اعمال رسولان 16
16
تیموتائوس، پولُس و سیلاسه همراهی کره
1پولُس بشه دِربِه و لِستْره شهران را. اَگارک ایگله شاگردی زندگیش کرده که چَه نام تیموتائوس به که چوه ما یهودی و ایماندار بیا، امّا چوه پِه یونانی بِه. 2لِستْره و قونیک براران چَه چاکیشان واترده. 3چون پولس رایش به تیموتائوس سَفرک چَوه همراه بیبی، یهودیانی واسنه که اَ ناحیک زندگی شان کرده، اَوش ختنه بکه، چون که همه زانسَردشانه چَه پِه یونانیه. 4وقتی اَوه اِم شهر نه شییردنده اَ شهره را، اَ قانونانی که رسولان و شیخان اورشلیمک نییشان به، مردمنه واتردشانه تا اَوان انجام بدینده. 5پس، کلیساهان ایمانک قوتشان بکته و هر روج چَوان تعداد پِر بیرده.
پولُس مقدونی یه مردکی رویاک وینه
6چاوش، اَوان تمانِ فْریجیه و غَلاطیه منطقه اِم سر تا اَ سرک اِوردنده، چون خدا مقدسه روح اجازش آندا اَوان خدا کلامه آسیا ایالت آرساننده. 7وختی آرَسسنده میسیَه منطقه، تقلاشان بکه بیشینده بیطینیه ایالت، امّا عیسی روح، اَوانش اجازه آندا. 8چِمه واسنه، میسیَه منطقک اِوردنده و بِشنده تْروآسِه شهره را. 9شَوه را، پولُس رؤیاک بیندشه که ایگله مقدونیه مردکی چَوه پرانک پا وندرسه، اَوش مندت کردره که «بوره مقدونیه و آما کمک بِکه.» 10وختی پولس اِم رؤیاش بینده، البحل بیشمان مقدونیه، چون مطمئن بمان که خدا آماش داد کرده تا انجیله شاده خبره آدَیام اَوان.
لیدیه، ایمان آوردن
11پس، تْروآس نه کشتی نه دوز بشمان ساموتْراکی جزیره را، و صباینه روج آرسسمان نیاپولیس شهره را. 12اَگاردنه بشمان فیلیپی که ایگله اَ شهرانک به که رومییان اَگارک زندگی شان کردرده و مقدونیه خاکه دلَه به، و چند روجی اَ شهرک بماندمان.
13مقدسه شنبه روجک، شهر نه بیشمان بر و بیشِمان رباره وَر، اِم فکرنه که اَگارک یاگایی دعا کردنه را اِسه. بِنشتمان و زلیانی نه که اَگارک بیدا آبیه بنده نه، لاومان بکه. 14چوان دلَک ایگله خداپرست زلی ای، تیاتیرا شهرک بیا که چاما لاوَش گوش آدیَرده. چَوه نام لیدیه به و اَرغوانیه پارچش خُورته که پر گران به. خداوند چَوه دلشه آکردا تا پولُس پیغامه گوش آدییه. 15وختی لیدیه اِشتن خانواده نه غسل تعمیدشان بکته، اصرارشان بکه و آمانه باتشه: «اگم باور کردرانه که خداوندم ایمان آورده، بایا و چِمن کییک بندرا.» آخِر سَر چَوه گوسه تسلیم ببمان.
پولُس و سیلاس زندانک
16ای را که شیردمان یاگایی که اَگامان دعا کرده، ایگله کنیزی بیندمانه که ایگله روحش داشته که تانسشه اَونه غیب نه باجیه. اَوَه فالگیری نه اِشتن اربابانش پِره سود آراساندرده. 17اَوَه، پولُس پشَه و چاما پشَه را دگسیه و جرنه واتشِه: «اِم مردکه، خدای متعاله خدمتگذار اِسنده و نجاته راه شاما را اعلام کرنده.» 18اَوَه، پر روجان اِم کارش کَرده. آخر سر پولُسه صبر اُوجرس و آگردس و اَ روح نه که اَ کنیزه دِلَک به باتشه: «عیسی مسیح نامنه ته دستور دییم که اِم کیلیک برآیی بر!» هَ لحظه، روح اَ کیلیک بَرامه.
19ولی اَ کنیزه اربابه وختی بیندشانه چوان کاسبی برباد شییَه، پولُس و سیلاس شان بِکَتِه و اَوانشان کرانسن کرانسن ببردنده شهره میدان دلَه رئیسان ور. 20پس اَوانشان بوعردنده قاضیان ور، باتشانه: «اِم مردکه یهودینده و چاما شهرشان به آشوب کشسه. 21اَوه رسم و رسوماتی تبلیغ کرنده که چَه قبول کردن و انجام دیین، آما را که رومی اِسمان جایز نییه.»
22جماعت نی پولُس و سیلاس سر حمله شان بکرده و اَوانه هم دس ببنده. و قاضییان نی دستورشان بدا چوان خلوعان برآورنده، و اَوان چوعنه بزننده. 23وختی اَوانشان پر چو بیزینده، اَوانشان درندنده زندان دله و زندانبان شان دستور بدا بَرک چوان ویراجین بیبی. 24وقتی زندانبان اِم دستورش اَرکته، اَوانش درندنده زندان دلَه و چوان پاچَش داره کُندانک زنجیرنه دِوَستنده.
فیلیپیه زندان بان ایمان آوَره
25شوه نصفه را، پولُس و سیلاس دعا مشغول بِنده و سرودخواندننه خدا شان پرستش کَردرده و عَلوده زندانیان نی اَوان گوش آدیرده 26که ایرادَن یَکه دیمه لرزه ای بامه، اَجوره که همهي زندانک لرزه دگس و البحل زندانه بَره آبنده و همهی زنجیره آبنده. 27زندانبان بهشته، و ایزه که زندانه آواجه بَرش بیندنده، شمشیرش برآورد تا اِشتن بوکوشه، چون فکرش کردرده که زندانیه دوشتنده. 28امّا پولُس بلنده صَصنه، باتشه: «اِشتن صدمه مَزن که آما همه یاریمان!» 29زندانبان چیروعش آخاشته و هویل و ولانه بشه زندان دله و ایزه که ترسک لرزسرده پولُس و سیلاس پا دگس. 30چاوش، اَوش بَرآوردنده بر و آپرسسشه: «آقایان، چه بِکرم تا نجات بینم؟»
31پولس و سیلاس جواوشان بدا: «عیسی مسیح خداونده ایمان بوعر که ته و اِشته خانواده نجات پیدا کرا.» 32اَدمی پولس و سیلاس خداونده کلام شان چَه را و همهی کسانی که چَه کییک بنده را، باتشانه. 33شوه هَ ساعتک، زندانبان اَوانش اَکَتنده، چوان زخمش بوشوسنده، و البحل اَو و چَه خانواده همه غسل تعمیدشان بِکَته. 34زندان بان، اَوِش ببردنده اِشتن کییه و چوان را سفرهای جیکردشه. اَ و چَوه خانواده چِمه واسنه که خدا شان ایمان آورده به پر شاد بِنده.
35ولی وختی روج ببه، قاضیان مأمورانی بخرسانسشانه زندانبان وَر و باتشانه: «اَ مردکان آزاد بِکه!» 36زندانبان پولُسش اِم پیغامک خبر دار بکه و باتشه: «قاضییان دستور دییَه که شاما آزاد بکرم. پس اِسا بایا بر و ساقینه بِشا.»
37امّا پولُس چَه جواوک باتشه: «آما که رومیه شهروند اِسمان بدون محاکمه، هَمان پرانک آماشان چوع بیزی و درندشانه زندانک. اِسا گَشانه نوینکی آما آزاد بکرنده؟ نه نیببی! بدا اِشتن باینده و آما اِنگارنه بَرآورنده بر.»
38مأموران اِمشان قاضییان نه باتشانه، و اَوان وختی بَشنوِسِشانه که پولُس و سیلاس رومی اِسند، پر بترسسنده 39پس بامنده، اَوانکشان معذرت آخاشته و تا زندانه بر اَوِشان همراهی بکرده، خواهش شان بکه که شهر نه بیشینده. 40پولس و سیلاس زنداننه برامیینه پَش، بشنده لیدیه کییه. اَگارک برارشان بیندنده، اَوان شان تشویق بکردنده. چاوش اَگاردنه بِشنده.
Currently Selected:
اعمال رسولان 16: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company