نامه فیلیپیان ره 3
3
صالح بوستن، مسیحِ ایمانِ راهِ درون
1آخر بسر، ای می براران، خُداوندِ درون شاد بيبيد. تمانِ اَ چیانی کی شمرأ نیویشتن دَرم مِره زحمت نیئه، بلکی شیمی امنیت واسی ایسه. 2اُ سگ ئانِ جا دوری بُکونید، اُ گُناهکارانِ جا دوری بُكونيد، اوشانِ جا کی ختنه کودَن واسی، جسمَ واوینیدی، دوری بُکونید. 3چونکی ختنه بُبوسته اَمانیم، كی خُدا روحِ امرا پرستش كونيم، و مسيحْ عيسی درون فخر کونیم و اَمی تکیه جسم سر نیه- 4هر چن كی من خودَم تکیه کودن ره جسم سر دلیل دارم.
اَگه ایكس فكر كونه كی دليلی تکیه کودَن جسم سر دَره، من ویشتر دَرم: 5ختنه بُوستن هشتمین روجِ درون، اسرائيل مردوم جا، جه بنيامينِ طایفه، عبرانی زای، عبرانی پئر و مار جا؛ طبق شريعت، فَريسی؛ 6طبق غیرت، كليسا آزار دئنده، طبق صالح بودَن کی شریعتِ جا آیه، بی عيب. 7ولی هر اونچی كی مِره نفع دَشتی، اونَ مسيحِ خاطری ضرر بدانستم. 8راس راسی، من همه چیَ اَنه واسی کی می خُداوند مسيحْ عيسی ایشناختنَ کی جه همه چی بالاتر ایسه، ضرر دَنم. اونِ خاطری همه چیَ جه دَس بدَم و اَشانَ هَطو آشغالِ مانستن دَنم. تا می نفع مسیح بِبه، 9و اونِ درون پيدا ببم، نه می صالحی مرا كی شريعت جا آیه، بلكی اُ صالحی اَمرا كی ايمان راه جا به مسيح بدَس اَيه، هو صالحی كی خُدا جا ایسه و طبق ايمان ایسه. 10تا مسيح و اونِ زنده بوستنِ قدرتَ بشناسم و اونِ عذاب ئان درون سَام بدَرم، و اون مرگ درون، اونِ مانستن بَبم، 11تا هرجور كی بِبه زنده بوستنَ، مُرده ئانِ جا، بدَس باورم.
تقلا کودَن، هدَفِ فاراسئنِ واسی
12نه انکی تا الان اَشانَ بدس باوردَم يا كامل بُبوستم، بلكی خودمَ جُلُو توداندرم تا اونَ بدَس باورم چونکی مسيحْ عيسی مَرَه خودش ره بدَس باورده. 13براران، گُمان نُكونم كی هنو اونَ بدَس باورده ببَم؛ ولی ايتا كار كونم: اونچی کی پوشت سرَ نئه فراموشَ كونم و اونچیِ واسی کی پیش دَره، تقلا کونَم، 14هدفِ فارسئنِ واسی تقلا كونم، تا جايزه ئی كی خُدا اونِ ره مسيحْ عيسی درون مَرا بُجور دُخواده، بدَس باورم.
15اَمی میان اوشانی کی پیله آدمید، بایستی اَجور فكر بُكونيد؛ و اگر هرچی درون ايجور ديگر فكر كونيدی، خُدا شمرأ اَنَم آشكار خوائه كودن. 16امان بایستی هر اونچیَ کی بدَس باوردیم عین اون، رفتار بُكونيم.
17ای براران، می جا سرمشق بيگيريد، و شیمی نگاه اوشانیَ بِبه کی عین اونچی کی اَمی جا سراغ دَریدی، رفتار کونید. 18چونکی من چن وار اوشانِ باره شمرأ بُگفتم، و حتی هسّا می آرسوئان مَرا گَم، خَیلیان، مسيحِ صليبِ دُشمانِ مانستن رفتار كونيدی. 19اوشانِ عاقبت هلاكتِ. اوشانِ خُدا اوشانِ شكم ایسه و شرم آور چیانَ افتخار کونیدی، اوشان زمینی چیان باره فکر کونیدی. 20حالا اَنکی امان آسمانِ شينيم و خُداوند عیسی مسیح رافائیم کی ایتا نجات دهنده ایسه. 21اونکی اَمی پَستِ تنَ عوضَ کونه تا اونِ جلال بیگیفته تنِ مانستن بیبیم، اُ قدرت مَرا کی اونَ قوت دِئه تا تمان چیانَ خو فرمانبر بُکونه.
Currently Selected:
نامه فیلیپیان ره 3: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
