اعمال رسولان 11
11
پِطرُس کلیسا را گزارش دیه
1رسولان و براران تمانِ یهودیه منطقک بَشنوِسِشانه که غیریهودیان نی خدا کلامشان قبول کرده. 2پس وختی پِطرُس آگردس اورشلیمه شهره را، اَ گروهی که ختنه بیینه رسم شان قبول داشته پطرسکشان ایراد بکته و باتشانه: 3«ته، بیشِش کسانی کییه که ختنه بییَه نینده و اَوان نه هَمسِفرَه بییش.»
4ولی پِطرُس همهی ماجراش صفتنه تا آخر چوان را تعریفش بکرده، باتشه: 5«از یافا شهرک، دعام کردرده که خلسه حالتک ایگله رؤیایی بیندمه ای چی ای یکه سفرهای شوار که چهار گوشه نه آکرسا، آسماننه بامیا جیر و آرَسسا من. 6وختی چاک اَوه دییَشتم، اهلیه حیوانان و وحشیه حیوانان و خزندگان و پرندان، اَ سفره سرک بیندمه. 7چاوَش صصی چِمن گوش آرسس که واتردشه: ”پِطرُس، بِیض، سر آبر و بِخَه.“
8«ولی از جوابم بدا: ”اَصلا، خداوندا، چون از هرگز حرامه چی یا نجسه چی لِو زییم نییه.“
9«دوّمین را آسمان نه صصی بامه که ”اَ چی ای که خدا پاک رچش کرده، ته اَوه نجس مَزان.“ 10و اِم اتفاق سُه را تکرار ببه؛ چاوش همهی اَ چیه برده ببه کفا آسمانه را.
11«هَ لحظک، سُه نفر که قیصریه شهر نه خرسانسه بییه بنده چِمن ور، آرسسنده کییهای که از اَگارک بِم. 12خدا روح منه باتشه که چوان همراه بیشیم و فرقی مَنییم. اِم شش گله برار نی منه بامنده، و آما بشمان اَ مردکه کییه. 13اَ چاما را تعریفش بکه که چُنجوره اِشتن کییکش ایگله فرشتَش وینده که اَونه واتشه: ”چن نفره بخرسان یافا شهر تا شَمعون معروف به پِطرُسه بوعرنده اِنگا. 14اَ، اِشته را ایگله پیغامی آوره که چوه واسطه نه ته و اِشته خانواده همبلنه نجات اَرَگیرا.“
15«وختی شروعم بکه لاوَه کردن، خدا مقدسه روح چوان سرک قرارش بکته، درست اَجوره زه که اوّل چاما سرک قرارش بکته. 16اَدمی خداونده لاوم ویر بوعرده که واتش به: ”یحیی اُو نه غسل تعمید آدسشه ولی شاما، خدا مقدسه روحنه تعمید گیرا.“ 17پس اگم خدا اَوانش نی هَ هدیه ای آداشه که آماش اَدمی آدییَش بِه که عیسی مسیح خداوندمان ایمان آورده به، از کی بیبیم که بِگَمه خدا کاره پَرانه بیگیرم؟»
18وختی اِم لاوَشان بشنوسنده، ساکت ببنده و خداشان جلال بدا، باتشانه: «پس خدا غیریهودیان نی فرصت آدَیه تا اَوه نی اِشتن گناهانک توبه بکرنده و اَبدیه زندگی بدارنده!»
اَنطاکیه کلیسا
19اَ ایمان دارانی که اِستیفانه اذیت آزار کردنه پَش پخش و پلا بییَه بِنده، تا فینیقیه و قپرس و اَنطاکیه سفرشان بِکَرده. اَوان خدا کلام شان فقط یهودیان را اعلام کَرده و بس. 20امّا چَوان دلَک چند نفر قپرس و قیرَوان اهالیک بِنده. اَوان وختی آرسسنده اَنطاکیه، یونانیان نه نی لاوشان بکرده و عیسای خداونده شاد خبرشان اَوان آداشانه. 21خداونده دس نی اَواننه بِه و پِر کسه ایمانشان بوعرده و خداونده سمت آگردسنده.
22وختی اِم خبر آرسس اورشلیمه کلیسا، بَرنابا شان بخرسانس اَنطاکیه. 23وختی بَرنابا آرسس اَگا و خدا فیضش بینده، شاد آبه و همش تشویق بکردنده تا تمان جان و دل نه خداونده وفادار بیبینده، 24چون بَرنابا چاکه مردکی به و خدا مقدس روحنه و ایماننه فت به. چِمه واسنه پِره جماعتی خداوند شان ایمان بوعرده.
25پس، برنابا بشه تارسوسه شهره را تا شائوله پیدا بکره. 26و وختی شائولش پیدا بکه، اَوِش بوعرده اَنطاکیه. اَوه اَگارک ای سال تمام کلیسا آدمان نه بیدا آبسنده و ایگله پِره جماعتی شان تعلیم آدسه. اَنطاکیک بِه که اوّلین را عیسی شاگردان نه ’مسیحی‘ باتشانه.
27اَ روجانک چند گله پیغمبر اورشلیم نه بامنده اَنطاکیه. 28ای نفر اَوانک که چَه نام آگابوس به، بِهِشته و خدا روح الهام نه پیشگوییش بکرده که تمام دنیاک چتینه قحطی آیِه. اِم قَحطی، کِلودیوس امپراتوری حکومته دورک اتفاق دگسِه. 29پَس شاگرده تصمیمشان بکته که هر کامین هر چنده که تاننده، برارانی را که یهودیه منطقک بنده، کمک بخرساننده. 30پس ایزشان بکه و اَ کمکانی که بیداشان آکرده به آداشانه بَرنابا و شائوله، تا آرساننده شیخان دس.
Currently Selected:
اعمال رسولان 11: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company