آدمان را
18چون خدا غضب آسماننه هر جوره بی خدایی و آدمان ناراستی سر آیه که اِشتن ناراستی نه حقیقته از بین برنده. 19چون اَ چی که خداک بی آزانسن چوان را دیار اِسته، چون خدا اَوِش چَوان را دیار کرده. 20چون خدا اَ صفاتی که نیبی ویندن، یانی چوه ابدیه قدرت و چوه ذات الهی، دنیا خلق بیینه صفته نه، اَ چییانی دله که رچ آبییه بنده، آچق وینده بی. پس اَوه دَ هیچ بهانه ای ندارنده.
21چون هر چند خداشان آزانس، اما اَوشان خدا شوار احترام ننا و شکرشان نکرده، بَلکم اِشتن فکرانک هیچه چییان گرفتار ببنده و چَوان نفهمه دلان توریکی بکتشه. 22هر چند که اِدعاشان کردرده حکیمنده، امّا احمق ببنده 23اَوان ابدیه خدا جلالشان بتانی نه که فانیه آدم و پرندهان و حیوانان و خزندهان آشسنده عوضشان آکرده.
24پس خدا نی اَوانش، چَوان دلان شهوتانک ناپاکی نه بَشته، تا اِشتن دلَک اِشتن بدنه بی حرمت بکرنده. 25چون اَوان اَ حقیقتی که خدا درباره اِسه، دوری نه اِورنیشانه و مخلوقشان خالقه یاگا پرستش و خِدمَت بکه، خالقی که گه تا ابد اَوه پرستش کردن. آمین.
26چِمه واسنه خدا نی اَوانش، چوان شرمآوره شهوتانک بَشتِه. چون چَوان زَلییه، طبیعیه رابطشان غیرطبیعیه رابطِنَه عوضشان بکه. 27و اِنجوره نی مردکه طبیعیه رابطه زلیانه، دستشان اَکته، و هندیگره شهوته آتشه دلَک بوسوتنده. مردک، مردک نه شرم آوره کارش بکه، و اِشتن بده کاران مکافاتشان بینده.
28و اَگاردنه که خدا آزانسن چَوان را ارزشی نداشتشه، خدا نی اَوش چَوان فاسده فکرانک بَشته تا اَ کاری که گه انجام مَدینده، انجام بدینده. 29اَوه هر جوره نادرستی، شرارت، طمع و بد خواهی نه فِتنده. اَوه هر جوره پخیلتی، قتل، دعوا، وازی و بدخواهی نه فِتنده. اَوِه پشت سر لاوَه کرار، 30تهمت زَن، خدا دشمن، پر رو، مغرورندِه و منم منم دارنده. شرورانه کاران انجام دیینه را، تازه راههانی رچ آکرنده. اِشتن پییر مارک فرمان نبرنده، 31نفهم، بیوفا، بیعاطفه و بیرحمند. 32با اِم که خدا عادلانه حکمه زاننده که هر کسی ایزنه کاران بکره چَوه مکافات مرگ اِسه، نه فقط اَوه اِشتن اَ کاران انجام دَینده، بلکم کسانی نی که اَ کاران انجام دینده، تایید کرنده.
Currently Selected:
نامَه رومِه کلیسا را 1: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company