یعقوبِ نامه 4
4
هُشدار دُنیا پرستی ره
1چی باعث به شیمی میان دعوا بِبه و چی باعث به شیمی میان جنگ و جدال دکفه؟ مگه شیمی هوا و هوس واسی نیئه کی شیمی وجود درون جنگستن دَرید؟ 2ایچی ناجه یَ دَریدی و اُ موقع کی اونَ بدَس ناوریدی آدم کوشیدی. طَمع کونیدی و اُ موقع کی نتانید اونَ بدَس باورید جنگ و دعوا راه تَوَدیدی، شُمان ناریدی اَنه واسی کی درخواست نُکونید! 3اُ موقع ئم کی درخواست کونیدی، فَنگیریدی چون بَدِ نیّت اَمرا درخواست کونیدی تا شیمی هوا و هوس ئان ره استفاده بُکونید. 4اَی زیناکاران، مگه نانیدی که دُنیا مَرا دوستی کودن خُدا مَرا دُشمندی کودَنه؟ پس هرکس اَنه دُمبال دِبه کی دُنیا مَرا دوستی بُکونه خورَه خُدا دُشمند بُکوده دَره. 5یا اَنکی خیال کونیدی مقدّس بینیویشته هچین بگفته: «خُدا نسبت به اُ روحی کی اَمی درون بَنه خَیلی غیرت دَره؟» 6ولی خُدا ویشتر فیض بخشِه. اَنه واسی گه:
«خُدا اوشانِ جُلُو کی مغرورید ایسه،
ولی فروتنانَ فیض بخشه.»
7پس شُمان خُدا جا اطاعت بُکونید. ابلیسِ جُلُو بأسید و اون شیمی جا فرار کونه. 8خُدایَ نزدیکَ بید و اونَم شمرأ نزدیکَ به. اَی گُناهکاران شیمی دستانَ پاکا کونید و اَی شُمان کی دودیل ایسید، شیمی دیلانَ پاکا کونید. 9بِه حال زار دَکفید و گریه زاری بُکونید. شیمی خنده ماتم بِبه و شیمی خوشحالی، غُرصه.
10خُداوند جُلُو شمرأ فروتن بُکونید کی اون شمرأ سربلند کونه. 11اَی براران همدیگرِ بَدَ نیگید. هرکس ایتا برارِ ضد بَد بگه یا خو برارَ داوری بُکونه، شریعت ضد بَد بگفته و شریعتَ داوری بُکوده دَره. ولی اَگه تو شریعتَ داوری بُکونی، تو شریعتِ داور بُبوسته ای نه اُ کسی کی اونَ بجا آوره!
12فقط اینفر ایسا کی شریعتَ فَدَه و داورِ، اون هونیه کی تانه نجات بِده و هلاکَ کونه. پس تو کی بیبی کی تی هَمساده یَ داوری بُکونی!
افتخار فردا واسی
13هسّا شُمان کی گیدی: «ایمروج یا فردا اَ شار یا اُ شار شیم و ایی سال اویا ایسیم و تجارت کونیم و سود خوائیم کودن،» 14با اَ حال شُمان حتّی نَنیدی کی فردا چی خوائه بِبه. شیمی زیندگی چیسه؟ هَطو بخار مانستنه کی ایی دَم ظاهیرَ به و بازون از بین شه. 15پس بایستی اَطو بیگید: «اَگه خُداوند بخوائه زنده مانیم و اَ کار یا اُ کارَ کونیم.» 16اَجور کی معلومه شُمان، شیمی غرور ره افتخار کونیدی. تمان اَجور افتخار کودنان بَدِ.
17پس هرکس بدانه کی کویتا کار دُرُسته و اونَ انجام نَدِه، اَن، اُ آدم ره گُناه به حساب اَیه.
Currently Selected:
یعقوبِ نامه 4: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
