روملیلَر 4
4
ابراهیم، ایمان طَریقیندَن صالح ساییلدی
1پس ابراهیم اَله گتیردیگی زاد بارهسینده نه دئیه بیلَرَک، ائله او ابراهیم کی جسمه گؤره بیزیم جَدّیمیز دیر؟ 2چونکی اگر ابراهیم اعمال طَریقیندَن صالح ساییلسایدی، بیر زاد واری ایدی کی بئلَسینه فَخر ائده، آما نه تارئ حُضوریندا. 3چون تورات کتابی نه دئییر؟ «ابراهیم، تارئیا ایمان گتیردی و بو اؤنونگ ایچی صالحلیگ ساییلدی.»
4ایندی، او آدام کی ایش گؤرور، بئلَسینه وئریلدیگی مُزد، اؤنونگ حَقّی دیر، هَدیه ساییلمئیر. 5او آدام کی بیر ایش گؤرمئیر، بلکی تارئیا کی تارئسیز آداملاری صالح ساییر توکّل ائدیر، ایمانی بئلَسی ایچی صالحلیگ ساییلیر. 6ائله اولهیین کی داوود پادشاه ده او آدامینگ مُتبارکلیگیندَن دئییر کی تارئ اؤنو بدون بو کی عَمللَرینی در نَظر توتا صالح ساییر:
7«خوش او آداملارینگ احوالینا کی پیس عَمللَری باغیشلاندی،
و گُناهلارینینگ اوستو اؤرتولدو؛
8خوش او آدامینگ احوالینا کی رَب اؤنونگ گُناهسینی سایمایا.»
9بو خوش اَحواللیگ فقط سُنّت اولانلار یعنی یهودیلار ایچی دیر یا سُنّت اولمایانلار یعنی غیرییهودیلار ایچی دا وار؟ بو سَبریه کی بیز دئییرَک ایمان، ابراهیم ایچی صالحلیگ ساییلدی. 10پَس بو نه شرایطده اؤنونگ ایچی ساییلدی؟ سُنّت اولماکیندان ایلَری ایدی یا سُنّتیندَن سورا ایدی؟ سُنّت اولماکیندان سورا دهییلدی، بلکی سُنّتیندَن ایلَری ایدی. 11سُنّتینگ نیشاناسی ابراهیما وئریلدی تا بیر مُهر اولا او صالحلیگه کی سُنّت اولماکیندان ایلَری، ایمان طریقیندَن واریدی. هَدف بو ایدی تا تارئ اؤنو ائده واری او آداملارینگ بووآسی کی سُنّتسیز ایمان گتیریرلَر، تا بئله صالحلیگ اوللار ایچی دا ساییلا، 12و تا ابراهیمی ائده سُنّت اولانلارینگ بووآسی یعنی اوللار کی نه فقط سُنّت اولموشلار، بلکی ایمان یولوندا ده یول گئدیرلَر، ائله او یولدا کی جَدّیمیز ابراهیم بوندان ایلَری کی سُنّت اولا، او یولدا قدم گؤتورورموش.
وَعده، ایمان طَریقیندَن یئرینه ائتیشیر
13چونکی او وَعده کی ابراهیما و اؤنونگ نَسلینه وئریلدی کی، دنیایی میراثا آپارارلار، شَریعت طریقیندَن دهییلدی، بلکی او صالحلیگ طریقیندَن ایدی کی ایمان اوستونه اُستوار دیر. 14چونکی اگر شَریعت طرفدارلاری وارث اولسالار، ایمان باطل اولور و وَعده هئچ اولور. 15بو سَبریه کی شَریعت، تارئ غَضّبینی گتیریر، آما شَریعت اولمایان یئرده، شَریعتی آیاق آلتینا قؤیماک دا یوخ.
16بونونگ ایچی ده، وَعدهنینگ تَکّهسی ایمانا دیر تا وَعده فِیض اوستونده اولا و بیر ضمانت اولا ابراهیم پیغمبرینگ بوتون نَسلینه، یعنی نه فقط شَریعت طرفدارلارینا، بلکی اوللارا دا کی ابراهیمینگ ایمانیندا شریک دیرلَر، ائله او ابراهیم کی واریمیزینگ بووآمیز دیر. 17ائله اولهیین کی تورات کتابیندا یازیلمیش: «من، سَنی چوخ مِلّتلَرینگ بووآسی ائدمیشم.» تارئنینگ حُضوریندا ده ائله بئلهیین دیر، ائله او تارئ کی ابراهیم بئلَسینه ایمان گتیردی، ائله او تارئ کی اؤلویو، دئرّیدیر و یوخلیگلاری، وارلیگه چاغیریر.
18بیر یئرده کی امیددَن هئچ اَثر یوخ ایدی، ابراهیم امید اینان ایناندی کی چوخ ملّتلَرینگ بووآسی اولاسی. ائله اولهیین کی بئلَسینه دئییلمیشدی کی: «سَنینگ نَسلینگ ائله بئلهیین اولور.» 19ابراهیم اوندا کی اؤز بدنینه کی داها بیر اؤلو بدن لهیین ایدی باخدی، ایماندا ضعیف اولمادی، چونکی او تقریبا یوز یاشیندا ایدی، یا دا اوندا کی سارانینگ دوغماز رَحمینه باخدی. 20ابراهیم تارئنینگ وَعدهسینه ایمانسیزلیگ ائدمَک اینن شَک ائدمهدی، بلکی ایماندا قُوّتلی اولدو و تارئیا عِزّت ائدی. 21او تمام و کمال یقین واری ایدی کی تارئ باشاریر وئردیگی وَعدهیه وفا ائده. 22بونونگ ایچی دیر کی ابراهیمینگ ایمانی، «بئلَسی ایچی صالحلیگ ساییلدی.» 23آما بو سؤز کی دئییر، «اؤنونگ ایچی ساییلدی»، فقط اؤنونگ خاطرینه یازیلمادی، 24بلکی بیزیم خاطریمیزه ده یازیلدی. بیزلَر ایچی دا ساییلار، بیزلَر کی اؤنا کی رَبّیمیز عیسایی اؤلولَردَن دئرّیتدی، ایمان واریمیز. 25ائله او عیسا کی بیزیم خطالاریمیز ایچی تَسلیم اولوندو و صالح ساییلماکیمیز ایچی دئرّیلدی.
Currently Selected:
روملیلَر 4: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
