اعمال رسولان 24
24
پولس محاکمه فِلیکْس وَرِک
1پنج روجه پَش، کاهن اعظم، حَنانیا، و چند نفر از شیخان نه و ایگله وکیل نه که چَه نام تِرتولُس به بامنده قیصریه شهره را. اَوان اِشتن شکایتشان پولُسه ضد ببرده والی وَر. 2وختی والی، پولُسش احضار بکرده، تِرتولُس، پولسش فِلیکس ورک انجوره متهمش بکه و باتشه: «عالیجناب فِلیکس، چون پر مدت اِسه که شاما سادیمه جیرک، صلح و آرامش دارام و اِشته پیش بینی باعث بییه اِم قومه وضع چاکتر بیبی، 3چِمن وظیفه زانِم هر یاگا و هر وقتک، شاماک قدر دانی بکرم. 4امّا چِمه واسنه که شاما وقته پرتر مَگیرم، خواهش کرام که لطف بکری و چاما لاوَه بشنوی.
5«چاما را ثابت بییه که اِم مردک، فتنه گر اِسه، شخصی اِسته که تمانِ دنیا یهودیان دلَک شورش به پاش کرده. ایزه نی فرقه ناصری سر دَسته هانک اِسه. 6اَ، حتی تقلاش کردرده که معبده بیحرمت بکره؛ ولی اما اَومان بکته. و رایمان به مطابق چاما شریعت، اَوه محاکمه بکرام 7امّا فرمانده لیسیاس بامه و زورنه اَوش چاما دسک برآوده بر، 8و چَوه شاکیانش دستور بدا تا بایِنده شاما ور. اِسا، اگم شاما اِشتن اَوک بازجویی بِکَرا، هر چی که اَوه متهم کرام، چوان حقیقت شاما را آشکار بی.»
9یهودییان نی ای صدا همهی اِم چییانشان تایید کردرده.
10وختی والی پولُسه راش اشاره بکه که لاوَه بکره، پولسه ایزه جواو بدا: «زانسرم که تِه پره سالانی اِسه که اِم قومه داوری کردری؛ پس خوشحالینه اِشتنک دفاع کرم. 11شاما اِشتن تانا تحقیق بِکَراه و بزانا که اَدمی نه که از پرستشه را بیشِم اورشلیم تا اِسا، دونزده روج پرتر اِورده نییه، 12و اِم مدتک، کسی منش وینده نییِم که معبدک کسی نه جرّ و بحث بکرم یا اِم که مردمه دلک بلوایی به پا بکرم چه معبدک، چه عبادتگاهانک یا شهره دِلک. 13اَوه نتاننده اتهاماتی که من زیرنده، ثابت بکرنده. 14امّا شاما وَرک اعتراف کَرم که طبق طریقت که اِمِه، اَوه ایگله فرقه زاننده، چِمن اجداده خدا پرستش کَرم و هر چی نی که توراتک و پیغَمبران کتابک نویشته بییه، اعتقاد دارم. 15از نی چِمان شوار خدا امید دارم و اعتقاد دارم که چاکه آدمان و بده آدمان را قیامته روزی اِسه. درست اِم آدمان شوار که قبول دارنده. 16چِمه واسنه، برک تقلا کرم تا خدا و مردمه وَرک پاکه وجداننه زندگی بکرم.
17«اِسا از چن ساله پَش، بیشِم اورشلیم تا چِمن قومه نیازمندان را صدقه هانی ببرم و قربانی بکرم. 18ایزه که اِم کارم کردرده، تطهیره آدابه انجام دیینه پَش، منشان معبدک بیندم. نه جماعتی به و نه بلوایی به. 19ولی اَگارک چند گله یهودی آسیا ایالتک آمییه بنده که گسه اِنگا شاما پرانک حاضر بیبینده تا اگم چِمن ضد شکایتی دارنده، باجنده. 20و یا اِم که کسانی که انگا اِسنده، باجنده وختی شورا پرانک وِندرسه بِم، چه جرمی شان منک بینده، 21چِمه غیراز که چوان دِلَک بلنده صَص نه باتِمه: ”مردان زنده آبینه واسنه اِسه که اُوری شاما پَرانک محاکمه بییرم.“»
22اما فِلیکْس والی که طریقتش چاک زانسه، اَ محاکمش دِرنده عَلوده زمانی را و باتشه: «هر موقع که فرمانده لیسیاس بایه، اَدمی شاما شکایته را تصمیمی گیرم.» 23چاوش اَفسرینه که مسئول به دستورش بدا تا پولُسه زیر نظر بیگیره، ولی کملی آزادیی نی اَوش آدا و چَوه هیچکامین رفقان پرانش نکته که چوه احتیاجان برطرف بکرنده.
24چند روجه پَش، فِلیکْس اِشتن زنر نه، دْروسیلا نه که یهودی بییا، بامه و بخرسانسشه پولُسه پَشه، اَ پولسه لاوَش که درباره ایمان به عیسی مسیحه به، گوشش بدا. 25وختی پولُس صالح بیینک، پرهیزگاری و آینده داوریک لاوش کردرده، فِلیکْس پِر بِتَرسس و باتشه: «اِسا تانی بیشی. ایگله علوده فرصتی که هنی ته داد کرم بایی یا.» 26چِمه غیراز، امیدش داشته که پولُس اَوه رشوهای آدَیه. چِمه واسنه، چند را اَوش احضار بکرده و اَونه لاوش بکه.
27دُ سال که اِوردشه، پورکیوس فِستوس، فِلیکْسه جانشین ببه. ولی فِلیکْس، چِمه واسنه که یهودیان سَرک مِنّت بنیه، پولُسش اَجوره زندانک نیا بداشته.
Currently Selected:
اعمال رسولان 24: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company