دوّمتا نامه قُرنتیانِ ره 9
9
پیشکشان اورشلیم مسیحیان ره
1هَسا دِه احتیاج نیه کی اَ خیدمتِ باره مُقدّسین ره، شمرأ بنویسم، 2چونکی دَنم اَ کارِ ره چی ذوق و شوقی دَریدی و اَنه واسی ئم مقدونیه ایماندارانِ ورجه شمرأ افتخار بُکودم. اَشانَ بگفتم کی شُمان اَخائیه ولایت درون پارسال تا الان پیشکش فدَن ره حاضر بید. و شیمی غیرت خَیلی جه اوشانم اَ کارِ واسی تحریک بُکود. 3ولی اَ برارانَ اوسه کونم تا ثابت بِبه کی اَمی افتخار شمرأ اَ جریان باره هچین نُبو، بلکی هُطوکی بُگفتم، حاضر بیبید. 4نَبه کی اَگه چن نفر جه مقدونیه ایمانداران می مَرا بائید و بفهمید کی شُمان حاضر نیئید، امان جه اُ اطمینانی کی شمرأ دَشتیم شرمند بیبیم، دِه جه اَنکی شُمان خودتان چَنقد شرمنده خوائید بوستن هیچی نگم. 5پس واجب بیدِم براران جا بخوام کی جُلُوتر شیمی دِئن ره بائید و اُ پیشکشانیَ کی واده بدَه بید، تدارک بیدیند. تا اَ پیشکش، پیشکشی بِبه کی شیمی میل مَرا فدَه بید، نه زور اَمرا.
6می گب اَنه: هرکی کم بکاره، کمَم درو کونه، و هرکی خَیلی بکاره، خَیلی ئَم درو کونه. 7هرکس بایستی هو قَد کی خو دیل درون تصمیم بیگیفته، فَدِه نه بی میلی و زور اَمرا، چونکی خُدا اونیَ کی شادی اَمرا پیشکش فَدِه دوست دَره. 8و خُدا تانه شیمی واسی هر نعمتیَ زیادَ بُکونه تا همیشک همه چی درون شیمی احتیاج اَندر بدَرید، و هر کار خُب درون فَت و فراوان بدَرید. 9هُطوکی مزمور کتاب درون بینیویشته بُبوسته:
«دَس و دیلبازی مَرا نادارانَ ببخشه،
اونِ صالحی تا ابد پا برجا ایسه.»
10اونکی دانه یَ کشاورز ره و نانَ خوردن ره فَدِه، شیمی دانه یَ کشت و کار واسی آماده کوده، برکت دئه و شیمی صالحی محصولَ زیادَ کونه. 11شُمان جه هر نظر دولتمند خوائید بوستن تا جه هر طرف دس و دیلباز بیبید، و شیمی اَ دس و دیلبازی بواسطه امان، خُدا شُکر کودن ره ختم به.
12چونکی اَ خیدمت، نه فقط مُقدّسینِ احتیاجاتَ برطرف کونه، بلکی باعث به خَیلیان، خُدایَ بی حد و حساب شُکر بُکونید. 13اَ خیدمت واسی مردوم خُدایَ جلال خوائید دَئن، چونکی شُمان نه فقط اعتراف کونیدی مسیحِ انجیلَ ایمان دَریدی بلکی اوشان و دیگرانَ اونچیِ درون کی دَریدی، شریک کونیدی. 14هطوئم خُدا پیله فیض خاطری کی شیمی سر نَئه، اوشان شیمی واسی ذوق و شوق اَمرا دُعا کونیدی. 15خُداوندَ اُ پیشکش واسی کی قابل گفتن نیه شُکر کونم.
Currently Selected:
دوّمتا نامه قُرنتیانِ ره 9: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
