یعقوبِ نامه 5
5
هشُدار پولداران ره
1ولی شُمان اَی پولداران، گریه و شیون بُکونید، چونکی مصیبتان شیمی رافا ایسا. 2شیمی مال و منال بپوخُسته و شیمی رختانَ بید بزه! 3شیمی طلا و نقره موران بزِه دَره، و اوشانِ موران ضد شُمان گُوائی خوائید دَئن، و هُطو آتش مانستن شیمی تن گوشت خوره. شُمان آخرتا روجان درون، مال و منال جَما کودید! 4هسّا اُ کارگران کی شیمی زمین سر دِرو بُکودید، و شُمان قاب بازی مرا اوشان مُزدَ فاندَئید، شیمی ضد فریاد زَنیدی و دِروکونانِ فریاد، خُداوند لشگران گوش فارسِه. 5شُمان زمینِ سَر ناز و نعمت و عیش و نوش درون زیندگی بُکودید، و شیمی دیلانَ کُشتار روجِ واسی پَروار بُکودیدی! 6شُمان اُ صالح آدمَ، محکوم بُکودید و بُکوشتید. اون شیمی جُلُو مقاومت نُکود.
صبر مصیبت درون
7پس اَی براران، تا اُ روج کی خُداوند بایه صبر بُکونید. فَندرید کی چُطو کشاورز رافا ایسه تا زمین خو با ارزش محصولَ باوره؛ چُطو صبر کونه تا پائیز و بهارِ وارش، زمینِ سَر بواره. 8پس شُمانم صبر بدارید، و شیمی دیل قُرص بِبه چونکی اَمی خُداوندِ آمون نزدیکِ! 9براران، همدیگر ضد غُرغُر نُکونید، تا شمرأ ئَم داوری نَبه، بیدینید؛ ’داور‘ دَرِ سَر ایسا.
10براران، اُ پیغمبرانِ جا کی خُداوند نام اَمرا گب زِئیدی، مصیبت و صبرِ درسَ یاد بیگیرید. 11ولی خوش بحال اوشانی کی صبر و تحمل بُکودید. شُمان ایوبِ صبر و تحمل باره بیشتاوستید، و دانیدی کی خُداوند آخربسر اونِ امرا چی بُکود، چونکی خُداوند بی حد حیساب مهربان و بخشنده یِ.
12می براران، ولی جه همه مهمتر اَنه کی قَسم نُخورید؛ نه آسمانَ، و نه زمینَ و نه هیچی دیگرَ، بلکی، وَئَلید شیمی ’بله‘ هو بله بِبه، و شیمی ’نه‘ هو نه، نَبه کی محکوم بیبید.
دُعا ایمان امرا
13شیمی میان کیسه کی عذاب کشئن دَره؟ وئَلید دُعا بُکونه. شیمی میان کیسه کی خوشحاله؟ وئَلید حمد و ثنا سرودَ بخوانه. 14شیمی میان کیسه کی ناخوش بِبه؟ وئَلید کلیسا ریش سفیدانَ دوخوانه و اوشان، اونِ ره دُعا بُکونید و خُداوندِ نام مَرا اونَ روغن امرا مسح بُکونید. 15ایمان امرا دُعا کودن، ناخوشَ نجات دِئه و خُداوند اونَ ویریزانه، و اَگه اُ آدم گُنائی بُکوده بِبه، ببخشه به. 16پس، همدیگر ورجه شیمی گنُائان اعتراف بُکونید و همدیگر ره دُعا بُکونید تا شفا بیگیرید. صالح آدم دُعا، پیله قوّت امرا عمل کونه.
17ایلیایِ پیغمبر اَمی مانستن ایتا آدم بو، ولی وقتی تمان خو وجود امرا دُعا بُکود کی وارش نَواره، سه سال و نیم زمین سَر وارش نَوارَستِ؛ 18و اُ موقع کی ایوارده دُعا بُکود، آسمان جا وارش بَوارَست و زمین خو محصولَ به بار باورد.
19می براران، اَگه ایکَس شیمی میان حقیقتِ جا دورَ به و اینفر دیگر اونَ واگردانه، 20اَ آ دم، بدانه هرکَس کی ایتا گُناهکارَ گُمراهی جا واگردانه، اونِ جانَ مرگِ جا نجات بِدَه دَره و خَیلی گُنائانَ خوائه پوشانِئن.
Currently Selected:
یعقوبِ نامه 5: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
