یوحنا 18
18
عیسا توتولیر
1عیسا بو سؤزلَری دئمَکدَن سورا، شاگردلَری اینَن قِدرون دَرهسینینگ او تئیینه گئتدی. اؤردا بیر باغ وار ایدی و عیسا اینان شاگردلَری او باغ ایچینه گئتدیلَر. 2عیسایی اَله وئرَن یَهودا دا، اؤرایی تانیردی، بو سَبریه کی عیسا اینان شاگردلَری بوندان ایلَری نئچه دفعه اؤردا ییغیلمیشلَردی. 3پس یَهودا بیر بئیله روملی سرباز و مَعبدینگ مأمورلارینی کی باش کاهِنلَر و فَریسی فِرقهسینینگ عالِملَری طَرفیندن ایدیلَر، گؤتوردو و گئتدی اؤرا. اوللار فانوسلار، مَشعللَر و اَسلحهلَر اینَن اؤرا گئتدیلَر. 4عیسا با بو کی بیلیردی نه باشینا گلیر، ایلَری گئتدی و اوللارا دئدی: «کیمینگ قولونجونا گَزیرَینز؟» 5اوللار جواب وئردیلَر: «ناصِرهلی عیسا قولونجونا گَزیرَک.» عیسا اوللارا دئدی: «من اویام.» یَهودا، ائله او آدام کی عیسایی اَله وئردی دا اوللار اینان تورموش ایدی. 6اوندا کی عیسا دئدی، «من اویام،» اوللار گئری-گئری گئتدیلَر و دؤشدولار یئره. 7عیسا بیر دفعه داها اوللاردان خبر آلدی: «کیمینگ قولونجونا گَزیرَینز؟» دئدیلَر: «ناصِرهلی عیسا قولونجونا گَزیرَک.» 8عیسا جواب وئردی: «سیزه دئدیم کی من اویام. پس اگر منیم قولونجوما گَزیرَینز، قؤیینز بوللار گئدَلَّر.» 9بونو دئدی تا او سؤز کی ایلَرتر دئمیش ایدی یئرینه ائتیشه کی: «منه وئردیگینگ آداملارینگ هئچ بیرینی اَلدَن وئرمهمیشَم.»
10اوندا شَمعونِ پِطرُس اؤز قیلیجینی، ائنگ بویوک کاهِنینگ نوکرینه ساری چَکدی. قیلیج او نوکرینگ قولاقینا دهییدی و ساق قولاقی کَسیلدی. او نوکرینگ آدی مالخوس ایدی. 11عیسا، پِطرُسا دئدی: «قیلیجینگی قؤی یئرینه. آیا گؤیدهکی بووآم منه وئردیگی عذاب پایلاسینی، ایچمئیهسیم؟»
12اوندا سربازلار، اؤز فرماندهلَری و یهودی مأمورلار اینان کی مَعبد مأمورلاری ایدیلار عیسایی توتدولار و اَللَرینی باغلادیلار. 13اوللار عیسایی اَوّل حَنّا یانینا آپاردیلار. حَنّا ایلَرکی ائنگ بویوک کاهِن ایدی و قیافانینگ آروادی بووآسی ایدی. او موقعده قیافا ائنگ بویوک کاهِن ایدی. 14قیافا ائله او آدام ایدی کی یهودیلارا نَصیحت ائدمیش ایدی کی یئیتَر دیر کی بیر آدام خلخ یولوندا اؤله.
پِطرُس عیسایی حاشا ائدیر
15شَمعونِ پِطرُس و بیر آیری شاگرد عیسا قولونجوندان یولا دؤشدولار. او شاگرد ائنگ بویوک کاهِن اینن و اوباسی تانیشلاریندان ایدی، بو سَبریه ده عیسا اینان ائنگ بویوک کاهِنینگ ائوی حیاطی ایچینه گئتدی، 16آما پِطرُس قاپیدا توردو. اوندا او بیر شاگرد کی ائنگ بویوک کاهِن اینن و اوباسی تانیشلاریندان ایدی، چیخدی یازّیا و بیر جاهال کنیز اینن کی ناتّورلیگ ائدیردی، دانیشدی و پِطرُسی آپاردی ایچَری. 17او جاهال کنیز کی ناتّور ایدی پِطرُسدان خبر آلدی: «سَن دا کی عیسا شاگردلَریندن دهییلَینگ، وارانگ؟» پِطرُس جواب وئردی: «دهییلَم.»
18هوا سویوق ایدی. نوکرلَر و مَعبد مأمورلاری غور اینان اوت ائدمیشلَردی و دئییرینه تورموشلاردی و اؤزلَرینی ایستیدیرلَردی. پِطرُس دا اوللار اینان تورموش ایدی و اؤزونو ایستیدیردی.
عیسا حَنّا حُضوروندا
19ائله او موقعده، ایچریده، ایلَرکی ائنگ بویوک کاهِن، یعنی حَنّا، عیسایی، شاگردلَری و وئردیگی تَعلیملَری بارهسینده بازخواست ائدیردی. 20عیسا جواب وئردی: «من دنیا آداملاری اینان عالَم آشکار دانیشمیشام و همیشه عبادتگاهلاردا و مَعبدده کی بیزیم خلخیمیز واری اؤردا ییغیلیرلَر تَعلیم وئرمیشَم. من پناه دا هئچنه دئمهمیشَم. 21نه ایچی وئردیگیم تَعلیملَر بارهسینده مندَن خبر آلیرانگ؟ اوللاردان خبر آل کی منیم سؤزلَریمی ائشیدمیشلَر! اوللار بیلیرلَر کی من نه دئمیشم.» 22عیسا بو سؤزلَری دئیَنده، مأمورلارینگ بیری کی اؤردا تورموش ایدی، عیسایا شاپالاق ووردو و دئدی: «بئلهیین ائنگ بویوک کاهِنینگ جوابینی وئریرَینگ؟» 23عیسا جواب وئردی: «اگر دئدیگیم سؤز اشتباه دیر، بوردا توران آداملار حُضوروندا دئ اشتباهیم نه ایدی؛ آما اگر دئدیگیم سؤز دؤز دور، نه ایچی منه وورورانگ؟» 24اوندا حَنّا عیسایی کی اَللَری باغلی ایدی، ائنگ بویوک کاهِن، یعنی قیافا یانینا یوللادی.
پِطرُس گئنه عیسایی حاشا ائدیر
25ائله او موقع کی شَمعونِ پِطرُس تورموش ایدی و اؤزونو ایستیدیردی، اؤرداکی آداملارینگ بیر پاراسی بئلَسیندَن خبر آلدیلار: «سَن ده کی عیسا شاگردلَریندن دهییلَینگ، وارانگ؟» او حاشا ائدی و دئدی: «یو! دهییلَم.» 26ائنگ بویوک کاهِنینگ اوباسی نوکرلَرینینگ بیری کی او آدامینگ قوحومو ایدی کی پِطرُس قیلیج اینن اؤنونگ قولاقینی کَسمیش ایدی، دئدی: «بئیه منیم اؤزوم سَنی عیسا اینان باغدا گؤرمهدیم؟» 27پِطرُس گئنه حاشا ائدی. ائله او آن خوروس بونگ وئردی.
عیسا پیلاتُس والی حُضوروندا
28سَحر ناماچاغی، عیسایی قیافا یانیندان، آپاردیلار روملی والی، پیلاتُس کاخینا. اؤرا ائتیشَنده یهودیلارینگ باشی بویوکلَری کاخ ایچینه گئدمهدیلَر، بو سَبریه کی اوللارینگ رَسمینه گؤره، غیرییهودیلار ائوی ایچینه گئدمَک بئللرینی نَجس ائدیردی و اگر دا نَجس اولسالاردی، داها باشارمازلاردی کی پِسَخ عیدینی تؤکدلَّر. 29پس پیلاتُس، گلدی یازّیا اوللار یانینا و خبر آلدی: «بو کیشییی نه جُرما مُتَّهم ائدیرَینز؟» 30اوللار جواب وئردیلَر: «اگر بو کیشی مُجرم دهییلدی، بئلَسینی سَنه تَحویل وئرمَزدیک.» 31پیلاتُس اوللارا دئدی: «اؤزونز اؤنو آپارینز و اؤز شَریعتینزه گؤره بئلَسینی محاکمه ائدینز.» یهودیلارینگ باشی بویوکلَری دئدیلَر: «بیز اجازه یوخوک بیرینی اعدام ائدک.» 32بئله، عیسا سؤزو بونونگ بارهسینده کی نه رَقم اؤلوم اینن اؤلهسی یئرینه ائتیشیردی.
33اوندا روملی والی، پیلاتُس اؤز کاخینا بؤکولدو و فرمان وئردی کی عیسایی گتیرَلَّر. عیسادان خبر آلدی: «سَن یهودیلارینگ پادشاهییانگ؟» 34عیسا جواب وئردی: «سن بو گپی اؤز یانینگدان خبر آلیرانگ یا بو سَبریه کی باقّی آداملار بو گپی منیم بارمده بئلَینگه دئمیشلَر، بونو مندن خبر آلیرانگ؟» 35پیلاتُس جواب وئردی: «بئیه من یهودییام کی بو زادلاری مندن خبر آلیرانگ؟ اؤز ملّتینگ و باش کاهِنلَر سَنی منه تَحویل وئرمیشلَر؛ نه ایش گؤرموشانگ؟» 36عیسا جواب وئردی: «منیم پادشاهلیگیم بو دنیا پادشاهلیگلاری لهیین دهییل. اگر منیم پادشاهلیگیم بو دنیا پادشاهلیگلاری لهیین ایدی، منیم یولومو گئدَنلَر جَنگ ائدهرلَردی تا من یهودیلارینگ باشی بویوکلَری اَلینه تَسلیم اولمایام. آما منیم پادشاهلیگیم بو دنیا پادشاهلیگلاری لهیین دهییل.» 37اوندا پیلاتُس عیسادان خبر آلدی: «پس سن دئییرَینگ کی بیر پادشاهانگ؟» عیسا جواب وئردی: «سَن اؤزونگ دئییرَینگ کی من بیر پادشاهام. من حَقیقته گواهلیگ وئرمَک ایچی آنادان اولموشام و بو دنیا ایچینه گلمیشَم. پس هَر کَس کی حَقیقته تَعلّق واری، منیم سؤزلَریمه قولاق آسار.» 38پیلاتُس خبر آلدی: «حَقیقت نهدیر؟» بونو دئدی و گئنه گئتدی یازّیا یهودیلارینگ باشی بویوکلری یانینا و بئللرینه دئدی: «من بو کیشیده هئچ جُرم گؤرمئیرَم. 39آما سیزده بیر رَسم وار کی من پِسَخ عیدینده، بئلَینز ایچی بیر زندانی آزاد ائدهسیم. سئیرَینز یهودیلارینگ پادشاهینی بئلَینز ایچی آزاد ائدَم؟» 40آما اوللار اوجا سَس اینَن دئدیلَر: «بو کیشییی یو، بلکی باراباسی آزاد ائد!» باراباس بیر شَهر ایچینده شلوغ سالان آدام ایدی.
Currently Selected:
یوحنا 18: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
