لوقا 5
5
اَوّلکی شاگردلَر
1بیر گؤن عیسا جِنیسارِت دریاچهسینینگ قیراقیندا تورموشدو و بیر هَزَره آدام، تارئ کلامینی ائشیدمَک ایچی اؤنونگ دئییرینه سیخیلمیشلَردی. 2عیسا گؤردو کی ایکّی قایق دریاچه قیراقیندا دیر و بالیق توتانلار قایقدن ائنمیشلَر و تورلارینی یویورلار. 3عیسا قایقلَرینگ بیرینه کی اؤنونگ اَیهسی آدی شَمعون ایدی میندی و اوندان سئدی کی قایقی ساحِلدن بیر آز آرالی ائده. عیسا قایق ایچینه اوتوردو و اؤردان خَلخه تَعلیم وئردی. 4سؤزلَرینی تؤکدندَن سورا، شَمعونا دئدی: «قایقی آپار سویونگ گود یئرینه و بالیق توتماک ایچی، تورلارینزی آتینز سویا.» 5شَمعون جواب وئردی: «اُستاد، بیز بوتون گئجهیی چوخ زَحمت چَکدیک آما هئچ نه توتمادیک، آما سَنینگ گپینگ خاطرینه، من تورلاری سویا آتارام.» 6اوندا کی بو ایشی گؤردولَر، ائله بالیق توتدولار کی آز قالمیشدی تورلار ییرتیلَلَّر. 7پس اؤز شَریکلَرینه کی او بیر داها قایقده ایدیلَر اشاره ائدیلَر تا بوللارینگ کؤمَکینه گلَلَّر. اوللار دا گلدیلَر و قایقلَرینگ ایکّیسینی ائله بالیقدان دؤلدوردولار کی آز قالمیشدی قایقلَر سویا باتالّار. 8شَمعونِ پِطرُس بونو گؤرَنده، عیسانینگ قیچینه دؤشدو و دئدی: «یا رَب، مندَن ایراق تور، چونکی من بیر گُناهکار آدامام.» 9شَمعون و واری اوللار کی بئلَسیاینن ایدیلَر، بو بالیق توتماک ایشیندَن مات قالمیشلاردی. 10زِبِدی اوغوللاری، یَعقوب و یوحَنّا کی شَمعون شَریکلَری ایدیلَر ده ائله بو حالی وارلاریدی. عیسا شَمعونا دئدی: «قورخما؛ بوندان سورا آداملاری بالیق لهیین صِید ائدهرَینگ.» 11اوللار قایقلَرینی ساحِله چَکدیلَر، واری زادی ویل ائدیلَر و عیسا قولونجوندان گئتدیلَر.
بیر جُذاملی کیشینینگ شفاسی
12اوندا کی عیسا شَهرلَرینگ بیرینده ایدی، بیر کیشی کی جُذام اؤنونگ بوتون وجودینی گؤتورموشدو، عیسا یانینا گلدی. او جُذاملی، عیسایی گؤرَنده، ایز اوستونه یئره دؤشدو و یالواردی کی: «آقا، اگر سئیَنگ، منی بو مَرضدن شفا وئرهبیلَرَینگ» 13عیسا اؤز اَلینی اوزاتدی و اؤنونگ اوستونه قؤیدو و دئدی: «سئیرَم، شفا توت!» ائله او آن او آدام جُذامدان شفا توتدو. 14عیسا اؤنا تاپشیردی کی هئچکَسه هئچنه دئمهیه، آما بونو ده دئدی کی: «گئد و اؤزونگو کاهِنا کی مَعبدینگ عالِمی دیر، گؤرسَد و طاهر اولماگینگ ایچی، موسای پیغمبر فرمان وئردیگی قُربانلوقی تقدیم ائد، تا اوللارا بیر گواهلیگ اولا.» 15آما با بو حال، گئنه ده عیسا ایشلَرینینگ خَبری آرتیق داغیلیردی، ائله کی بویوک-بویوک جمعیتلَر ییغیلیرلَردی تا اؤنونگ سؤزلَرینی ائشیدَلَّر و مَریضلیگلَریندن شفا توتالّار. 16آما عیسا بیابان یئرلَره گئدیردی و دُعا ائدیردی.
بیر فَلجینگ شفاسی
17او گؤنلَرینگ بیرینده کی عیسا تَعلیم وئریردی، فَریسی فِرقهسینینگ عالِملَری و تورات معلّملَری، جَلیل و یهودیه ولایتلَرینینگ واری کَندلَریندَن و اورشلیم شَهریندَن، گلمیشلَردی و اؤرا اوتورموشلاردی. رَبّینگ قُدرتی عیسا اینان ایدی تا مَریضلَری شفا وئره. 18ائله بو موقع، نئچه کیشی بیر فَلج آدامی یئری ایچینده گتیریرلَردی و سئیرلَردی کی اؤنو گتیرَلَّر ایچری و عیسا جلوسینا قؤیالّار. 19آما جمعیتینگ چوخ اولدوگو سَبرسینه، یول بولمادیلار تا گلَلَّر ایچری. پس ائوینگ پُشتبامینا چیخدیلَر و او فَلج آدامی یئری اینَن، سَقفینگ سُفاللاری آراسیندان، آشاغی سالّادیلار و اورتایا عیسا جلوسیندا یئره قؤیدولار. 20عیسا اوللارینگ ایمانینی گؤرَنده دئدی: «ای کیشی، گُناهلارینگ باغیشلاندی.» 21تورات معلّملَری و فَریسی فِرقهسینینگ عالِملَری اؤزلَری اینَن بئله دئییرلَردی: «بو آدام کیم دیر کی کُفر دئییر؟ تارئنینگ اؤزوندَن آیری، کیم دیر کی گُناهلاری باغیشلایا بیله؟» 22آما عیسا اوللارینگ فکرلَرینی آنگلادی و اوللارا جواب وئردی: «نه ایچی اؤرهکینزده بئله فکر ائدیرَینز؟ 23هانیسی آسانتر دیر؟ ”سَنینگ گُناهلارینگ باغیشلاندی“ دئمک یا ”تور آیاقی یول گئد“ دئمک؟ 24آما بونونگ ایچی کی بیلَینز، انسان اوغلو، یئر اوستونده اِقتدار واری تا گُناهلاری باغیشلایا» - او فَلج کیشییه دئدی: «سَنه دئییرم، تور آیاقی، تَک و تولینگی ییغ و ائوینگه گئد.» 25او کیشی بیر آندا، اوللارینگ گؤزلَری دَمینده، توردو آیاقی، تَک و تولینی ییغدی و تارئیی حمد و ثنا ائده-ائده ائوینه گئتدی. 26بوتون اؤرداکی آداملار حیران قالمیشلاردی و تارئیی حَمد و ثنا ائدیرلَردی و قورخو اینن دئییرلَردی: «بوگؤن، عَجیب ایشلَر گؤزوموز اینن گؤرموشاک.»
عیسا لاوییی چاغیریر
27اوندان سورا، عیسا یازّیا چیخدی و بیر لاوی آدلی باج ییغَنی کی باجخانهدا اوتورموشدو گؤردو و اؤنا دئدی: «مَنیم آردیم سورا گَل» 28او دا توردو آیاقی، واری زادی ویل ائدی و عیسانینگ قولونجیندان گئتدی. 29لاوی اؤز ائوینده عیسا ایچی بیر بویوک قوناقلوق وئردی. چوخ باج ییغَنلَر و آیری آداملار دا سُفره قیراقیندا، اوللار اینان اوتورموشلاردی. 30فَریسی فِرقهسینینگ عالِملَری و اوللارینگ تورات معلّملَری عیسا شاگردلَرینه توغّولاییرلاردی و دئییرلَردی: «نه ایچی سیز باج ییغَنلَر و گُناهکارلار اینان یئییرَینز و ایچیرَینز؟» 31عیسا اوللارا جواب وئردی و دئدی: «ساغ آداملار طبیبه احتیاج یوخلاری، مَریض آداملار دیرلار کی طبیبه مُحتاج دیرلار. 32من گلمهمیشم کی صالح آداملاری توبهیه چاغیرام، بلکی گلمیشَم کی گُناهکارلاری توبهیه چاغیرام.»
اوروج توتماک بارهسینده
33اوللار عیسایا دئدیلَر: «نه ایچی یحیا شاگردلَری تئز-تئز اوروج توتیرلار و دُعا ائدیرلَر. فَریسیلَر شاگردلَری دا ائله بئله ائدیرلَر. آما سَنینگ شاگردلَرینگ یئییرلَر و ایچیرلَر.» 34عیسا اوللارا دئدی: «بئیه کورهکنینگ یولداشلارینی، اوندا کی کورهکَن اوللار اینان دیر، اوروج توتماکا مجبور ائدهبیلَرَینز؟ 35آما بیر زامان گلَر کی، کورهکَن اوللارینگ اَلیندَن آلینار. او گؤنلَرده، اوللار دا اوروج توتارلار.» 36اوللارا بیر مَثَل ده چَکدی و دئدی: «هئچ کَس بیر تازّا رَختدَن بیر تیکه قازماز و اؤنو بیر کُهنه رَخته یاماق وورماز. بئله ائدسه، هم تازّا رَختی ییرتَر، هم ده تازّا رَختدَن قازیلان تیکه، کُهنه رَخته یاراشماز. 37هئچ کَس ده تازّا شرابی، کُهنه مَشکه تؤکمهز. بئله ائدسه، تازّا شراب مَشکلَری ییرتَر. هم شراب تؤکولَر، هم ده مَشکلَر آرادان گئدهرلَر. 38بلکی تازّا شراب، تازّا مَشکه تؤکولهسی. 39هئچ کَس کُهنه شراب ایچَندَن سورا، تازّا شراب سئمهز. چونکی دئیهر: ”کُهنهسی یئیتَر دیر.“»
Currently Selected:
لوقا 5: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
