یوحنا 20
20
عیسا مَقبرهسی خالی دیر
1هفتهنینگ اَوّلکی گؤنونده، یعنی یکشنبهده، سَحر ناماچاغی، اوندا کی حَلی قَرَنگی ایدی، مَجدللی مریم مَقبره یانینا گلدی و گؤردو کی مَقبره آغیزی دَمیندهکی داش بیر قیراقا ایتهلنمیش. 2پس قَچه قَچه گئتدی شَمعونِ پِطرُس و او شاگرد یانینا کی عیسا اؤنو چوخ سئیردی و بئللرینه دئدی: «آقامیزی مَقبرهدَن آپارمیشلار و بیلمئیرَک اؤنو هارا قؤیموشلار.» 3پِطرُس و او بیر شاگرد چیخدیلَر یازّیا و گئتدیلَر مَقبرهیه ساری. 4اوللارینگ ایکّیسی بئلینه قَچیرلَردی؛ آما او بیر شاگرد پِطرُسدان ایلَری ووردو و اَوّل مَقبرهیه ائتیشدی. 5او اگیلدی، مَقبره ایچینه باخدی و گؤردو کی خَلعَت ائله اؤردا دیر، آما مَقبره ایچینه گئدمهدی. 6شَمعونِ پِطرُس اؤنونگ قولونجوندان ائتیشدی و مَقبره ایچینه گئتدی. شَمعونِ پِطرُس گؤردو کی خَلعَت ائله اؤردا دیر، 7آما او یاقلوق کی عیسا باشی دئییرینه ساریلمیش ایمیش، خَلعَت یانیندا دهییل بلکی آیری، دیریلی و بیر آیری یئرده قؤیولموش. 8پس او بیر شاگرد دا کی اَوّل مَقبره یانینا ائتیشمیش ایدی، ایچری گلدی. او شاگرد بو زادلاری گؤرَنده ایمان گتیردی. 9با بو حال اوللار حَلی دا مُقدّس یازیلیلاری آنگلامامیشلاردی کی وَعده وئریلَن مَسیح اؤلولَردن دئرّیلهسی.
عیسا مَجدللی مریمه ظاهر اولیر
10اوندا او ایکّی شاگرد او ائوه کی اؤردا قالیرلاردی دؤندولَر. 11آما مریم، مَقبرهنینگ یازّیسیندا تورموش ایدی و آغلاییردی. ائله بئله کی آغلاییردی اگیلدی تا مَقبره ایچینه باخا. 12ائله او موقع ایکّی آغ رَختلی فرشته گؤردو کی اؤردا اوتورموشلاردی کی عیسا جنازهسی اؤرا قؤیولموش ایمیش. بیری اؤردا اوتورموشدو کی عیسانینگ باشی یئری ایمیش، او بیری دا اؤردا کی قیچلَری یئری ایمیش. 13فرشتهلَر مریمه دئدیلَر: «آرواد، نه ایچی آغلاییرانگ؟» مریم جواب وئردی: «آقامی آپارمیشلار و بیلمئیرَم هارا قؤیموشلار.» 14بونو دئیَنده، بؤکولدو و عیسایی گؤردو کی اؤردا تورموشدو، آما تانیمادی کی او عیسا دیر. 15عیسا مریمه دئدی: «آرواد، نه ایچی آغلاییرانگ؟ کیمینگ قولونجونا گَزیرَینگ؟» مریم کی گمان ائدیردی او اؤرانینگ باغبانی دیر، دئدی: «آقا، اگر سَن اؤنو آپارمیشانگ، منه دئ کی اؤنو هارا قؤیموشانگ تا گئدَم و جنازهسینی گؤتورَم.» 16عیسا اؤنا دئدی: «مریم!» مریم ایزینی اؤنا ساری بؤکدو و آرامی دیله دئدی: «رَبّونی.» رَبّونی، یعنی اُستاد. 17عیسا مریمه دئدی: «سئمئیر منی ساخلایانگ، چونکی من ائله ایندی گؤیدهکی بووآ یانینا اوخاری گئدمئیرَم. آما کاکالاریم یانینا گئد و اوللارا دئ کی ائله بو تئزلیگده اؤز بووآم و سیزینگ بووآینز و اؤز تارئم و سیزینگ تارئینز یانینا اوخاری گئدیرَم.» 18مَجدللی مریم گئتدی و شاگردلَری خبر ائدی و بئللرینه دئدی: «رَبّی گؤرموشام!» و او گپلَری کی عیسا بئلَسینه دئمیش ایدی، اوللارا دئدی.
عیسا اؤزونو شاگردلَرینه گؤرسَدیر
19ائله او گؤن، آغشام چاغی، کی هفتهنینگ اَوّلکی گؤنو، یعنی یکشنبه ایدی، شاگردلَر بیر بیر دئییرینه ییغیلمیشلَردی. با بو حال کی اوللار دَرلَری یهودیلار قورخوسوندان قُفل ائدمیشلَردی، عیسا گلدی و اوللار آراسیندا توردو و بئللرینه دئدی: «سیزه سلام اولسون.» 20بونو دئدی و اؤز اَللَرینی و پهلیسینی اوللارا گؤرسَتدی. شاگردلَر رَبّی گؤرَنده خوشحال اولدولار. 21عیسا گئنه اوللارا دئدی: «سیزه سلام اولسون! ائله اولهیین کی گؤیدهکی بووآ منی یوللامیش، من ده سیزی یوللاییرام.» 22بونو دئدی و هیفیردی و اوللارا دئدی: «تارئنینگ قُدّوس روحونو توتینز. 23اگر سیز بیر کَسینگ گُناهلارینی باغیشلایاینز، اوللار باغیشلانارلار؛ و اگر سیز بیر کَسینگ گُناهلارینی باغیشلامایاینز، اوللار باغیشلانمازلار.»
عیسا اؤزونو تومایا گؤرسَدیر
24اوندا کی عیسا گلمیش ایدی، او اون ایکّی شاگردینگ بیری، کی آدی توما ایدی و بئلَسینی جومّولو چاغیریرلاردی، اوللار اینان دهییلدی. 25پس باقّی شاگردلَر تومایا دئدیلَر: «بیز رَبّی گؤرموشاک!» آما توما اوللارا دئدی: «تا اؤزوم میخلَر یئرینی اَللَری اوستونده گؤرمهیَم، اؤز بورماقیمی میخلَر یئرینه وورمایام و اؤز اَلیمی پهلیسینینگ دَلیگینه وورمایام، اینانمام.»
26سکّیز گؤندَن سورا، عیسانینگ شاگردلَری گئنه ائو ایچینده ایدیلار، توما دا وار ایدی. با بو حال کی دَرلَر قُفل ایدیلار، عیسا گلدی و اوللار آراسیندا توردو و دئدی: «سیزه سلام اولسون!» 27اوندا تومایا دئدی: «بورماقینگ قؤی بورا و اَللَریمی گؤر، اَلینگی گتیر ایلَری و پهلیمینگ دَلیگی اوستونه قؤی. ایمانسیز اولما، بلکی ایمان وارینگ اولسون.» 28توما اؤنا دئدی: «منیم رَبّیم و منیم تارئم!» 29عیسا دئدی: «بو سَبریه کی منی گؤردونگ ایمان گتیردینگ؟ خوش او آداملار حالینا کی هَرچند منی گؤرمهمیشلَر، آما ایمان گتیریرلَر.»
بو کتابینگ هَدفی
30عیسا چوخ آیری مُعجزهلی نیشانالار شاگردلَر حُضوروندا ائدی کی بو کتابدا یازیلمامیشلار. 31آما بو کتابدا یازیلان زادلار بو سَبریه یازیلمیشلار کی سیز ایمان گتیرَینز کی عیسا ائله او وَعده وئریلَن مَسیح، تارئ اوغلو دور و تا بو ایمان طَریقیندن، اؤنونگ آدیندا زندلیگ وارینز اولا.
Currently Selected:
یوحنا 20: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
