روملیلَر 2
2
تارئنینگ حکم ائدمَکی عِدالتلی دیر
1پس سَن، ای آیری کَسه حکم ائدَن آدام، هَر کَس کی اولانگ هئچ ماهان یوخونگ. چونکی هَر نهده کی آیری کَسه حکم ائدیرَنگ، اؤزونگو مَحکوم ائدیرَینگ؛ بو خاطره کی سَن، ای حکم ائدَن، اؤزونگ ائله او ایشلَری گؤرورَنگ. 2بیلیرَک کی بئلهیین ایشلَر گؤرَن آداملار ایچی، تارئنینگ حکم ائدمَکی حَق دیر. 3سَن، ای آدام کی بئلهیین ایشلَری گؤرَنلَره حکم ائدیرَنگ و اؤزونگ ائله او ایشلَری گؤرورَنگ، گمان ائدیرَنگ کی تارئنینگ حکم ائدمَکیندَن قَچهرَنگ؟ 4یا دا اؤنونگ بی حَدّ و اندازه مهربانلیگینی و تَحمّلینی و صَبرینی حَقیر ساییرانگ و بیلمئیرَنگ کی تارئنینگ مهربانلیگینی بونونگ ایچی دیر کی سَنی توبهیه گتیره؟
5آما سن سَر سختلیگینگ و اؤرهکینگینگ توبه ائدمَزلیگی سَبرسینه، غَضّب گؤنو ایچی اؤزونگه غَضّب آمبار ائدیرَنگ، او گؤنده کی تارئنینگ عدالتلی حکم ائدمَکی آشکار اولور. 6تارئ «هَر کَسینگ عَوضینی، او آدامینگ اؤز عَمللَرینه گؤره وئرَر.» 7او آداملارا کی صَبر اینن خوبلیگ ائدمَکده، عِزّت و حُرمَت و فانی اولمازلیگ قولونجوندا دیرلار، اَبدی زندلیگ وئرَر؛ 8آما او آداملار ایچی کی فقط اؤز مَنفعتلَری قولونجوندا دیرلار و حَقیقتدَن اطاعت ائدمئیرلَر بلکی نادُرستلیگدَن فرمان آپاریرلار، غَضّب و خِشم اولور. 9هَر آداما کی پیسلیگ ائدیر، مُصیبت و پریشانلیگ گلَر، اَوّل یهودی، اوندان سورا ده غیری یهودی، 10آما هَر آداما کی خوبلیگ ائدیر، عِزّت و حُرمَت و صُلح و سلامتلیگ گلر، اَوّل یهودی، اوندان سورا ده غیری یهودی. 11بو خاطره کی تارئ فرق قؤیمئیر.
12چونکی واری او آداملار کی شَریعتی یوخلاری و گُناه ائدمیشلَر، شَریعتسیز دا هلاک اولارلار و واری او آداملارا کی شَریعت آلتیندا دیرلار و گُناه ائدمیشلَر، شَریعت اینن حکم اولونار. 13چونکی شَریعتی ائشیدَنلَر دهییللَر کی تارئ حُضوریندا صالح دیرلار، بلکی اوللار کی شَریعته عَمل ائدیرلَر صالح ساییلارلار. 14چونکی وختی غیری یهودیلار کی شَریعتی یوخلاری، طبیعت اوستوندَن شَریعت حکملارینی یئرینه ائتیشتیریرلَر، اؤزلَری، اؤزلَرینه شَریعت دیرلَر، با بو حال کی شَریعتی یوخلاری. 15اوللار گؤرسَدیرلَر کی شَریعتینگ عَملی اؤرهکلَری اوستونده یازیلمیش، ائله اولهیین کی وجدانلاری دا بونا گواهلیگ وئریر و اوللارینگ بیر بیر اینن ضِدّ اولان فکرلَری بئللَرینی یا محکوم ائدیر یا تبرئه ائدیر. 16بو او گؤن اولونار کی من اعلام ائتدیگی اینجیله گؤره، تارئ آداملار اؤرهکینینگ سِرّلَرینه مَسیح عیسا طریقیندَن حکم ائدیر.
17آما اگر سَن اؤزونگه دئییرَینگ یَهودی و شَریعته تَکّه ائدیرَینگ و بوندان کی تارئیی تانیرانگ فَخر ائدیرَنگ 18و تارئنینگ سئدیگینی بیلیرَنگ و بو سبریه کی شَریعتدَن تعلیم توتموشانگ ائنگ خوب زادی تصدیق ائدیرَینگ، 19و اگر بوندان مطمئننينگ کی سَنینگ اؤزونگ کور ایچی بیر بلدچییَنگ، اوللار ایچی کی قَرنگیلیگده دیرلَر بیر ایشّیقَینگ، 20نافَهملَره درس وئرَن و اوشاقلارا معلّمینگ و شَریعتی وارینگ کی ائله مَعرفت و حَقیقتینگ اؤزو دور، 21پس سَن کی باقّی آداملارا اؤرگدیرَینگ، اؤزونگه هئچنه اؤرگدمئیرَینگ؟ سَن کی اوغورلوق ضِدّینه تعلیم وئریرَینگ، اؤزونگ اوغورلوق ائدیرَنگ؟ 22سَن کی دئییرَینگ هئچکَس زِنا ائدمهیهسی، اؤزونگ زِنا ائدیرَینگ؟ سَن کی بُتلاردان نفرت وارینگ، اؤزونگ مَعبدلَری غارت ائدیرَینگ؟ 23سَن کی شَریعته فَخر ائدیرَینگ، شَریعتی قیرمَک اینن تارئیا حُرمَتسیزلیگ ائدیرَینگ؟ 24چون ائله اولهیین کی پیغمبرلَر کتابیندا یازیلمیش: «سیزینگ سَبرینزه، غیرییهودیلار آراسیندا تارئنینگ آدینا کُفر دئییلیر.»
25چونکی سُنّت اولماک گرچکدَن اوندا اَرزش واری کی سن شَریعتدَن اطاعت ائدَینگ. آما اگر سن شَریعتی قیرَّینگ، بونونگ لهیین دیر کی هئچ سُنّت اولماموشانگ. 26پس اگر بیر کیشی کی سُنّت اولماموش، شَریعت حکملارینا عَمل ائدیر، بئیه اؤنونگ سُنّت اولمازلیگی اؤنا سُنّت اولدوک ساییلمئیر؟ 27پس او کی جسمینده سُنّت اولماموش آما شَریعته عَمل ائدیر، سَنی مَحکوم ائدَر، سَنی کی شَریعتده یازیلان حکملاری وارینگ و سُنّت اولموشانگ آما شَریعتی قیریرَنگ.
28بو خاطره کی، نه او آدام کی ظاهرده یهودی دیر، گرچکدَن بیر یهودی دیر، نه ده او سُنّت اولماک کی ظاهرده و جسمده دیر، گرچکدَن سُنّت اولماک دیر. 29بلکی یهودی او آدام دیر کی باطِنده یهودی اولا و سُنّت اولماک ده بیر زاد دیر کی اؤرهکدَن دیر کی تارئ روحو طریقیندَن اولونیر نه بیر یازیلی طریقیندَن. بیر بئلهیین آدامدان، تارئ تعریف ائدَر نه انسان.
Currently Selected:
روملیلَر 2: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
