اعمال رسولان 28
28
مالته جزیره
1وختی سلامتینه آرسسمان ساحل، بزانسمانه اَ جزیره نام مالت اِسه. 2اَ جزیره آدمه آمانه پر مهربان بنده. اَوان چاما راشان آتش روشون آکه، چون واران وارسَرده و هوا سرد بِه و آما شان گرمینه قبول بکرده. 3پولُس نی کملی ای ایزم بوعردِشه و وختی اَ ایزمش اَنیرده آتشه سر، آتش اُولوعه واسنه، ایگله ماری آتشه دلنه برآمه و آچکِسه پولسه دسه. 4اَ جزیره آدمه وختی بیندشانه که ماره پولسه دس نه آکرسا، هندیگرنه باتشانه: «بیشک اِم مرد آدمه کوشه که هر چند دریاکش نجات پیدا بکه، عدالت نرزه اَو زنده بمانه.» 5پولُس مارشه درندا آتشه دله و هیچیش نِبه. 6مردم انتظارشان داشته چَه بدن بپندمه یا اِم که ایرادن جیگینه و بمَره. امّا پِر منتظر بیینه پش، وختی بیندشانه هیچیش نِبه، چوان فکر دِگردس و باتشانه اَ ایگله خدایانک اِسه.
7اَ نزدیکیک زمینانی بِه که جزیره رئیسه کین به که چَوه نام پوبلیوس به. اَ آماش دعوت بکه اِشتن کییه و سُه روج گرمینه آماکش پذیرایی بِکَه. 8ازقضا، پوبلیوس پِه مریض به و یاگا دِگن بِه و تب و اسهالش داشته. پولُس بشه چوه وَر و دوُعاش بکه، چوه سرکش دس اَناه و اَوش شفا بدا. 9اِم اتفاقه پَش، علوده مریضانی که جزیرک بنده، آمییردنده و شفا شان اَرکترده. 10اَوان آماشان پر اِحترام بنا، و وختی آماده بیردمان بشام، هر چیمان که احتیاج داشته چاما راشان تهیه بکرده.
پولس آرسه به روم
11سُه ماه اِوردن پَش، اَ کشتیای نه که زمستانه را جزیرک وندرسه بیا، بیشمان دریا را. اَ کشتی اسکندریک بیا و ”دو پِیکَره“ نشانش داشته. 12آما آرسسمان سیراکوزه شهر، لنگرمان درند و سُه روج اَگا بندرسمان. 13چاوش دریایه سفرمان ادامه بدا و آرسسمان ریگیون شهر. صباینه روج، جنوبی باهاد بِهِشت، و پشرایی روج، آما آرسسمان پوتِیولی شهر. 14اَگارک چند گله برامان بینده که آماشان دعوت بکه ای هفته اَوان نه بندرام. آخر سر آرسسمان رومه شهر. 15وقتی اَگاره براره اَشنوسَشَان بِه که آما راکمان، بامنده تا آپیوسه بازار و ایگله آبادی که چَه نام «سُه میخانه» اِسه، چاما پیشواز بامنده. پولُس اَوش بیندنده خداش شکر بکه و چوه دلِه قوّت بکتِه. 16وختی آرسسمان روم، پولُسشان اجازه آدا تا ایگله سرباز محافظ نه اِشتن کییک بمانه.
پولُس رومک
17سُه روجه پَش، پولُس یهودیان پیله ترش داد بکردنده اِشتن ور. وختی بیدا آبنده، اَواننه باتشه: «ای براران، هر چند از، چِمن قومه ضد و یا چاما اجداده رسم و رسوماته ضد، کاریم کرده نِبه، منشان اورشلیمک دستگیر بکردم و رومیانشان آدا. 18وقتی اَوه منکشان بازجویی بکرده رایشان به من آزاد بکرنده، چون منکشان جرمی نیوینده که چوه سزا مرگ بیبی. 19امّا چون یهودیان اعتراضشان بکرده، ناچار بِبِم امپراطوریک دادخواهی بکرم، البته نه چِمه واسنه که چِمن قومک شکایت بکرم. 20چِمه واسنه رایم به شاما بینم و شامانه لاوَه بکرم، چون خدا قومه اَ، امیده واسنه اِسته که منشان اِم قول و زنجیرک دِوَستِم.»
21اَوان پولسه نه باتشانه: «آما هیچ نامهای یهودیه نه اِشته درباره دریافت نِکَردمانه، و هیچ کامین از برارانی که اَگارنه آمیینده، اِشته درباره هیچ بده چی ای نواتشانه و خبری آوردشان نییه. 22ولی رایمان به اِشته نظره بشنوام، چون زانسرام که مردم هر یاگاک اِم فرقه ضد لاوَه کرنده.»
23پس ای روج شان انتخاب بکرده و پِره جماعتی بامنده پولسه کییه تا اَوه بیننده. اَ تولیصیبینه تا شو، خدا پادشاهی درباره اَواننش لاوَه بکرده و تقلاش بکه که موسی تورات و پیغمبران کتابان نه، عیسی درباره اَوان قانع بکره. 24بعضی چوه لاوَه نه قانع ببنده، امّا الباقی ایمانشان ناورده. 25پس ایزه که هندیگرنه جرّ و بحثشان کردرده، اَ گارنه بِشنده. امّا پیش اِز اِم که اَگاردنه بیشینده، پولُس اِشتن آخرین لاوش بکردنده و اَوه باته: «خدا مقدسه روح چِه درست شاما اجداده نه لاوش بکه، اَدمی که اِشعیای پیغمبره واسطنه باتشه:
26«”بشه اِم قومه ور و باجه،
’ حقیقتا شاما گوشانه اَشنوا، امّا هرگز نِفَهما؛
حقیقتا شاما چشمانه وینا، ولی هرگز درک نکرا.‘
27چون اِم قومه دلَه سِگ آبیا؛
چَوان گوشه سنگین آبینده،
و اِشتن چشمشان دِوَسَنده،
مبادا اِشتن چشماننه بیننده،
و اِشتن گوشاننه بشنَونده،
و اِشتن دلانک بفهمنده،
و آگردنده و از اَوان شفا بدیم.“
28«پس بِزانا که خدا نجات غیریهودیان وَر خرسانسه بییه و اَوه گوش آدینده!» 29بعد از اِم که پولس اِمش باته، یهودیان هندیگرنه بد جوری جر و بحثشان بکرده و اَگارنه بشنده.
30پولُس دو سال تمان اِشتن کییک که کرایش کرده به بندرس و هر کسی آمییرده چَوه وَر، قبولش کردرده. 31پولس خدا پادشاهیش اعلام کَردردِه و جراتنه و بیدون اِم که کسی چوه پَرانه بیگیره عیسی مسیح خداوند درباره تعلیمش آدیرده.
Currently Selected:
اعمال رسولان 28: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company