اعمال رسولان 15
15
اورشلیمه شورا
1امّا چن نفر یهودیه منطقه نه بامنده اَنطاکیه شهر. اَوان براران شان تعلیم آدیَرده و واتردشانه که: «اگم مطابق موسی پیغمبر رسم ختنه مبا، نتانا نجاته بینا.» 2وختی پولُس و بَرنابا اَوانه مخالفت و بحثشان بکرده، ایزه شان نی قرار بِنا که اَ دو نفر چند نفر ایماندارنه بیشینده اورشلیمه شهره را و اِم جریانه رسولان و شیخان نه در میان بنینده. 3پس کلیسا اَوانش رایی بکردنده؛ و وقتی اَوه فینیقیه و سامِره نه اِوردردنده، جزئیاتنه تعریف شان بکرده که چنجوره غیریهودیان ایمان شان بوعرده و همه‌ی براره اِم خبرک پِر خوشحال آبنده. 4وختی آرسسنده اورشلیم، کلیسا و رسولان و شیخان، گرمینه چوان پران برشنده. پولُس و برنابا هر چی که خدا چوان واسطۀ نه انجامش دیه به، چَوان را باتشانه. 5ولی بعضی از فَریسی فرقه علما که ایمانشان آورده به، بِهشتنده، باتشانه: «واجبه که غیریهودییه ختنه بیبینده و اَوانشان دستور بدا که موسی شریعته نیا بدارنده.»
6پس رسولان و شیخه بیدا آبنده تا اِم قضیه بررسی بکرنده. 7پر بحث کردنه پَش، آخر سر پِطرُس بِهِشت و اَواننه باتشه: «ای براران، شاما زانسرا که اوّلین روجانک، خدا شاما دلَنه منش انتخاب بکردم تا غیریهودیه چِمن زوانک انجیله پیغامه بَشنونده و ایمان بوعرنده. 8و خدایی که مردمه دلِک خبر داره چَوان را گواهیش آدیه که خدا مقدسه روحه اَوانش ببخشس، درست اَجوره زَ که آماش نی ببخشس. 9خدا چاما و چَوان میانک هیچ فرقی شی ننا، بلکم ایمانه واسنه، چَوان دلِش پاک بکرده. 10پس اِسا چیه را خدا آزمایش کردرا و شاگردان گردنک یو ای اَنییَرا که نه آما تانام اَوه حمل بکرام، نه چاما اجداد؟ 11ولی آما ایمان دارام که عیسی خداونده فیضک اِسه که آما نجاتمان وینده، اَجوره که اَوان نی نجات شان وینده.»
12چاوش جماعتْ همه ساکت ببنده و برنابا و پولُسه لاوشان گوش آدا. اَوان علامت و مجزاتی که خدا چَوان واسطنه غیریهودیان دلَک انجامش دیه به، هنی واتردشانه. 13وختی که چوان لاوَان اُجردنده، یعقوب باتشه: «ای براران، چِمن لاوان گوش آدَیا! 14شَمعونه پطرس باتِشه که چُنجوره خدا اوّلین را غیریهودیانش لطف کرده، و چوان دلَک اِشتن نامه را ایگله قومی انتخابش کرده. 15اِم پیغمبران لاونه مطابق اِسه، ایزه که نویشته بییه:
16«”چِمه پَش، آگردم
و داوود پادشا خیمۀ که جیگیسا هنی رَچ آکرم؛
هَنی چَوه ویرانه‌هان آباد کَرم،
و اَوه چَه اَوله شوار رَچ آکرم،
17تا اَوه ای که آدمان نسلک بجا ماندَنده،
و همه‌ی غیر یهودیانی که چِمن نام چوان سرکه، خداونده پشه بگردنده.
خداوند واجه، خداوندی که،
18اِم چییش قَدیم نه دیار کردنده.“
19«پس چِمن حکم اِمه، کسانی که غیریهودیانک خدا طرف آگردنده، زحمت مدیام. 20امّا گه ایگله نامه‌ای کی اَوانک آخازام خوراکی که بُتان را قربانی بیه، زناک، آتارسه بییَه حیوانان گوشتک و خونِک دوری بکرنده. 21چون قَدیم نه موسی هر شهری دلَک کسانی شی داشته که چوه شریعتشان اعلام کرده، ایزه که هر هفته مقدسه شنبه روجک، چَه نوشته‌شان عبادتگاهانک خواندِه.»
شورا نامه غیریهودیه ایمان داران را
22پس رسولان و شیخان، همه کلیسا نه تصمیمشان بِکَتِه اِشتن دلَک مردکانی انتخاب بکرنده و اَوان پولُس و بَرنابا همراه بخرساننده اَنطاکیه شهره را. پس یهودای معروف به بَرسابا و سیلاس که براران دلَک رهبر بنده، انتخاب شان بکه. 23چاوش ایگله نامه ای چوان دستنه بخرسانسشانه، که نیویشته بییَه به:
«چاما طرفنه که شاما برارمان، رسولان و شیخان طرفنه،
غیریهودییه برارانی را که اَنطاکیَک، سوریَه و کیلیکیَه کِنده،
سلام!
24اَشنوِسَمانه که کسانی چاما میانک، بی اِم که دستوری آماک بدارنده، آمیینده و شاماشان، اِشتن لاوان نه ناراحت کرده، و باعث بینده شاما فکر پریشان بیبی. 25چِمه واسنه آما ای دل ایزه صلاح بیندمانه که مردکانی انتخاب بکرام و اَوان، بَرنابا و پولُسه همراه، که چاما عزیزنده، بِخرسانام شاما وَر، 26اَ مردکانی همراه که چاما خداوند عیسی مسیحه نامه واسنه، اِشتن جانشان دسه سر اَنییَه. 27پس یهودا و سیلاس مان خرسانسنده تا اِشتن لاواننه، شاما اِم کارانک خبر دار بکرنده. 28خدا مقدسه روح و آما ایزه صلاح بیندمانه که شاما دوشِک باری مَنیام، غیر از اِم چییه که واجبنده 29خوراکی که بُتان را قربانی بیه و خونک و آتارسه بییه حیوانان گوشتک و زناک دوری بِکرا . اَگم اِمانک دوری بِکَرا، چاکه کاری کرا. ساق ببا.»
30پس اَوان رایی ببنده، بشنده اَنطاکیه شهره را و اَگارک کلیسا آدمشان بیدا آکتنده، و نامه شان آراسانس. 31وختی که اَوان نامه شان بخوانده، اَ دل گرم کرارَه پیغامک شاد آبنده. 32یهودا و سیلاس نی که پیغمبر بنده، پر لاوَاننه، برارانشان تشویق بکردنده و قوتشان آدا. 33یهودا و سیلاس چند وقت اَگارک بندرسنده، و چاوش براران، اَوان شان ساقینه بخرسانسنده تا آگردنده اِشتن خرساناران وَر. 34امّا پولُس و برنابا اَنطاکیَک بندرسنده. 35اَوان علوده ایمانداران همراه خداونده کلامه تعلیم دییَنه و اعلام کردنه مشغول بنده.
پولُس و برنابا میانه اختلاف دگس
36چند وقت بعد، پولُس، برنابا نه باتشه: «آگردام شهرهانی را که خداونده کلاممان اَگارک اعلام کرده، و براران ویندنِه را بشام تا بینام چه حال و اوضاعی دارنده.» 37برنابا رایش به یوحنایی که معروف به مَرقُس به نی چَوان همراه بیشی، 38امّا پولُسه صلاح نیوینده کسی که پامفیلیَک اَوانش تینا بَشته و اِشتن همکاریش ادامه دییَه نبه، اِشتن نه ببره. 39اَگارک پولس و برنابا میانک بدجوری اختلاف دگس، ایزه که هندیگرک جدا آبنده. برنابا، مَرقُسش اَکَتِه و دریا را نه بِشه قپرس؛ 40امّا پولُس، سیلاسش اَکته و براران نه دسش آدا، خداونده فیض نه بشه سفره را. 41وقتی پولس، سوریه و کیلیکیک اِوردرده، اَگاره کلیساهانش تقویت کردرده.
@ 2024 Korpu Company