روملیلَر 5
5
صُلح تارئ اینان ایمان طَریقیندَن
1پس بو خاطره کی بیز ایمان وَسیلهسینه صالح ساییلمیشاک، رَبّیمیز عیسا مَسیح طَریقیندَن تارئ اینان صُلح واریمیز. 2اؤنونگ طَریقیندَن، ایمان اینان بو فِیضی ده کی اوندا اُستواراک اَله گتیرمیشَک و او امیدده کی تارئ شوکتینه واریمیز شادلیگ ائدیرَک. 3نه ده فقط بو، بلکی زَجرلَریمیزده ده شادلیگ ائدیرَک، بو خاطره کی بیلیرَک زَجر، اِستقامت بارا گتیریر، 4و اِستقامت، شَخصیّت بارا گتیریر و شَخصیّت، امید بارا گتیریر؛ 5و امید بیزی خجیل ائدمئیر، چونکی تارئنینگ مُحبّتی، تارئنینگ قُدّوس روحو طَریقیندَن کی بیزه وئریلمیش اؤرهکلَریمیزه تؤکولموش.
6چون اوندا کی بیز حَلی ضَعیف ایدیک، مَسیح، مُناسب زاماندا تارئسیز آداملار ایچی اؤز جانینی وئردی. 7چون چوخ آز اولیر کی بیر آدام اؤز جانینی بیر صالح آدام ایچی وئره، هَرچند شاید، بیر آدامدا بو شهامت اولا کی بیر خوب آدام ایچی حتّی جانینی ده وئره. 8آما تارئ اؤز محبّتینی بیزه بئلهیین گؤرسَدیر کی، اوندا کی بیز حَلی گُناهکار ایدیک، مَسیح بیزیم ایچی اؤلدو. 9پس بو سبریه کی بیز ایندی اؤنونگ قانی وسیلهسینه صالح ساییلمیشاک، ناغاد آرتیق اؤنونگ طَریقیندَن تارئنینگ غَضّبیندَن نجات توتاراک. 10چونکی اگر اوندا کی بیز دُشمن ایدیک، اوغلونونگ اؤلومو اینان تارئ اینان صُلح وئریلدیک، ناغاد آرتیق ایندی کی تارئ اینان صُلح واریمیز، اوغلونونگ زندلیگی اینن نجات توتاراک. 11نه ده فقط بو، بیز رَبّیمیز عیسا مَسیح طَریقیندَن کی اؤنونگ وَسیلهسینه ایندی تارئ اینان صُلح وئریلمیشَک، تارئدا شادلیگ ائدیرَک.
اؤلوم آدَم طَریقیندَن گلدی، زندلیگ مَسیح طَریقیندَن
12پس ائله اولهیین کی گُناه، بیر آدام طَریقیندَن گلدی دنیا ایچینه و گُناه طَریقیندَن اؤلوم گلدی و بئله اؤلوم بوتون بَشر ایچینده داغیلدی، چونکی واری کَس گُناه ائدی، 13بو خاطره کی گرچَکدَن بوندان ایلَری کی شَریعت وئریله، گُناه دنیا ایچینده وار ایدی، آما بیر یئرده کی شَریعت اولمایا، گُناه دا حسابا گلمئیر. 14با بو حال، اؤلوم آدَمدَن، موسییانچاز حکم سؤردو، حَتّی اوللارا دا کی گُناهلاری آدَم خطاسی لهیین دهییلدی. آدَم، او آدامینگ نمونهسی ایدی کی گلهسی ایدی.
15آما تارئنینگ عَطاسی، او خطا لهیین دهییل. چونکی اگر بیر آدامینگ خطاسی سَبرسینه چوخ آداملار اؤلدولار، ناغاد آرتیق تارئنینگ فِیضی و او عَطا کی بیر آدامینگ، یعنی عیسا مَسیحنینگ فِیضی طریقیندَن دیر، چوخ آداملارا فراوان وئریلدی. 16بو عَطا، او بیر آدام یعنی آدَمینگ گُناهی نتیجهسی لهیین دهییل. چونکی بیر خطا قولونجوندان گلن محاکمه، مَحکومیت گتیردی، آما چوخ خطالارینگ قولونجیندان گلن عَطا، صالح ساییلماک گتیردی. 17چونکی اگر بیر آدامینگ خطاسی سبرسینه، او بیر آدام طَریقیندَن اؤلوم حکمرانلیگ ائدی، ناغاد آرتیق او آداملار کی تارئنینگ بی حَدّ و اندازه فِیضی و صالحلیگ عَطاسی بئللَرینه وئریلدی، او بیرسی آدام یعنی عیسا مَسیح طَریقیندَن زندلیگده حکم سؤرَرلَر.
18پس ائله اولهیین کی بیر خطا بوتون بَشری محکومیته ساری آپاردی، ائله اولهیین ده بیر صالح عَمل بوتون بَشری صالح ساییلماکا ساری و زندلیگه ساری آپاریر. 19چون ائله طور کی بیر آدامینگ اطاعت ائدمَزلیگی اینن چوخ آداملار گُناهکار اولدولار، ائله طور دا بیر آدامینگ اطاعت ائدمَکی اینن چوخ آداملار صالح اولارلار.
20ایندی، شَریعت گلدی تا خطا چوخ اولا، آما گُناه چوخ اولان یئرده، تارئنینگ فِیضی بی حَدّ و اندازه چوخ اولدو. 21تا ائله اولهیین کی گُناه اؤلومده حکم سؤردو، فِیض ده اَبدی زندلیگه ساری آپاران صالحلیگ واسطهسینه حکم سؤره، رَبّیمیز عیسا مَسیح طَریقیندَن.
Currently Selected:
روملیلَر 5: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
