اعمال رسولان 23
23
1پولُس شورا اعضا دییشته و باتشه: «براران، از تا اُوری پاکه وجدانی نه خدا پرانک زندگیم کرده.» 2وختی اِمش باته، کاهن اعظم، حَنانیا، کسانی نه که پولُس وَرک وِندرسه بنده نه، دستورش بدا تا پولس گره دله بزننده. 3چاوش پولُس اَونه باتشه: «خدا ته بزنه، اهای سیبی آبییه دیوار! ته اَ تختِه سرک نِشتش تا مطابق شریعت من محاکمه بکری، ولی تِه خلافه شریعت، دستور دییری من بزننده؟»
4کسانی که پولُس نزدیکیک وِندرسه بنده، باتشانه: «ته خدا کاهنه اعظمه بی احترامی کردری؟»
5پولُسه باته: «ای براران، نِزانسردمه که کاهن اعظم اِسه؛ چون تورات کتابک نویشته بییه: ”اِشته قومه رهبر نه بَد مواج.“
6چاوش پولُس که زانسِشه بعضی از اَوان صَدّوقی فرقه علماک و بعضی فَریسی فرقه علماک اِسنده، بلنده صَصنه شوراک باتشه: «ای براران، از فَریسی و فریسی زاده اِسم، و چِمه واسنه محاکمه بییَرم که مردان زنده آبیینه امید دارم.» 7وختی پولس اِمش باته، فَریسییان فرقه و صَدّوقیان فرقه میانک جرّ و بحث دِگس و جماعت دو دسته ببنده، 8چون که صَدّوقیه واجنده، نه مردان زنده آبیین و نه فرشته و نه روحه وجود ندارنده، ولی فَریسیه همهی اِمان اعتقاد دارنده.
9ایزه پیله بَلبشویی بر پا ببه! بعضی توراته معلمین که فَریسی فرقک بِنده، بهشتنده و اعتراض کرار باتشانه: «اِم مردکک هیچ خطایی نیویندرام. کاردنه معلوم که ایگله روح یا ایگله فرشتهای اَونه لاوش کرده مَبی.» 10دعوا ایزه کفا بِکَتشه که فرمانده بترسِس مبادا پولُسه تیکه تیکه بکرنده. پس سربازِش دستور بدانده بِیشینده جیر و پولسه چَوان چنگک برآورنده، ببرنده قلعه دله.
11هَ شَوک، خداوند پولُسه وَرک بِندَرس و باتشه: «اِشته دلَه قرص بیبیه! اَجورَه که زه اورشلیمک چِمَه را شهادت بداره، رومک نی گَه شهادت بدیی.»
پولس قتله توطئه
12وقتی روج آبه، یهودیان هندیگرنه توطئه شان بکه، قسمشان بِخه تا پولُسه مَکوشنده، نه چی ای بخرنده و نه چی ای آخرنده. 13اِم توطئک چهل نفرک نی پرتر دسشان داشته. 14اَوه بشنده سران کاهنان و شیخان وَر و باتشانه: «آما قسممان خرده که تا پولُسه مَکوشام، هیچی مَخرام. 15پس اِسا شاما و شورا اعضا رومه فرماندک آخازا اَوه بوعره شاما وَر، اِم بهانه نه که رایرانه دقیقتر چَوه درباره تحقیق بِکَراه. آما آماده اِسمان پیش از اِم که اَ آرسه یا، اَوه بوکوشام.»
16پولُسه خوعره زا اِم توطئک باخبر ببه و بِشه قلعه دِله، پولُسش خبر دار بکه.
17پولُس ایگله افسرانش داد بکه و باتشه: «اِم جوانه بِبَه فرمانده وَر، چون ایگله لاویی داره اَونه باجه.» 18پس افسر اَوش ببه فرمانده وَر و اَونه باتشه: «زندانیه پولُس مَنش داد بکردم و مَنک آخاشتشه اِم جوانه بوعرم شاما ور؛ رایشه چی ای شاما نه باجه.»
19فرمانده، اَ جوانه مردکه دسش بکته، اَوش ببه کناری را و خلوتکی آپرسسشه: «چِه رایره مَنه باجی؟»
20پولسه خوعره زا اَونه باتشه: «یهودیان همدس بییَنده شاماک آخازنده که صَبا پولُسه بوعرا شورا وَر، اِم بهانه نه که رایشانه دقیق تر چَوه درباره تحقیق بکرنده. 21ولی مرزه اَوه اِم کاره را تِه قانع بکرنده، چون چهل نفرک نی پرتر اَوانک، پولسه کمینک نشتنده. اَوان قسم خَرده تا اَوه مَکوشنده، نه چی ای بِخرنده و نه چی ای آخرنده. اِسا آمادنده، و فقط منتظرنده تا شاما چوان درخواسته قبول بِکَراه.»
22پس فرمانده، اَ جوانش بخرسانس و اَوش قدغن بکه، باتشه: «هیچکسی نه مَواج که اِم چیانک منر خبر آدا.»
پولُسه بَردن به قیصریه
23پس فرمانده دو نفر اِشتن افسرانکش داد بکه و اَوانه باتشه: «دویست نفر پیاده سرباز، هفتاد نفر سواره سرباز و دویست نفر نیزهدار، حاضر بِکَراه تا شَوه ساعت نُه را، بیشینده قیصریه شهرک. 24پولُسه را نی ایگله اسبی حاضر بِکَراه و اَوه صحیح و سالم فِلیکس والی تحویل بدَیا.»
25ایگله نامه ای نی ایزه بینیویشتشِه:
26«کْلودیوس لیسیاسی طرفنه
به عالیجناب فِلیکْس والی:
سلام بر شاما،
27یهودییان اِم مردکشان کَته، رایشان به اَوه بوکوشنده، امّا از چِمن سربازان نه بیشِم، اَوم نجات بدا، چون اَشنوسم به رومه شهروند اِسه. 28رایم به بزانم چییه واسنه اَوه اتهام زییَرنده، پس اَوم ببه چَوان شوار وَر. 29بزانسمه که چوان تُیمت چوان شریعته کین اِسه و چَوه جرم ایینده پِر نییه که چوه سزا مرگ یا زندان بیبی. 30چاوش وختی خبردار ببِم که چوه ضد توطئه شان کرده، البحل اَوم بخرسانس شاما ور. چوه شاکیان نه نی دستورم دییه تا شکایتی که اَوک دارنده، بوعرنده شاما وَر.»
31ایزه، سربازه طبق دستور، شوانه پولُسشان اِشتن نه ببه تا آنتیپاتْریس شهره را. 32صباینه روج، پیاده سربازه آگردسنده قلعه طرف و فقط سواره سربازه پولسه همراه ببنده. 33وقتی سواره سربازه آرسسنده قیصریه شهره را، اَ نامه شان تحویل آدا والی و پولُسشان ببه چوه وَر. 34والی نامَش بخوانده و پولُسکش آپرسس کامین ایالته کین اِسته. وختی بزانسشه که کیلیکیه منطقه کینه، 35اَونه باتشه: «وختی اِشته شاکییه آرَسسنده اِنگا، اِشته لاوان گوش آدیم.» چاوش دستورش بدا تا هیرودیسه کاخه دلَک پولسه زیر نظر بیگیرنده.
Currently Selected:
اعمال رسولان 23: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company