یوحنا 19
19
عیسا مَصلوب اولماگینینگ حکمی
1اوندا روملی والی پیلاتُس، فرمان وئردی کی عیسایی توتالّار و بئلَسینه شلّاق وورالّار. 2سربازلار تیکاندان بیر تاج هؤردولَر و عیسا باشینا قؤیدولار و بئلَسینه بیر اَرغوانلی عابا گئیدیردیلَر. 3اوللار گلیرلَردی عیسا یانینا و بئلَسینی ریشخند ائده ائده دئییرلَردی: «یاشا، یهودیلارینگ پادشاهی!» و بئلَسینه شاپالاق وورورلاردی.
4پیلاتُس گئنه گلدی یازّیا و یهودیلارینگ باشی بویوکلرینه دئدی: «باخینز، اؤنو گتیریرم یازّیا سیزینگ یانینزا تا بیلَینز کی من بو کیشیده هئچ جُرم گؤرمئیرَم.» 5اوندا عیسا، تیکان تاجی باشیندا و اَرغوانلی عابا دالیندا، یازّیا چیخدی. پیلاتُس اوللارا دئدی: «باخینز، او آدام!» 6آما اوندا کی باش کاهِنلَر کی مَعبدینگ عالِملَری ایدیلر و مَعبدینگ مأمورلاری عیسایی گؤردولَر، اوجا سَس اینَن دئدیلَر: «اؤنو صَلیبه چَک! اؤنو صَلیبه چَک!» پیلاتُس اوللارا دئدی: «اؤزونز اؤنو آپارینز و صَلیبه چَکینز، بو سَبریه کی من بو کیشیده هئچ جُرم گؤرمئیرَم.» 7اوللار اؤنا جواب وئردیلر: «بیزیم شَریعتیمیزه گؤره بو کیشی اؤلهسی، بو سَبریه کی اِدّعا ائدیر تارئ اوغلو دور.»
8اوندا کی پیلاتُس ائشیتدی کی عیسا بارهسینده نه دئییرلَر، آرتیقتر ده قورخدو. 9پیلاتُس گئنه عیسایی کاخ ایچینه آپاردی و بئلَسیندَن خبر آلدی: «سَن هاردان گلمیشَینگ؟» آما عیسا اؤنا هئچ جواب وئرمهدی. 10پس پیلاتُس بئلَسینه دئدی: «منیم جوابیمی وئرمئیرَینگ؟ بئیه بیلمئیرَینگ کی من قُدرتینی واریم کی بئلَینگی آزاد ائدَم، قُدرتینی ده واریم کی بئلَینگی صَلیبه چَکَم؟» 11عیسا دئدی: «منه هئچ قُدرتینگ اولمازدی، اگر تارئ بو قُدرتی سنه وئرمهمیش ایدی؛ بو سَبریه ده منی سنه تَسلیم ائدَنینگ تَقصیری آرتیق دیر.» 12پس پیلاتُس گئنه تَقلّی ائدی تا عیسایی آزاد ائده، آما یهودیلارینگ باشی بویوکلَری داد ووردولار کی: «اگر بو کیشییی آزاد ائدَینگ، روم پادشاهینینگ یولداشی دهییلَینگ. هَر کَس پادشاهلیگ اِدّعاسی ائده، روم پادشاهینینگ ضدّینه دیر.»
13پیلاتُس بو سؤزلَری ائشیدَنده، فرمان وئردی کی عیسایی گتیرَلَّر یازّیا و اؤزو ده حکم ائدمَک یئرینده اوتوردو. اؤرا ’سَنگفَرش‘ آدینا معروف ایدی و آرامی دیلده اؤرایا ’جَبّاتا‘ دئییلیردی. 14او گؤنلَر، پِسَخ عیدینینگ گؤنلَری ایدی. او گؤن جمعهایدی و یهودیلار، مُقدّس شنبه گؤنو ایچی آماده اولیرلاردی. ظُهر چاغی ساعت اون ایکّیه یاخین ایدی. پیلاتُس یهودیلارینگ باشی بویوکلرینه دئدی: «باخینز، پادشاهینز!» 15آما اوللار گئنه اوجا سَس اینَن دئدیلَر: «اؤنو آرادان آپار، اؤنو آرادان آپار، اؤنو صَلیبه چَک!» پیلاتُس بئللرینه دئدی: «مندن سئیرَینز کی پادشاهینزی صَلیبه چَکَم؟» باش کاهِنلَر کی مَعبد عالِملَری ایدیلر، جواب وئردیلَر: «روم پادشاهیندان آیری، بیزده هئچ پادشاه یوخ.» 16آخیردان پیلاتُس عیسایی سربازلارا تَحویل وئردی تا بئلَسینی صَلیبه چَکلَّر. اوللار دا عیسایی آپاردیلار.
عیسانینگ صَلیبه چَکیلمَکی
17عیسا، صَلیبی دالیندا، بیر ’کَلّه‘ دئییلَن یئره ساری کی شَهردن یازّیا ایدی، گئتدی. آرامی دیلده اؤرایا ’جُلجُتا‘ دئییلیردی. 18عیسا اؤردا صَلیبه چَکیلدی، اؤنونگ اینان ایکّی آیری آدام دا ایکّی طَرفینده صَلیبه چَکیلدیلَر و عیسا اورتادا ایدی. 19پیلاتُس فرمانینا بیر یازیلی یازدیلار و صَلیب باشینا توخودولار. اؤنونگ اوستونه یازیلمیش ایدی؛ «ناصِرهلی عیسا، یهودیلارینگ پادشاهی.» 20چوخ آدام یهودیلاردان او یازیلییی اوخودولار، بو سَبریه کی او یئر کی عیسا اؤردا صَلیبه چَکیلمیش ایدی شَهره یاخین ایدی و او یازیلی آرامی، لاتین و یونانی دیللَرینده یازیلمیش ایدی. 21پس یهودیلارینگ باش کاهِنلَری پیلاتُس یانینا گئتدیلَر و دئدیلَر: «یازما ”یهودیلارینگ پادشاهی،“ بلکی یاز، ”بو کیشی دئدی کی من یهودیلارینگ پادشاهییام.“» 22پیلاتُس دئدی: «او کی یازمیشام، داها یازمیشام.»
23سربازلار عیسایی صَلیبه چَکندن سورا، اؤنونگ رَختلَرینی گؤتوردولَر و دؤرد تیکه ائدیلَر و هر بیری بیر تیکه گؤتوردو. ائله بئله ده اؤنونگ قاباسینی گؤتوردولَر، آما بو سَبریه کی او قابادا دَرز یوخ ایدی و اوخاریدان آشاغی یکدَست هؤرولموش ایدی، 24سربازلار بیر بیره دئدیلَر: «گلینز تا قابایی ییرتمهیَک، بلکی پؤشک آتاک گؤرَک کیمینگ اولور.» بئله مُقدّس یازیلیلاردا یازیلان سؤز یئرینه ائتیشدی کی دئییر:
«رَختلَریمی اؤز آرالاریندا بَهر ائدیلَر و
دالیمینگ رَختینه پؤشک آتدیلار.»
بو ائله او ایش ایدی کی سربازلار گؤردولَر.
25صَلیب یاخینینده، عیسانینگ آناسی و دازّاسی، کلیوپاس آروادی مریم و مَجدللی مریم تورموشلاردی. 26او شاگرد کی عیسا بئلَسینی چوخ سئیردی ده، اؤردا تورموشدو. اوندا کی عیسا، اؤز آناسینی گؤردو کی او شاگرد دا یانینا تورموش، اؤز آناسینا دئدی: «آرواد باخ، اوغلونگ!» 27اوندا او شاگرده دئدی: «باخ، آنانگ!» ائله او ساعاتدان، او شاگرد عیسانینگ آناسینی آپاردی اؤز ائوینه.
عیسا اؤلمَکی
28اوندان سورا عیسا کی بیلیردی ایندی داها واری زاد تؤکَنمیش، بو خاطره کی مُقدّس یازیلیلاردا یازیلان سؤز یئرینه ائتیشه، دئدی: «سویوزام.» 29اؤردا بیر درف وار ایدی کی تُرش شرابدان دؤلو ایدی. سربازلار بیر تیکه اَبری کی باتیرمیشلاردی تُرش شراب ایچینه، بیر زوفا تَرکهسی باشینا ووردولار و عیسا آغیزی دَمینه توتدولار. 30عیسا تُرش شرابدان ایچَنده، دئدی: «تؤکندی.» و باشینی اَیدی و روحونو تَسلیم ائدی.
31مُقدّس شنبه گؤنو ایچی آماده اولماگ گؤنونونگ آخیرینا یاخین ایدی. او شنبه گؤنو یهودیلار ایچی چوخ مُقدّس ایدی بو خاطره کی پِسَخ عیدینینگ گؤنلَری ایچینده ایدی. یهودیلارینگ باشی بویوکلَری سمئیرلَردی کی جنازهلَر مُقدّس شنبه گؤنونده صَلیب اوستونده اولالّار. پس پیلاتُسدان سئدیلَر کی صَلیب اوستوندهکی آداملارینگ قیچلَری قَلملَرینی قیرَّلَّر تا مُقدّس شنبه گؤنونونگ باشلانماکیندان ایلَری، اؤلَلّر و جنازهلَر صَلیبدن آشاغی گتیریله و تاپشیریلا. 32پس سربازلار گلدیلَر و عیسا اینان صَلیبه چَکیلَن ایکّی آدامینگ قیچلَری قَلملَرینی قیردیلَر. 33آما اوندا کی عیسایا ائتیشدیلر و گؤردولَر کی اؤلموش، عیسا قَلملَرینی قیرمهدیلَر. 34با بو حال، سربازلارینگ بیری عیسانینگ پهلیسینه نیزه باتیردی. نیزهیی باتیردیگینان عیسادان قان و سو رو ائدی. 35بونو گؤرَن آدام، گواهلیگ وئریر تا سیز ده ایمان گتیرَینز. اؤنونگ گواهلیگی گرچَک دیر و بیلیر کی حَقیقتی دئییر. 36بو ایشلَر اولوندو تا مُقدّس یازیلیلاردا یازیلان سؤزلَر یئرینه ائتیشه. ائله او سؤزلَر کی بیر یئرده دئییر: «سوموکلَرینینگ هئچ بیری قیریلمَز،» 37و بیر آیری یئرده دئییر: «اؤنا کی نیزه باتیردیلار، باخارلار.»
عیسانینگ تاپشیریلماگی
38اوندان سورا یوسف کی رامَه شَهرینینگ آدامی ایدی، پیلاتُسدان اجازه سئدی تا عیسا جنازهسینی آپارا تاپشیرا. یوسف عیسا شاگردلَریندَن ایدی، آما پناه دا، بو سَبریه کی یهودیلارینگ باشی بویوکلَریندن قورخیردی. پیلاتُس اؤنا اجازه وئردی. پس گلدی و عیسا جنازهسینی آپاردی. 39نیقودیموس ده کی ایلَرتر بیر گئجه عیسا یانینا گئدمیش ایدی، گلدی و اؤزو اینن اوتوز کیلویا یاخین مُر و عود گتیردی. 40اوللار او رَسمه گؤره کی یهودیلار تاپشیرماک ایچی وارلاریدی، عیسا جنازهسینی مُر و عود اینان خَلعَتلَدیلَر. 41عیسا صَلیبه چَکیلَن یئرینگ یاخینینده، بیر باغ وار ایدی و او باغدا بیر تازّا مَقبره وار ایدی کی اوندایانچاز هئچ جنازه اؤنونگ ایچینه قؤیولمامیشدی. 42پس بو سَبریه کی مُقدّس شنبه ایچی آماده اولماگ گؤنونونگ آخیری ایدی و او مَقبره ده یاخین ایدی، عیسانینگ جنازهسینی ائله او مَقبره ایچینه قؤیدولار.
Currently Selected:
یوحنا 19: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
