روملیلَر 6
6
گُناها اؤلمَک و تارئیا زندلیگ ائدمَک
1پس نه دئیک؟ ائله بئله گُناه ائدَسیک تا فِیض فراوان اولا؟ 2اَلبت کی یو! نهیین بیزلَر کی گُناها اؤلدوک، حَلی اؤنونگ ایچینده زندلیگ ائده بیلیرَک؟ 3بئیه بیلمئیرَینز بیزیم واریمیز کی مَسیح عیسادا تَعمید غُسلی توتموشاک، اؤنونگ اؤلومونده تَعمید توتدوک؟ 4پس اؤلومده تَعمید توتماک اینان اؤنونگ اینان مَقبریه قؤیولدوک تا ائله اولهیین کی مَسیح، گؤیدهکی بووآنینگ شوکتی اینن اؤلومدَن دئرّیلدی، بیز دا زندلیگینگ تازّالیگینده قدم گؤتورَک.
5چون اگر بیر اؤنونگ اؤلومو لهیین اؤلومده اؤنونگ اینان بیر اؤلموشاک، یقین کی بیر اؤنونگ دئرّیلمَکی لهیین دئرّیلمَکده ده اؤنونگ اینان بیر اولاراک. 6بونو بیلیرَک کی قَدیمکی آداملیگ طبیعتیمیز، اؤنونگ اینان صَلیبه چکیلدی تا گُناه جسمی هئچ اولا، تا بئله بیز داها گُناهینگ غُلامی اولمایاک. 7بو خاطره کی او آدام کی اؤلموش، گُناهدان آزاد اولموش.
8ایندی اگر بیز مَسیح اینن اؤلموشَک، ایمان واریمیز کی اؤنونگ اینان دئرلیگ ده ائدهرَک. 9بیز بیلیرَک کی چون مَسیح اؤلومدَن دئرّیلمیش، داها هئچ وَقت اؤلمهز؛ اؤلوم داها اؤنونگ اوستونه هئچ حکمرانلیگ یوخو. 10چونکی او، اؤز اؤلومو اینن بیر دفعه همیشه ایچی گُناها اؤلدو و ایندیکی زندلیگینده، تارئ ایچی زندلیگ ائدیر.
11پس سیزده اؤزونزو گُناها اؤلو بیلَسینز و مَسیح عیسادا، تارئیا دئرّی. 12پس قؤیمانز کی گُناه سیزینگ فانی بدنلَرینزده حکم سؤره کی هَوی و هَوسلَریندَن اطاعت ائدَینز. 13بدنینزینگ عُضولارینی گُناه اَلینه وئرمَینز تا نادُرستلیگ وسیلهلَری اولالّار، بلکی او آداملار لهیین کی اؤلومدَن زندلیگه بؤکولموشلَر، اؤزونزو تارئ اَلینه وئرینز و بدنینزینگ عُضولارینی وئرینز تارئ اَلینه، تا صالحلیگ وسیلهلَری اولالّار. 14چونکی گُناه سیزه حکم سؤرمَز، بو سَبریه کی سیز شَریعت آلتیندا دهییلَینز بلکی فِیض آلتیندایانز.
صالحلیگ غُلاملاری
15پس نه؟ بو خاطره کی شَریعت آلتیندا دهییلَک بلکی فِیض آلتیندایاک، گُناه ائدَسیک؟ اَلبت کی یو! 16بئیه بیلمئیرَینز کی اگر اؤزونزو بیر اطاعت ائدن غُلام لهیین، بیرینه تَسلیم ائدَینز، اولیرانز او آدامینگ غُلامی کی بئلَسیندَن اطاعت ائدیرَینز، ایندی چه گُناه غُلامی کی اؤلومه ساری آپاریر، چه تارئدان اطاعت ائدمَک غُلامی کی صالحلیگه ساری آپاریر؟ 17آما تارئیا شُکر اولسون کی سیزلَر کی بیر زامان گُناه غُلاملاری ایدینز، ایندی اؤرهکدَن او رَقم تعلیمدَن اطاعت ائدیرَینز کی اؤنا باغلاندینز، 18و سیز گُناهدان آزاد اولماک اینان، صالحلیگ غُلاملاری اولموشانز.
19من، او ضَعیفلیگلَر سَبرسینه کی طَبیعتینزه گؤره وارینز، بَشر دانیشدیگی سؤزلَر اینن دانیشیرام. چون ائله اولهیین کی بیر زامان بدنینزینگ عُضولارینی بیر غُلام لهیین ناپاکلیگا و آرتیقتر پیسلیگه ساری آپاران، پیسلیگ اَلینه وئریردینز، ایندی دا بدنینزینگ عُضولارینی بیر غُلام لهیین قُدّوسلیگه ساری آپاران صالحلیگ اَلینه وئرینز. 20چون اوندا کی گُناه غُلاملاری ایدینز، صالحلیگدَن آزاد ایدینز. 21او زاماندا بو ایشلَرینگ گؤرمهکیندَن کی ایندی اوللار سَبرسینه خجیلَینز، نه کیسهیه قؤیدونز؟ چونکی او ایشلَرینگ آخیرعاقبتی اؤلوم دیر. 22آما ایندی کی گُناهدان آزاد اولموشانز و تارئ غُلاملاری اولموشانز، اَله گتیردیگینز ثَمر قُدّوسلیگه ساری آپاریر و آخیرعاقبتی اَبدی زندلیگ دیر. 23چونکی گُناهینگ مُزدی اؤلوم دیر، آما تارئنینگ عطاسی، اَبدی زندلیگ دیر رَبّیمیز مَسیح عیسادا.
Currently Selected:
روملیلَر 6: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
