اعمال رسولان 12
12
یعقوبه کوشتن
1اَ زمانک، هیرودیسِ پادشاه چند نفرش اذیت و آزار بکرده که کلیسا اعضاک بنده. 2هیرودیسه دستورنه، یعقوب که یوحنا بِرا به شمشیرنه بوکوشتشانه. 3و وختی بیندِشه اِم کار یهودیان خَوشحال کره، پِطرُسشین دستگیر بکرده. اِم ماجرا یهودیان فطیره عیده موقع اتفاق دِگس. 4هیرودیس پِطرُسه دستگیر کردنه پَش، اَوش دِرنده زندان و چهار گروه چهار نفری بناشه چَوه نگهبانی دییَنه را. و رایش به که پِسَخه عیده پَش، هَمهی مردمه پرانک پطرسه محاکمه بکره.
5پس پِطرُس شان زندانک نیا بداشته، امّا کلیسا پطرسه را یکسره خدا وَرِک دعاشان کَردرده.
6ای شَو، پیش از اَ روجی که هیرودیس رایش بِه پِطرُسه محاکمه بکره، پطرسشان دو گله زنجیرینه دِوستَه به و دو گله سربازان میانک خُته به، و نگهبانان نی زندانه بره پرانک کیشَک دیَرده. 7ایرادَن خداونده ایگله فرشتۀ ظاهر آبه و ایگله نوری زندان دلگ سوش بیزی. فرشته پِطرُس تککش بیزی و اَوش بیزانس، باتشه: «البحل بیض!» ه لحظک زنجیره چَه دسانک آبنده و جیگیسنده جیر.
8فرشته پطرسنه باتشه: «اِشته کمره دِوَند و اِشته پاقابه دِکَه.» پِطرُسه نی ایزه بکه. چاوَش فرشته اَونه باتشه: «اِشته اَبا اِشته دویرک اَپیج و بوره چِمن پشَه.» 9پِطرُس چَوه پَشه زندان نه بَر بِشه. پطرس باورش نکردرده که اَ چی ای که فرشته انجام دییَر، واقعیه، بلکم خیالش کَردرده رؤیا ویندر. 10اَوان اوّلی و دوّمیه نگهبانانک اِوردنده و آرسسنده آهنیه دروازه وَر که شهره رو به روک آبسِه. دروازه اِشتن را چوان پَرانک آبییا. اَوه بَرشنده بَر و وختی آرسسنده تنگه آخِر، ایرادَن فرشته غیب آبه.
11چاوش پِطرُس اِشتن حال بامه و باتشه: «اِسا دَ مطمئنم که خداوند اِشتن فرشتش خرسانسه و منش هیرودیسه چنگک و همه ی اَ اذیت و آزاری که یهوده قوم توقع شان داشته چِمن سر بایه، نجاتش دییِم.»
12پطرس وختی اِمش بزانس، بِشه مریمه کییه که یوحنا معروف به مَرقُسه ما بییا. اَگارک پر کسه بیدا آبیه بِنده و دعاشان کَردرده. 13وختی پِطرُس کییه بَرش بوکوس، ایگله کنیزی که چوه نام رُودا، به بامیا تا بَره آکریه. 14وختی پِطرُسه صصش آزانس، شادیک، بیدون اِم که بره آکریه، البحل دیشیا کییه دله و باتشه: «پِطرُس بَره پشتک وِندَرسه!»
15اَوِنه باتشانه: «دلو بییش؟» امّا وختی کنیزه اصرارشان بینده، باتشانه: «لابُد چَوه فرشتۀ اِسه.»
16هِم هایباسک، وقتی پِطرُس زَ ایزه بَرش کوسرده. آخر سر، وختی برشان آکرده، پطرسه وینَدَنِک حیران ببنده. 17پِطرُس اِشتن دسه ایشاره نه، اَوش ساکت بکردنده و تعریفش بکه که چُنجوره خداوند اَوش زندان نه نجات دییه. و باتشه: «یعقوب و علوده براران اِم جریانک خبر دار بکرا.» چاوش اَواننه بِشه علوده یاگایی.
18وقتی روج آبه، سربازان دلَک غوغایی ببه، چون نزانسردشانه پِطرُسه سر چِه آمییه. 19هیرودیسه دستور بدا همه یاگا پِطرُسه پَشه بگردنده؛ وختی اَوشان نیوینده نگهبانِش بازجویی بکردنده و چوان کوشتنه حکمش آدا. چاوَش پطرس یهودیه منطقه نه بِشه قیصریه شهره را و ای مدت اَگا بندرس.
هیرودیسه مَردن
20هیرودیس، صور و صیدونه شهران مردمه را عصبانی آبه. چِمِه واسنه که اَ دو گله شهره مردم هندیگرنه بشنده چَوه ور و اجازه آخاشتشانه تا هیرودیسه بیننده. اَوه بلاستوسی که پادشاه خدمتکار به شان راضی بکرده تا بیشینده هیرودیسه نه آشتی بکرنده، چون که چَوان غذا و مایحتاج هیرودیسه مملکته نه تهیه بییرده.
21اَ روجک که قرارشان نییه به، هیرودیس اِشتن پادشاهیه اَباش دِکرده، تخته سرک بنشته و جماعته راش سخنرانی بکرده. 22مردم جرشان کردرده: «اِم ایگله خدایان صصه، نه آدمه صص!» 23البحل، خداونده ایگله فرشته هیرودیسش بیزی، چِمه واسنه که خداش جلال دییه نبه. اَدمی کرم چَه جانش بخه و اَ بِمرد.
24امّا خدا کلام پرتر و پرتر پران شییَرده و پخش آبییَرده.
25بَرنابا و شائول اِشتن مأموریت شان تمام آکه، اورشلیم نه آگردسنده و یوحنایی که معروف به مَرقُس بِه، نی اِشتن نه بوعردشانه.
Currently Selected:
اعمال رسولان 12: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company