نامه فیلیپیان ره 2
2
مسيحِ فروتنی جا سرمشق گیفتن
1پس اَگه مسيحِ درون ديلگرمی دَرید، اَگه اونِ محبت شیمی تسلی باعث به، اَگه خُدا روحِ درون رفاقت دَریدی، اَگه مهربانی و دیلسوجی نَئه، 2هم رأی بودن امرا، هه محبت امرا، یکدیلی و هم نظر بوستن امرا می شادیَ کاملَ کونید. 3هی كاریَ مَنم مَنم و چشم و هم چشمی جا نُكونيد، بلكی فروتنی اَمرا ديگرانَ شیمی جا بختر بدانيد. 4هیتا جه شُمان فقط خو منفعتِ فکر نَبه، بلکی بقیه ئانِ فکرم بِبه. 5هو فكرانیَ بداريد كی مسيحْ عيسی داشتی:
6اونكی، هرچن خُدا اَمرا هم شکل بو،
خُدا امرا برابریَ دو دَسی نچسبسته،
7بلكی خودشَ خالی بُكود،
نوکرِ شکلَ به خودَش بیگیفت،
آدمانِ مانستن بُبوست.
8و چونکی آدمانِ شکل مانستن بُبوست،
خورَه فروتن بُكود
و مَردن ره،
حتی صليب سر مَردَن ره
فرمانبر بُبوست.
9پس خُدا اونَ خَیلی بُجور بَبرد
و ایتا نام بجورتر جه تمان نام ئان اونَ ببخشه،
10تا عیسی نامِ اَمرا هر زانویی خمَ به
آسمان درون، زمين سر و زمينِ جیر،
11و هر زوانی اقرار بُكونه كی عيسی مسيحْ ’خُداوندِ‘
خُدای پئرِ جلال واسی.
نور دُنیا درون
12پس ای عزيزان، هُطویی كی هميشک فرمانبر بید، هسّا، نه فقط می جُلو، بلكی خَیلی ويشتر، می نَبودِ درون، خودتانِ نجات ره بایستی ترس و لرز اَمرا عمل بُکونید، 13چون خُدایِ كی شیمی درون خو خشنودی واسی کار کودَن دَره، هم اراده درون و هم عمل درون.
14هر كاریَ بی غُرغُر و توکه بِرا انجام بديد، 15تا بی عیب و ساده دیل و خُدا بی عیب زاكان بيبيد، خطاکار و گُمراهِ نسل درون کی شیمی نور اوشان ميان ستارئان مانستن اَ دُنیا درون فتاوِه، 16زیندگی كلامَ قائم بدارید، تا مسيحِ وَگردستنِ روجِ درون افتخار بُكونم كی هچین نُدوَستم و هچین زحمت نکشِئم. 17حتی اَگه لازم بِبه می خون ايتا پیشکشِ مانستن شیمی ایمان قربانی ره فُکوده بِبه، خوشحالم و شُمان همتان اَمرا ذوق كونم. 18و شُمانم بایستی هُطو خوشحال بيبيد و می مَرا ذوق بُكونيد.
تيموتائوس و اِپافْرودیتوس
19خُداوندْ عیسی درون اُميد دَرم كی تيموتائوسَ خَیلی زو شیمی ورجه اوسه كونم تا شیمی حالِ جا واخبر بَبم و می ديل شاد بِبه. 20چونکی دِه هیکسَ نارَم كی حئیقتن شیمی راحتی فكر بِبه. 21اوشان همتان، خوشانِ منفعت دُمبالید، نه عيسی مسيح. 22ولی شُمان دانيدی كی تيموتائوس خو امتحانَ پس بدَه، کی چطو می اَمرا، ایتا پسر مانستن خو پئر مَرا، انجيل كار درون خدمت بُكوده. 23پس اُميد دَرم هَطوكی می تكليف روشنَ بوسته، اونَ، شیمی ورجه اوسه كونم؛ 24و خُداوندِ درون اطمينان دَرم كی منم خَیلی زو خوائم اَمون.
25من لازم بدانستم اِپافْرودیتوسَ شیمی ورجه اوسه کونَم، اونَ کی جه ايطرف برار و همكار و می همرزمه و جه اُ طرف، کسی ایسه کی شُمان اونَ می احتیاجاتِ برطرف کودن ره اوسه بُکوده بید. 26چونکی اون، شیمی همتانِ دِئن ره مشتاق بو و اَنه واسی كی بشتاوسته بید ناخوش بُبوسته، پریشانِ. 27راس راسی كی ناخوش بو و مردَن دوبو. ولی خُدا اونَ رحم بُكود، و نه فقط اونَ، بلکی مَرَم رحم بُکود، تا نَبه ایتا غُصه به می غُصه ئان اضافه به. 28پس من اونِ اوسه كودن ره ویشتر ذوق دارم، تا ايوار دِه اونِ دِئن اَمرا خوشحالَ بيد و می غصه ئم كمَ به. 29پس خُداوندِ درون تمانِ خوشحالی مَرا اونَ قُبیل بُكونيد و اَجور آدمانِ حرمتَ بدارید، 30چونکی اون، مسيحِ کار واسی مردَن دبو و خو جانَ به خطر تَوَده تا شیمی خدمتِ کم و کاستی به من جبران بِبه.
Currently Selected:
نامه فیلیپیان ره 2: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
