نامه، مسیحیانِ عبرانی نـژادِ ره 10
10
مسیح قربانی بوستن ایوار همیشک ره
1چونکی شریعت فقط آینده خُب چیانِ سایه ایسه، و نه اوشانِ واقعی شکل، هنِ واسی، هرگس نتانه اُ قربانیانِ امرا کی هر سال هَطو تقدیم به، اوشانیَ کی پرستشِ ره نزدیک اَئیدی، کامل بُکونه. 2وگرنه، مگه اوشانِ قربانی تقدیم کودَن قطعَ نُبوستی؟ چون اوشان کی پرستش کودید، ایوار پاکَ بوستید و دِه خوشانَ گناهکار ندانستید. 3ولی اُ قُربانیان هر سال گنائانَ به یاد آوره، 4چره کی محالِ ورزائان و بُزئانِ خون گُنائانَ پاکَ کونه.
5هنِ واسی وقتی کی مسیح اَ دُنیا درون بامو، بگفت:
« تو قربانی و پیشکش نخواستی،
بلکی ایتا تَن مِره فراهم بُکودی؛
6تو اَنه جا کیف نُکودی کی تمام سوجِ قُربانیان و گناهِ قُربانیان، تِره باوَرید.
7پس بگفتم: ”بیدین! من آیَم
تا تی اراده یَ بجا باوَرم، اَی خُدا؛
هُطوکی طومارِ کتاب درون می باره بینویشته بُبوسته.“»
8بازین اونکی گه: «تو قربانی و پیشکش، تمام سوج قربانی ئان و گُناه قربانی ئانَ نخواستی و اوشانِ جا کیف نُکودی»، هرچن کی اَشان عینِ شریعت تقدیم بوستیدی. 9بازون گه: «بیدین! من اَیم تا تی خواسته ی بجا باوَرم.» اون، اوّلیَ اوسانه تا دوّمیَ برقرار بُکونه. 10اَمان بواسطه عیسی مسیحِ تنِ قربانی کودن امرا، ایوار همیشک واسی، اونِ ره وقف بُبوستیم. 11هرتا کاهن، هر روج خیدمت ره ویریزه و هو قربانیانَ کی هرگس نتانید گُنائانَ پاکَ کونید، دائم تقدیم کونه. 12ولی مسیح بعد اَنکی ایتا قربانی گنائانِ واسی همیشک ره تقدیم بُکود، خُدا راسِ دَسِ ور بینیشت. 13جه اُ وقت، رافا ایسا کی اونِ دُشمندان، اونِ پا جیرِ کَتَل بیبید. 14چونکی ایتا قربانی مرا، اوشانیَ کی وقف بیدی، همیشک ره کامل بُکود. 15روح القدس ئَم امرا ایتا گوائی دِئه. اول گه:
16«خُداوند گه:
اَنِ اُ عهدی کی بعد اُ روجان اَشانِ مرا دَوَدَم.
می شریعتَ اوشانِ دیلانِ درون نَئم،
و اَشانِ فیکرانِ درون نیویسم.»
17بازون گه:
«اَشانِ گُنائان و شرورِ کارانَ
دِه هرگس به یاد ناوَرم.»
18اویا کی اَشانِ ببخشِه بوستَن نَئه، دِه گُناه ره قربانی تقدیم کودَن احتیاج نیه.
تمان و کمالِ ایمان
19پس براران، جه اویا کی خاطرجَم ایسیم، کی بواسطه عیسی خون تانیم قُدسالاقداسَ بُدرون بشیم، 20بواسطه ایتا تازه و زنده راه کی اون، اُ پرده میان یعنی اونِ تن، امرا بازَ کود، 21و جه اویا کی ایتا پیله کاهن خُدا خانه سر دَریم، 22بائید ایتا راستِ دیل و تمان و کمالِ ایمانِ مرا، خُدایَ نزدیک بیبیم، و اَمی دیلانَ بدِ وجدانِ جا پاکَ کونیم و اَمی تن ئانَ پاکِ آبِ مرا بُشوریم. 23بائید بی اونکی شَک بُکونیم، اُ اُمیدیَ کی اونَ اعتراف بُکودیم قایم بچسبیم، چون اونکی واده بدَه، وفادارِ. 24بائید اَ فکرِ درون بیبیم کی چطو همدیگرَ تشویق بُکونیم تا محبت بُکونیم و خُبِ کاران انجام بدیم. 25و جما بوستنِ جا همدیگرِ امرا دَس نکشیم، هُطوکی بعضیانِ ره عادت بُبوسته، بلکی ویشتر همدیگرَ تشویق بُکونیم، اللخصوص هسّا کی دینیدی اُ روج یعنی خُداوند عیسی وَگردَستنِ روج، هَطو نزدیکترَ بوستن دَره.
26چونکی اگر حئیقتِ بشناخته بو پَسی، از قصد هَطو گُناه بُکونیم، دِه هی قربانی، گُنائانِ ره باقی نمانه؛ 27ولی اونچی کی بجا مانه، ترسِ امرا رافا ایسائن، مجازات و ایتا پیله آتشِ کی خُدا دُشمندانَ فَوَره. 28هرکس کی موسی شریعتَ ردَّ کودی، دوتا یا سه تا شاهدِ گواهی مَرا، بی رحمی امرا بکوشته بوستی. 29شُمان خیال کونیدی، اونِ حَقّ، کی خُدا پسرَ پا جیر بَنه و اُ عهدِ خونَ کی اونِ ره وقف بُبوسته، بی حرمت بُکوده، و فیضِ روحَ بی عزّت بُکوده، چی بَدترِ مجازات اونِ سر خوائه آمون؟ 30چون امان اُ کسیَ کی اَنه بگفت ایشناسیم: «تقاص می شینه؛ من سزا دَئم.» و بازم بگفت: «خُداوند خو مردومَ داوری کونه.» 31خُدای زنده دَس دَکفتن چنقد ترسناکِ.
32ولی اُ قدیمِ روجانَ به یاد باوَرید، اُ زمات کی تازه نورانی بُبوسته بید؛ شُمان ایتا سختِ مبارزه درون زجر امرا، تاب باوَردید. 33بعضی وقتان همه کسِ چومِ جُلُو فاش خوردیدی و عذاب کیشِه ئیدی و بعضی وقتان دوش به دوشِ اوشانی بئسائید کی اَشانِ مرا اَطو رفتار بوستی. 34چونکی شُمان اوشانِ مرا کی زندانِ درون ایسابید همدردی بُکودید، و اُ موقع کی شیمی مال و منالَ غارت بُکودید، خوشحالی مرا قُبیل کودیدی. چونکی شُمان خودتان دَنستیدی ایتا بخترِ مال و منالِ صاحاب ایسید کی تا ابد مانه. 35پس شیمی اطمینانِ جا دَس نَکشید، کی ایتا پیله پاداش اونِ دُمبال دَره. 36چونکی شُمان احتیاج داریدی کی تاب باوَرید، تا اُ موقع کی خُدا خواسته یَ بجا آوَریدی، اونچیَ کی واده بدَه بُبوسته، بدَس باوَرید. 37چون،
«ایبچه دِه، اونکی قراره بایه، اَیه،
و دیرَ نُکونه.
38ولی می صالح آدم،
ایمانِ مرا زیندگی کونه.
و اگر می جا، رو واگَردَنه
می جان، اُ آدم جا راضی نیبه.
39ولی اَمان اوشانِ جا نیئیم کی واگردیدی و هلاکَ بیدی، بلکی اوشانِ جا ایسیم کی ایمان دَریدی و خوشانِ جانَ حفظ کونیدی.
Currently Selected:
نامه، مسیحیانِ عبرانی نـژادِ ره 10: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
