یعقوبِ نامه 3
3
زوانِ بلا
1می براران، نَبه کی خَیلی جه شُمان خُدا کلام معلم بوستن دُمبال بیبید، چونکی دانیدی اَمان معلمانِ ره، سخت تر داوری خوائه بوستن. 2چونکی اَمان خَیلی رائان درون خطا کونیمی. اَگه اینفر خو گب زئن درون خطا نُکونه، کاملِ آدمِ و تانه تمان خو تن جُلُویَ بیگیره.
3اَگه اَمان اسبان دَهن سر، دَهنه دَودیم اوشانِ رامَ کونیم و تانیم تمان اوشان تنَ هر سمت کی بخوائیم ببریم. 4کشتی ئانَم بیدینید: هرچن کی اوشان پیله ئید و تُند باد اوشانَ تکان دِئه، ولی ایتا کوچی سُکان، تانه ایتا پیلی کشتیَ هر سمت کی ناخُدا بخوائه بَبره. 5پس هَطوئم، زوان ایتا کوجدانه عضوِ، با اَ حال پیله پیله ادعائان دَره. ایتا کوجدانه جرقه تانه ایتا پیله جنگلَ آتش بزنه. 6زوانم آتشِ؛ ایتا دُنیا نادرستی. ایتا جه اَمی اوسم و اعضا کی تمانِ آدمی وجودَ کثیفَ کونه و تمانِ اونِ زیندگیَ آتش زنه، آتشی کی جهندم اونَ واگیرانه!
7آدمی، همه جور جانور و پَرنده و خزنده و دریا درون جاندارنَ رامَ کونه و بُکودِه دَره، 8ولی هی آدمی نتانه زوانَ، رامَ کونه. زَوان شروری ایسه کی سرکشه و کُشنده زهرِ جا پرُ!
9اَمی زوان مَرا خُداوند و پئرَ، موارک خوانیم و هو زوان مَرا، آدمانی کی خُدا مانستن خلق بُبوستیدَ لَعنت کونیم. 10ایتا دَهن جا، هم برکت بیرون آیه هم لَعنت! اَی می براران، خُب نیه کی اَطو بِبه. 11مگه به ایتا چشمه جا هم شیرینِ آب بیرون بایه، هم شورِ آب؟ 12می براران، مگه به اَنجیل دار، زیتون باوره؟ یا رَز دار، اَنجیل فَدِه؟ هطوئم شورِ چشمه نتانه شیرینِ آب فَدِه.
آسمانی حکمت
13شیمی میان کی حکیم و عاقیله؟ وَئَلید اون، خو خُب زیندگی کودَن اَمرا نیشان بدِه، اُ اعمالی کی فروتنی اَمرا ایسه، و حکمت جا سر چشمه گیره. 14ولی اَگه شیمی دیل درون زرخِ حسودی و خودخوائی دَریدی، شمرأ نیگیرید و ضد حئیقت گب نزنید. 15اَجور حکمتی آسمان جا نایه، بَلکی زمینی و نفسانی و شیطانیه. 16چون هر جا کی حسودی و خودخوائی بمانه، اویا وَلوا و همه جور زِشت کردکار نَئه.
17ولی اُ حکمتی کی آسمانِ جا ایسه، اوّل پاکِ، بازون صلح جو و آرام ایسه و نصیحتَ گوش کونه، و خُب ثمرات و رحمت جا پُره و فرق نَئن و ریا جا دوره! 18صالحی، محصولی ایسه کی صلح و صفا درون و صلح جو آدمانِ دَس مرا بکاشته بِه.
Currently Selected:
یعقوبِ نامه 3: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
