نامه، مسیحیانِ عبرانی نـژادِ ره 9
9
زمینی مقدّس جا درون عبادت کودَن
1هسّا حتّی اُ اولتّا عهد، عبادت کودن ره قانونانی داشتی و زمین سَرَم ایتا مقدّس جا داشتی. 2چون ایتا خیمه برپا بُبوسته بو کی اولتّا قسمت درون، چراغدان، میز، و مقدّسِ نان نَئه بو. اَیا گیدی ’قُدس‘. 3دومتا پرده پوشت، ایتا قسمت نَئه بو کی ’قُدسالاقداس‘ نام داشتی، 4اَ قسمتِ درون، طلایی آتشدان بخورِ سوجانئن ره نَئه بو و عهدِ صُوندوق کی جه هر طرف طلا کاری بُبوسته بو، کی اونِ میان ایتا طلایی کوزه نَئه بو، کی ’مَنّا‘ یَ اونِ درون داشتیدی، هارونِ عصا کی تی تی بزه بو، و دوتا سنگی لوح کی عهدِ دَه فرمان اونِ رو بینیویشته بُبوسته بو. 5صُوندوقِ بُجور کی اونَ رحمتِ تخت گفتیدی ’جلالِ‘ کروبیانِ فیریشته، سایه توَدَه بید. هسّا نتانیم اَ چیانَ بقاعده واشکافانیم.
6بعد اونکی اَ چیان اَطویی آماده بوستی، کاهنان دائم اولتّا قسمتِ درون شوئیدی تا خوشانِ وظایفَ انجام بدید. 7ولی فقط پیله کاهن، دومتّا قسمتِ درون شوئی و اونَم فقط سالی ایی مرتبه، و خو امرا قُربانی خونَ بَرِه تا خودشِ واسی و اُ گُنائانِ واسی کی مردوم، نادانی خاطری بُکودید تقدیم بُکونه. 8و اَطویی روح القدّس نیشان دِئه تا اُ موقع کی اولتّا قسمت پابرجا ایسه، هنو اُ رائی کی قدّس الاقداسِ درون شِه بازَ نُبوسته، 9کی اَن هه دورانِ ره ایتا نیشانه ایسه. مطابق اون، پیشکشان و قربانی ئانی کی فدَه به، نتانِه اُ کَسِ وجدانَ کی عبادت کونه، کاملا پاکَ کونه، 10بلکی اوشان فقط خوراکی ئان و نوشیدنی ئان و جورواجور غُسلان و قانونانی ایسید کی بَدنَ ربط دَره، و فقط تا اُ موقع اعتبار دَره کی خُدا تازه ترتیبَ فَدِه.
رهایی بواسطه مسیحِ خون
11ولی وقتی کی مسیح، پیله کاهنِ مقامِ درون خُبِ چیانِ ره بامو کی هسّا اَمی نصیبِ بُبوسته، اون ایتا پیله تر و کاملترِ خیمه درون بامو کی دسِ مرا بساخته نُبوسته و اَ خلقتِ شین نیه. 12اون ایوار همیشک ره قُدسالاقداسِ درون بامو، نه بُزان و مانده ئانِ خونِ اَمرا، بلکی خودشِ خونِ مرا، و اَطو ابدی رهاییَ آماده بُکود. 13چونکی اَگه بُزان و وَزائانِ خون، و مانده خاکسترِ فُکودن امرا اوشانِ سر کی ناپاک ایسید، اَشانَ تقدیس کونه تا جسمِ درون پاک بیبید، 14چنقدر ویشتر مسیحِ خون، کی بواسطه اَبدی روح، خورَه بی عیب، خُدا ره تقدیم بُکود، اَمی وجدانَ بیخودی کارانِ جا پاکَ کونه تا خُدایِ زنده یَ خیدمت بُکونیم!
15پس مسیح ایتا تازه عهدِ واسطه گر ایسه، تا اوشانی کی دعوت بُبوستید، بتانید اُ اَبدی میراثَ کی خُدا واده بدَه، بدَس باوَرید، چون ایتا مرگ اتفاق دَکفته کی اوشانَ، اُ گنائانِ جا کی اولتّا عهدِ درون انجام بُبوسته، رهائی دِئه. 16چونکی زماتی ایتا وصیت اجرا به، کی ثابت بِبه اونکی وصیت بُکوده، بَمردیه. 17چونکی وصیتَ، بَمرده بو پَسی شه اجرا کودن، و تا زماتی کی اونکی وصیت بُکوده زنده ایسه، اُ وصیتَ نیشه اجرا کودن. 18جه اَ رو، حتّی اولتّا عهدَم بی خون برقرار نُبوستی. 19چون اُ موقع کی تمانِ شریعتِ احکام، بواسطه موسی تمانِ مردوم ره اعلام بُبوست، اون، مانده ئانِ خون و بُزانِ خونَ بیگیفت و آب و سرخِ پشم و زوفا خالانِ امرا، هم طومارِ سر و هم تمانِ مردومِ سر بپاشانه. 20و بگفت: «اَنه اُ عهدِ خون کی خُدا شمرأ حکم بُکود.» 21و هُطو اُ خونَ خیمه رو و هم تمانِ ظرفانِ رو کی پرستش ره به کار شوئی، بپاشانه. 22راس راسی، عینِ شریعت تقریبا همه چی خونِ مرا پاکَ به، و بدونِ اَنکی خون فکوده بِبه، گنائانِ آمرزش وجود ناره.
23پس بایستی اَ چیانَ کی ایتا نمونه آسمانی چیانِ جا ایسید، اَ قربانی ئانِ امرا پاکَ بید، ولی خودِ آسمانی چیان اُ قربانی ئانِ امرا کی اَشانِ جا بختره، پاکَ بیدی. 24چونکی مسیح اُ قُدس الاقداس کی دسِ مرا بساخته بُبوسته و فقط اُ حقیقی چیانِ جا ایتا نمونه ایسه بُدرون نُشو، بلکی به خودِ آسمان بُشو تا اَمی طرفِ جا خُدا محضر میان ظاهر بِبه. 25و اَطو نیه کی اون، خورَه دائم قربانی بُکونه، ایتا پیله کاهن مانستن کی هر سال قُدسالاقداسِ درون شه اونَم اُ خونِ امرا کی خودشِ خون نیه. 26چونکی اَطویی، مسیح بایستی جه زماتی کی دُنیا بنا بُبوست یکسره عذاب بکشِه بی، ولی اَطو نُبوست، اون هسّا، ایوار همیشک ره آخرتا زمانانِ درون بامو تا خو قربانی کودن مرا، گنایَ جه میان اوسانه. 27هُطوکی تعیین بُبوسته انسان ایوار بیمیره و بازون پس داوری اَیه، 28پس مسیح ئم کی ایی مرتبه قربانی بُبوسته تا خَیلیانِ گنائانَ اوسانه، دومین باره ره اَیه، ولی نه گُنائانِ اوسادنِ واسی، بلکی اوشانِ نجاتِ واسی کی شوقِ امرا اونِ چوم بِراه ایسید.
Currently Selected:
نامه، مسیحیانِ عبرانی نـژادِ ره 9: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
