لوقا 4
4
عیسانینگ وَسوَسه اولونماگی
1عیسا تارئنینگ قُدّوس روحوندان دؤلو، اوردون چئییندن گئری دؤندو و تارئ روحو اؤنو بیابانا آپاردی. 2اؤردا اِبلیس قیرخ گؤن اؤنو وَسوَسه ائدیردی. عیسا او گؤنلَرده هئچنه یئمهدی و او مُدّتینگ آخیریندا، چوخ آج ایدی.
3اِبلیس عیسایا دئدی: «اگر سَن تارئ اوغلویانگ، بو داشا فرمان وئر تا چؤرهک اولا.» 4عیسا اؤنا جواب وئردی: «توراتدا یازیلمیش کی، ”آدامینگ دئرّیلیگی فقط چؤرهکه باغلی دهییل.“» 5اوندان سورا اِبلیس عیسایی بیر اوجا یئره آپاردی و بیر آندا دنیانینگ واری پادشاهلیگلارینی اؤنا گؤرسَتدی 6و بئلَسینه دئدی: «بوتون بو اِقتداری و اوللارینگ بوتون شوکتینی سنه وئرهرَم، چونکی بوللار منیم اختیاریما قؤیولموش و هَر کَسه کی سئیَم وئرهرَم. 7اگر کی سَن مَنی پَرست ائدَینگ، واری سَنینگ اولور.»
8عیسا دا اؤنا جواب وئردی: «توراتدا یازیلمیش کی: ”اؤز رَب تارینگی پَرست ائد و فقط اؤنا قوللوق ائد.“»
9اوندان سورا اِبلیس عیسایی اورشلیم شَهرینه آپاردی و اؤنو مَعبدینگ ائنگ اوجا یئرینه قؤیدو و بئلَسینه دئدی: «اگر سَن تارئ اوغلویانگ، اؤزونگو بوردان آشاغی آت، 10چونکی مُقدّس یازیلیلاردا یازیلمیش کی:
”او، اؤز فرشتهلَرینه سَنینگ بارهینگده فرمان وئرهر
تا سَنی حفظ ائدَلّر“
11و ”اوللار سَنی اؤز اَللَری اوستونده آپارارلار،
تا ائدمئیه قیچینگ بیر داشا دَیه.“»
12عیسا اؤنا جواب وئردی: «توراتدا یازیلمیش کی: ”اؤز رَب تارینگی امتحان ائدمه.“» 13اِبلیس، واری بو وَسوَسهلَری تؤکدندَن سورا، بیر آیری فُرصت بولانانچاز، عیسا یانیندان گئتدی.
عیسا خدمتینینگ باشلانماگی
14عیسا تارئ روحونونگ قوّتی اینَن جَلیل ولایتینه دؤندو و او دیارینگ واری یئرینده اؤنونگ گپی ایدی. 15عیسا یهودیلارینگ عبادتگاهلاریندا اوللارا تَعلیم وئریردی و خَلخینگ واریسی اوندان تعریف ائدیرلَردی.
ناصِره خَلخی عیسایی رَد ائدیرلَر
16عیسا بویوک اولدوگو یئره، یعنی ناصِره شَهرینه گلدی و همیشهکی رسمی اوستوندَن، یهودیلارینگ مُقدّس شنبه گؤنونده، اوللارینگ عبادتگاهینا گئتدی و توردو آیاقی تا تارئ کلامینی اوخویا. 17اِشعَیای پیغمبرینگ طومارینی عیسایا وئردیلَر. او، طوماری آچاندا، اؤرایی بولدو کی یازیلمیش:
18«رَبّینگ روحو مَنده دیر،
چونکی او مَنی مَسح ائدمیش و مَعین ائدمیش
تا یوخسوللارا خوش خبر وئرَم.
مَنی یوللامیش تا اَسیرلَرینگ آزادلیگینی
و کورلارینگ گؤزلَری آچیلماگینی اعلام ائدَم،
و مظلوملاری آزاد ائدَم،
19و رَب لُطفینینگ ایلینی اعلام ائدَم.»
20عیسا طوماری باغلادی و عبادتگاهینگ سرپرستینه وئردی و اوتوردو. عبادتگاهدا واریکَسینگ گؤزو اوندایدی. 21عیسا اوللار اینان دانیشماکا باشلادی و دئدی: «بوگؤن بو یازیلی ائله ائشیتدیگینز وخت یئرینه ائتیشدی.» 22بوتون اؤردا اولان آداملار اوندان تعریف ائدیرلَردی و اؤنونگ آغیزیندان چیخَن فِیضلی سؤزلَردن حیران قالمیشلاردی. اوللار دئییرلَردی: «بئیه بو کیشی یوسف اوغلو دهییل؟» 23عیسا اوللارا دئدی: «اَلبَت سیز بو مَثَلی مَنه دئیهرَینز کی: ”ای طَبیب، اؤزونگو شفا وئر.“ بیز واری او ایشلَر بارهسینده کی کَفَرناحوم شَهرینده گؤرموشَینگ، ائشیدمیشَک، او ایشلَری بوردا اؤز شَهرینگده ده گؤر.“» 24و دئدی: «گرچَکینی سیزه دئییرم، هئچ پیغمبری اؤز شَهرینده قبول ائدمئیرلَر. 25حَقیقتی سیزه دئییرم کی، اِلیاس پیغمبر زامانیندا کی اؤچ ایل و آلتی آی گؤیلَر باغلاندی و بوتون او سرزمینده بیر سَخت قَحطلوق دؤشدو، تارئ خَلخی آراسیندا چوخ دول آرواد وار ایدی. 26آما اِلیاس اوللارینگ هئچ بیرسینینگ یانینا یوللانمادی، بهغیری او دول آرواد یانینا کی صِیدون سرزمینینینگ صَرفه شَهرینده ایدی. 27اِلیشَع پیغمبر زامانیندا دا تارئ خَلخی آراسیندا چوخ جُذاملی آدام وار ایدی، آما سوریهلی نَعماندان آیری، اوللارینگ هئچ بیری جُذامدان شفا توتمادی.» 28واری عبادتگاهدا اوتوران آداملار، بو سؤزلَرینگ ائشیدمَکیندَن غَضّبلَندیلَر. 29اوللار توردولار آیاقی، عیسایی شَهردَن یازّیا سالدیلار و او داغینگ کانینا کی شَهر اؤنونگ اوستونه بَنا اولموشدو، آپاردیلار تا عیسایی اؤردان آتالّار آشاغی. 30آما عیسا اوللارینگ آراسیندان گچدی و گئتدی.
عیسا بیر شیطانلی روحو بیر آدامدان یازّیا چیخارتیر
31عیسا کَفَرناحوم شَهرینه کی جَلیل ولایتینینگ بیر شَهری ایدی، گلدی و یهودیلارینگ مُقدّس شنبهسی گؤنونده خَلخه تَعلیم وئردی. 32جماعت اؤنونگ تَعلیملَریندَن مات قالمیشلار ایدی بو سَبریه کی اؤنونگ سؤزونده اِقتدار وار ایدی. 33عبادتگاه دا بیر کیشی ایدی کی بیر شیطانلی روح اؤنو اَسیر ائدمیشدی. او بَغیریردی و دئییردی: 34«ای ناصِرهلی عیسا، بیزیم اینَن نه ایشینگ وار؟ آیا گلمیشَینگ بیزی هلاک ائدَینگ؟ بیلیرَم سَن کیمَینگ، سَن، تارئنینگ قُدّوسیینگ.» 35آما عیسا اؤنا تَشَر ووردو و دئدی: «بی سَس اول و بو آدامدان یازّیا چیخ.» او شیطانلی روح خَلخ گؤزو دَمینده او آدامی یئره ووردو و بدون بو کی اؤنا ضرر وورا، اوندان یازّیا چیخدی. 36واریکَس حیران قالمیشلاردی و بیر بیره دئییرلَردی: «بو نهیین کلام دیر؟ شَریر روحلارا، اِقتدار و قُدرت اینَن فرمان وئریر، اوللار دا آداملاردان یازّیا چیخیرلَر.» 37بئله عیسانینگ آد و سانی بوتون او منطقهلَرده داغیلدی.
عیسا چوخ آداملاری شفا وئریر
38عیسا توردو آیاقی، عبادتگاهدان یازّیا چیخدی و شَمعون ائوینه گئتدی. شَمعون آروادینینگ آناسی سَخت ایسیتمیشدی. اوللار عیسایا یالواردیلار کی او آروادا کؤمَک ائده. 39عیسا اؤنونگ باشی ایجینه توردو و ایسیتمهیه تَشَر ووردو. اؤنونگ ایسیتمهسی کَسیلدی و فوری توردو آیاقی و اوللاردان پذیرالیگ ائدی. 40گؤن باتاندا واری او آداملاری کی رَقم به رَقم مَریضلیگ وارلاریدی، عیسا یانینا گتیردیلَر، عیسا آدام باشینا، اوللار اوستونه اَل قؤیدو و اوللاری شفا وئردی. 41چوخ آداملاردان دا شیطانلی روحلار یازّیا چیخدی، اوللار بَغیریرلَردی کی: «سَن تارئ اوغلویانگ!» آما عیسا اوللارا تَشَر ووردو و قؤیمادی دانیشالّار بو سَبریه کی اوللار بیلیرلَردی کی عیسا، ائله او وَعده وئریلَن مَسیح دیر.
عیسا عبادتگاهلاردا تَعلیم وئریر
42سَحر چاغی، عیسا بیر بیابان یئره گئتدی. خَلخ عیسا قولونجونا گزیرلَردی و او اولان یئره ائتیشنده سمئیرلَردی قؤیالّار کی عیسا اوللارینگ یانیندان گئده. 43آما عیسا اوللارا دئدی: «من تارئ پادشاهلیگینینگ خوش خَبرینی، آیری شَهرلَره ده وئرهسیم بو سَبریه کی من ائله بونونگ ایچی یوللانمیشام.» 44و یهودیه ولایتینینگ عبادتگاهلاریندا تَعلیم وئریردی.
Currently Selected:
لوقا 4: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
