نامه، مسیحیانِ عبرانی نـژادِ ره 8
8
ایتا بختر عهدِ پیله کاهن
1هسّا اصلِ مطلبی کی اَمان گُفتن دَریم اَنه کی: اَمان اَجور پیله کاهنی دَریم، کی خُدایِ متعالِ تختِ راستِ دسِ ور، آسمانِ درون نیشته، 2مقدّسِ جائانِ خیدمتکار، اُ حقیقی خیمه کی خُداوند برپا بُکوده، نه انسان.
3چونکی هر تا پیله کاهن تعیین به تا پیشکشان و قربانی ئان فَدِه، پس اَ کاهنم بایستی ایچی پیشکش کودن ره بداره. 4هسّا اگه اون زمینِ سر ایسابی، هرگس کاهن نُبوستی، چون کاهنانی ایسائیدی کی بنا به شریعتِ حکم پیشکشان فَدیدی. 5ولی اوشان آسمانی چیانِ نمونه و سایه یَ خیدمت کونیدی. چون اُ زمات کی موسی خواستی خیمه یَ برپا بُکونه، خُدا اونَ فَرمان بدَه و بگفت: «تی حواس بمانه همه چیَ عَینِ اُ نمونه ای کی کوه درون تَره نیشان بدَه بُبوسته، چاکونی.» 6ولی هسّا خیدمتی کی مسیح بدَس باوَرده، بِمراتب اُ قدیمِ خیدمتِ جا بُجورتَره، چون عهدیَ کی اون، اونِ ره واسطه گری کونه بختره، اُ عهد کی بخترِ واده ئانِ سر بنا بُبوسته.
7چونکی اگه اُ اولتّا عهد بی عیب بُبوسته بی، دِه احتیاج نُبو کی دومتّا عهدِ دُمبال بیبیم. 8ولی خُدا اوشانِ جا عیبی یابه و گه:
«خُداوند گه، بیدین، هسّا روجانی اَیه،
کی من اسرائیلِ خاندان و یهودا خاندانِ مرا
ایتا تازه عهد خوائم دَوَستن.»
9نه اُ عهدِ مانستن کی اوشانِ پئرانِ مرا دَوَستم،
اُ روج کی اوشانَ دسَ بیگیفتم
تا اوشانَ مصرِ ولایتِ جا بیرون باوَرم؛
چونکی خُداوند گه، اوشان اُ عهدِ سر کی می اَمرا دَوستید نِئسائید.
پس من می رویَ اوشانِ جا واگردانِم.
10چونکی خُداوند گه:
اَنه اُ عهدی کی بعدِ اُ روجان
اسرائیلِ خاندانِ امرا دَوَدَم:
می شریعتَ اوشانِ فیکرانِ درون نَئم،
و اَشانِ دیلانِ رو نیویسم.
و من اوشانِ خُدا خوائم بُوستن،
و اوشان، می مردوم.
11و هیکَس خو همساده یَ تعلیم نخوائه دَئن
و هیکَس خو برارَ نیگه،
”خُداوندَ بشناس!“
چونکی همتان، پیله دانه تا کوجیدانه مَره ایشناسیدی،
12چون من اوشانِ خطائانِ ره رحم کونم،
و اوشانِ گناهانَ هرگس به یاد ناوَرم.»
13خُدا ایتا تازه عهدِ گب زئنِ جا، اُ اولتّا عهدَ بی اعتبار کونه، و اونچی کی اعتبارِ جا کَفه، کُهنَه به و آماده ایسه کی از بین بشه.
Currently Selected:
نامه، مسیحیانِ عبرانی نـژادِ ره 8: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
