اعمال رسولان 14
14
پولُس و برنابا قونیک
1قونیه شهرک نی پولُس و برنابا بِشنده یهودیان عبادتگاه و ایزه لاوشان بکه که پِر کسه یهودیانک و یونانیانک ایمانشان بوعرده. 2امّا یهودیانی که ایمانشان آورده نِبه، غیریهودیان شان جوکو بیزی و چوان فکرشان براران ضد مسموم بکرده. 3پس پولُس و برنابا طولانیه مدتی اَگارک بندرسنده و جراتنه خداونده درباره لاوشان بکه، خداوندی که اَوانش قدرت آدِسه تا علامت و معجزان انجام بدینده و ایزه، اِشتن فیض بخشه پیغامش تأیید کَرده. 4ولی اَ شهره مردم دو دَسته آبنده؛ ای گروهی یهودیان طرفدار بنده و اَدرین گروه رسولان طرفدار. 5وختی غیریهودیان و یهودیان اِشتن پیله ترانک آخاشتشانه که پولُس و برنابا نه بدرفتاری بکرنده، و اَوان سِگددار بکرنده، 6پولس و برنابا اِم ماجراک خبر دار ببنده، و دِوَشتنده لِستْره و دِربِه، که لیکائونیه دویروبره شهرانک به، 7و اَگارک خدا شاده خبرشان اعلام بکرده.
پولُس و برنابا لِستْرهک
8لِستْرک مردکی نِشته بِه که نِتانسردشه اِشتن پاچه هان بِلوانه و هرگز مِته نبه، چون مادرزاد شَل به. 9وقتی که پولُسه لاوَه کردرده، اَ شله مردکه گوش آدیَرده. پولُس چَه چشمان دییشته و بیندشه که ایمان داره شفا بیگیره. 10پولس بلنده صَصنه اَونه باتشه: «اِشته پاچه هان سر پابنده!» اَ مردک اِشتن یاگاک بهشته و بِمته.
11وختی مردم اَ چی ای که پولُس انجام بداشه بیندشانه، لیکائونی زُواننه جرشان بکرده: «خدایان آدمه شوار آمیینده جیر چاما وَر!» 12اَوان برنابا نامشان ’زِئوس‘ اَنا و پولُسه نامشان ’هِرمِس‘ اَنا چون اِصلیه لاوَه کر پولس بِه. 13زئوس کاهن که چَه معبد دوز شهره دروازه بَرِک به، چند گله گو و چند گله تاجه گُلش بوعرده شهره دروازه ور؛ اَو و جماعت رایشان به که چَوان را قربانی بکرنده.
14امّا وختی اَ دو گله رسول، یانی برنابا و پولُس، اِم کفرشان بَشنوسش، اِشتن خلوعان یخَشان اَوزارنس و جماعت دلنه بیرویتنده، جرشان کردرده که: 15«ای مردکان، چیه را ایزه کردرا؟ آما نی شاما شوار، انسان مان. آما شاما شاده خبر آدیام که اِم بیخودیه کارانک دس اَگیرا و زنده خدا ایمان بوعرا که آسمان و زمین و دریا و هر چی که چَوان دلکه، خلقش کرده. 16گذشتک خدا همهی غیر یهودیه قومان نسلان اِشتن حالک بشتنده تا هر کامین بِیشینده اِشتن راهان، 17با اِم حال اَ اِشتنش بی شهادت نَشته؛ اَو، آسمانک واران وارنِسنِنه و پُر باره فصلان بخشسننه، شاما را چاکیش بکرده، پِر خوراک شاماش آدا و شاما دلان شادینه فت آکردشه.» 18اَوه حتی اِم لاوانه نی، چتین بتانسشانه مردمه پَرانه بیگیرنده که قربانی مَکرنده.
19امّا یهودیانی که اَنطاکیه و قونیه نه آمییه بنده و مردمشان اِشتن نه همدس کرده به، پولُس شان سِگ ددار بکرده و خیال شان بکه که پولس مرده، اَوشان شهرنه برکرده بر. 20امّا وختی شاگرده پولسه دویره بیدا آبنده، پولس بِهِشته و آگردس شهره را. صباینه روج، پولس و برنابا بِشنده دِربِه شهره را.
21اَوان اَ شهرک نی خدا شاد خبرشان اعلام بکردشانه و پر کسانشان نی عیسی شاگرد بکرده. چاوش آگردسنده لِستْره و قونیه و اَنطاکیه. 22اَ شهرانک شاگردان جانشان قوت بداه و اَوانشان تشویق بکردنده که اِشتن ایمانک بندرنده و اَوانشان نصیحت بکردنده که «گه پر سختیان توع بوعرام تا بِشام خدا پادشاهی دِله.» 23اَوان هر کلیساک ایمان داران سرک شیخانی بناشانه و دعا و روجه نه اَوانشان درسماردنده خداونده دس که اَوشان ایمان آورده به.
24چاوش پیسیدیه منطقک اِوردنده و بِشنده پامفیلیه منطقه، 25اَوان پِرجک خدا کلامشان تعلیم بدا، و اَگارنه بامنده آتّالیه بِندره را.
26آتّالیه نه کَشتی نه آگردسنده اَنطاکیه، اَ یاگایی که ایمان داران پولس و برنابا شان درسمادره به خدا فیضه دس تا ه کاری انجام بدینده که اِسا انجام دییشان به. 27وختی پولس و برنابا آرَسسنده اَگا، کلیسا آدمشان بیدا آکتنده، چوان را باتشانه که خدا چنجوره چَوان واسطنه چِه کارانیشی کرده و چُنجوره، ایمانه بَرش غیریهودیان را آکرده. 28و پِر مدتی اَگارک شاگردان نه بماندنده.
Currently Selected:
اعمال رسولان 14: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company