لوقا 3
3
یحیا پیغامی
1روم پادشاهی تیبریوس پادشاهلیگینینگ اونبئشاینجی ایلینده، او زامان کی پُنتیوس پیلاتُس یهودیه ولایتینینگ والیسی ایدی، هیرودیس جَلیل ولایتینینگ حاکمی ایدی و هیرودیسینگ ناتنی کاکاسی کی آدی فیلیپُس ایدی، ایتوریه و تْراخونیتیس ولایتلَرینینگ حاکمی ایدی، لیسانیوس آبیلینی ولایتینه حکومت ائدیردی، 2و حَنّا و قیافا ائنگ بویوک کاهِنلَر ایدیلَر، تارئ کلامی بیاباندا زَکریا اوغلو یحیایا گلدی. 3یحیا بوتون اوردون چئیینینگ یانینداکی منطقهلَره گئدیردی و آداملارا اعلام ائدیردی کی گُناهلارینینگ باغیشلانماکی ایچی، توبه ائدلَّر و تَعمید غُسلی توتالّار. 4ائله اولهیین کی اِشعَیای پیغمبرینگ سؤزلَری کتابیندا یازلمیش کی،
«بیر آدام بیاباندا جار چَکیر کی:
”رَبّینگ یولونو آماده ائدینز،
اؤنونگ یوللارینی دؤز ائدینز.
5واری دَرهلَر دولارلار
و واری داغلار و یاللار آلچاق اولارلار،
اَیری یوللار دؤز اولارلار
و کوتورلو یوللار هامّار اولارلار
6و بوتون بَشر تارئنینگ نجاتینی گؤرَرلَر.“»
7یحیا او جماعته کی تَعمید غُسلی توتماک ایچی اؤنونگ یانینا گلمیشلَردی، دئییردی: «ای اَفعیلَرینگ نَسلی، کیم سیزی هوشکار ائدی کی گلَن غَضّبدَن قاچاینز؟ 8او ثَمرهلَری گتیرینز، کی ثابت ائدیر توبه ائدمیشینز. اؤزونز اینَن دئمهینز کی، ”بیز ابراهیم پیغمبر سؤیونداناک.“ چونکی سیزه دئییرم کی تارئ قادر دیر تا بو داشلاردان ابراهیم ایچی اولادلار دؤزَته. 9حتّی ائله ایندی تیشه، آغاجلار ریشهسینه قؤیولموش. هر آغاج کی خوب ثَمر گتیرمیه، کَسیلَر و اوت ایچینه آتولار.»
10جماعت یحیادان خبر آلدیلار: «پس بیز نیجهائدهسیک؟» 11یحیا اوللارا جواب وئردی: «او آدام کی ایکّی کؤینَک واری، بیرسینی وئرهسی او آداما کی یوخو. خورَکیسی اولان آدام دا ائله بو ایشی گؤرهسی.» 12باج ییغَنلَر ده تَعمید غُسلی توتماک ایچی یحیا یانینا گلدیلَر و اوندان خَبَر آلدیلار: «اُستاد، بیز نیجهائدهسیک؟» 13یحیا اوللارا دئدی: «مَعین اولونموش اندازهدان آرتیق خَراج آلماینز.» 14سربازلار دا یحیادان خَبَر آلدیلار: «بیز نیجهائدهسیک؟» اوللارا دئدی: «هئچ کَسدَن گؤج اینَن پیل آلماینز، هئچ کَسه بوهتان وورماینز، آلدیگینز موآجبا قانع اولینز.»
15خَلخینگ گؤزو یولدا ایدی و اؤز گؤینلَرینده دئییرلَردی: «گؤرَینگ یحیا ائله او وَعده وئریلَن مَسیح دیر یا یو؟» 16یحیا اوللارینگ واریسینا جواب وئردی و دئدی: «من سیزی سو اینان تَعمید غُسلی وئریرَم، آما او کی مَندَن سورا گلیر مَندَن قوّتلیتَر دیر. ائله او کی من لایق دهییلَم کی اؤنونگ آیاققابیلارینینگ باغینی ده آچام. او سیزی تارئنینگ قُدّوس روحو اینان و اوت اینان تَعمید غُسلی وئرهر. 17اؤنونگ اؤساسی اَلینده دیر تا اؤز جاخَرمنینی تَمیز ائده و بوغدایی اؤز آمباریندا ییغه، آما سامانی بیر کور اولمایان اوت اینان، یاندیرار.»
18یحیا چوخ آیری نَصیحتلَر اینَن بو خوش خَبری خَلخه وئریردی. 19آما بو سَبریه کی هیرودیس حاکم اؤز کاکاسی آروادی، هیرودیا اینان ائولَنمیشدی و واری او پیس ایشلَر سَبرسینه ده کی گؤرموشدو، یحیا، هیرودیسی توبیخ ائدی، 20هیرودیس ده، یحیایی زندانا سالدی و بو پیس ایشی ده، باقّی پیس ایشلَرینه اضافه ائدی.
عیسانینگ تَعمید غُسلی توتماکی
21اوندا کی واری خَلخ تَعمید غُسلی توتیرلاردی و عیسا دا تَعمید توتموشدو و دُعا ائدیردی، گؤیلَر آچیلدی 22و تارئنینگ قُدّوس روحو گؤیدَن بیر گؤیاَرچین جسمینده عیسا اوستونه قوندو؛ و گؤیدَن بیر سَس گلدی کی: «سَن مَنیم عَزیز اوغلومانگ؛ سندَن چوخ راضییام.»
عیسانینگ شَجَرهنامهسی
23عیسا اوتوز یاشا یاخین ایدی کی اؤز خدمتینی باشلادی، و خَلخ گمان ائدیرلَردی او، یوسف اوغلو دور و یوسف هِلی اوغلو ایدی. 24هِلی مَتّات اوغلو، مَتّات لاوی اوغلو، لاوی مِلکی اوغلو، مِلکی یَنّا اوغلو، یَنّا یوسف اوغلو، 25یوسف مَتّاتیا اوغلو، مَتّاتیا عاموس اوغلو، عاموس ناحوم اوغلو، ناحوم حِسْلی اوغلو، حِسْلی نَجَّی اوغلو، 26نَجَّی مَعَت اوغلو، مَعَت مَتّاتیا اوغلو، مَتّاتیا سِمِعین اوغلو، سِمِعین یُسِک اوغلو، یُسِک یَهودا اوغلو، 27یَهودا یوحَنان اوغلو، یوحَنان ریسا اوغلو، ریسا زِروبابِل اوغلو، زِروبابِل شِئَلتیئیل اوغلو، شِئَلتیئیل نیری اوغلو، 28نیری مِلکی اوغلو، مِلکی اَدّی اوغلو، اَدّی قوصام اوغلو، قوصام اِلمادام اوغلو، اِلمادام عیر اوغلو، 29عیر یوشَع اوغلو، یوشَع اِلعازار اوغلو، اِلعازار یوریم اوغلو، یوریم مَتّات اوغلو، مَتّات لاوی اوغلو، 30لاوی شَمعون اوغلو، شَمعون یَهودا اوغلو، یَهودا یوسف اوغلو، یوسف یونام اوغلو، یونام اِلیاقیم اوغلو، 31اِلیاقیم مِلیا اوغلو، مِلیا مِنّا اوغلو، مِنّا مَتّاتا اوغلو، مَتّاتا ناتان اوغلو، ناتان داوود پادشاه اوغلو، 32داوود یَسا اوغلو، یَسا عوبید اوغلو، عوبید بوعَز اوغلو، بوعَز سَلمون اوغلو، سَلمون نَحشون اوغلو، 33نَحشون عَمّیناداب اوغلو، عَمّیناداب رام اوغلو، رام حِصْرون اوغلو، حِصْرون فِرِص اوغلو، فِرِص یَهودا اوغلو، 34یَهودا یَعقوب اوغلو، یَعقوب اِسحاق اوغلو، اِسحاق ابراهیم اوغلو، ابراهیم تارَح اوغلو، تارَح ناحور اوغلو، 35ناحور سِروج اوغلو، سِروج رِعو اوغلو، رِعو فِلِج اوغلو، فِلِج عِبِر اوغلو، عِبِر شِلَخ اوغلو، 36شِلَخ قینان اوغلو، قینان اَرفَکشاد اوغلو، اَرفَکشاد سام اوغلو، سام نوح اوغلو، نوح لَمِک اوغلو، 37لَمِک مَتوشالَح اوغلو، مَتوشالَح خَنوخ اوغلو، خَنوخ یارِد اوغلو، یارِد مَهَلَلئیل اوغلو، مَهَلَلئیل قینان اوغلو، 38قینان اَنوش اوغلو، اَنوش شِیث اوغلو، شِیث آدَم اوغلو، و آدَم تارئ اوغلو ایدی.
Currently Selected:
لوقا 3: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
