روملیلَر 3
3
تارئ وفالی دیر
1پس یهودیلیگینگ مَنفعتی نه دیر؟ یا دا سُنّت اولماکینگ نه اَرزش واری؟ 2هَر لَحاظدان چوخ. اَوّل بو کی، تارئنینگ کلامی یَهودیلارا اَمانت وئریلمیش.
3اگر اوللارینگ بیر پاراسی وفالی دهییللَردی نه؟ بئیه اوللارینگ وفاسیزلیگلاری، تارئنینگ وفالیلیگینی باطل ائدیر؟ 4اَلبت کی یو. تارئ، گرچَکی دئیَن دیر، حتّی اگر واری آداملار یالانچی اولالّار. ائله اولهیین کی زَبور کتابیندا یازیلمیش:
«پس بئله، هَرنه کی دئیَنگ، دؤز دیر،
و حکم ائدنده، غالب گلیرَینگ.»
5آما اگر بیزیم نادُرستلیگیمیز گؤرسَدیر کی تارئ دؤز دیر، نه دئیهسیک؟ تارئ ظالم دیر کی بیزه غَضّب ائدیر؟ بَشر یولونا گؤره دانیشیرام. 6اَلبت کی یو. چونکی اوندا تارئ نهیین باشاراردی دنیایا حکم ائده؟ 7آما اگر مَنیم یالانیم طریقیندَن، تارئنینگ حَقیقتی آرتیق شوکت توتیر، پس نه ایچی من حَلی بیر گُناهکار لهیین مَحکوم اولیرام؟ 8و نه ایچی دئمهیَک: «گلینز پیسلیگ ائدَک تا خوبلیگ یولوموزا گله»؟ ائله اولهیین کی بیر پارا آداملار بیزه بوهتان ووریرلار کی بیز بو گپی چالیراک. اوللارینگ مَحکوم اولماکی حَق دیر.
هئچ کَس صالح دهییل
9پَس نه؟ بیز یهودیلار باقّی کَسدَن یئیتَرَک؟ یو، اصلاً. چونکی ائله ایندیسی ده ادّعا ائدمیشَک کی واری کَس، هم یهودیلار، هم دا غیرییهودیلار گُناه آلتیندا دیرلَر. 10ائله اولهیین کی مُقدّس یازیلیلاردا یازیلمیش:
«هئچکَس صالح دهییل، حتّی بیر نفر ده.
11بیر آنگلایان آدام یوخ دور؛
تارئ قولونجوندا اولان آدام یوخ دور.
12واری کَس یولدان چیخمیشلَر؛ واری بئلینه باطل اولموشلار؛
خوبلیگ ائدَن آدام یوخ دور،
حتّی بیر نفر.»
13«خیریقلَری بیر اوستو آچیق گور دور؛
دیللَرینی، آلداتماک ایچی ایشلهدیرلَر.»
«اَفعی زَهری دوداقلاری آلتیندا دیر.»
14«آغیزلاری قارقوشدان و آچّی سؤزدَن دؤلو دور.»
15«قیچلَری قان تؤکمک ایچی فِرز دیر؛
16هَر یئره کی گئدیرلَر ویرانهلیگ و بدبختلیگ قؤیورلار،
17و صُلح و سلامتلیگ یولونو تانیمامیشلار.»
18«تارئدان قورخماک اوللارینگ گؤزلرینده یوخ دور.»
19ایندی بیز بیلیرَک کی هَر نه کی شَریعت دئییر، اوللارا کی شَریعت آلتیندا دیرلار دئییر، تا بئله هَر آغیز باغلانا و بوتون دنیا تارئیا جوابگو اولالّار. 20بو خاطره کی شَریعت عَمللَرینی یئرینه گتیرمَک اینن هئچ بَشر تارئ گؤزونده صالح ساییلماز، چونکی شَریعت دیر کی گُناهی تانیدیریر.
تارئنینگ عدالتی، ایمان طریقیندَن
21آما ایندی، او صالحلیگ کی تارئدان دیر آشکار اولموش کی شَریعته باغلی دهییل، ائله اولهیین کی شَریعت و پیغمبرلَر یازیلیلاری بونا گواهلیگ وئریرلَر. 22او صالحلیگ کی تارئدان دیر، عیسا مَسیحه اولان ایمان طَریقیندَن دیر، هَر کَس ایچی کی ایمان گتیره. چونکی هئچ فرق یوخ دور: 23بو خاطره کی واری کَس گُناه ائدمیشلَر و تارئنینگ شوکتینده آز گتیریرلَر، 24و اؤنونگ فِیضی اینن کی بیر هَدیه لهیین دیر او آزادلیگ طریقیندَن کی مَسیح عیسادا دیر، صالح ساییلیرلار. 25ائله او مَسیح عیسا کی تارئ اؤنو ایلَرتردَن قؤیدو تا او قُربانلوق اولا کی اؤنونگ قانی اینان بیزیم گُناهلاریمیز باغیشلانیر کی بو ایمان طَریقیندَن اَله گلیر. بو، تارئنینگ عدالتینی گؤرسَدمَک ایچی اولوندو. چونکی تارئ اؤز تارئلیگ صَبری اینن او گُناهلار اوستونه کی ایلَرتر اولونموش ایدی گؤز یومدو. 26بو ایش اولوندو تا اؤز عدالتینی ایندیکی زاماندا گؤرسده، تا بئله عادل اؤزو اولا و او آدامی دا کی عیسایا ایمان واری صالح سایا.
27اگر بئله دیر پس داها بیز نمنهیه فَخر ائدَک؟ هئچنهیه. نه رَقم شَریعته گؤره؟ اعمال شَریعتینه گؤره؟ یو، بلکی ایمان شَریعتینه گؤره. 28بو خاطره کی بیزیم اعتقادیمیز بو دور کی بیر آدام ایمان طَریقیندَن صالح ساییلیر، نه شَریعت عَمللَرینینگ یئرینه ائتیردمَکی اینن. 29بئیه تارئ فقط یهودیلارینگ تارئسی دیر؟ بئیه غیری یهودیلارینگ تارئسی ده دهییل؟ اَلبت کی غیری یهودیلارینگ ده تارئسی دیر، 30چونکی تارئ واحد دیر و بو تارئ سُنّت اولانلاری یعنی یهودیلاری ایمان اینان و سُنّت اولمایانلاری یعنی غیرییهودیلاری دا ائله او ایمان طَریقیندَن صالح سایار. 31پس بیز شَریعتی بو ایمان اینان یوموروراک؟ اَلبت کی یو! برعکس، بیز شَریعتی اُستوار ائدیرَک.
Currently Selected:
روملیلَر 3: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
