عِبرانلیلَر 2
2
هوشکار اولینز کی نجاتدان غافِل اولمایانز
1پس بیز ائشیتدیگیمیزه چوخ آرتیق دقّت ائدهسیک، تا ائدمهیه کی ائشیتدیگیمیزینگ یولوندان چیخَک. 2بو خاطره کی اگر او پیغام کی فرشتهلَر وسیلهسینه اعلام اولوندو، ثابت اولدو کی اِعتبارلی دیر و هَر رَقم تَقصیره یا دا اطاعت ائدمَزلیگه بیر حَقلی جزا وئریلدی، 3پس بیز نهیین جزاسیندان جان بُرد ائدهسیک، اگر بیر بئلهیین بویوک نجاتدان غافل اولاک؟ بو نجات اَوّل رَب عیسا واسطهسینه اعلام اولدو و اوندان سورا اونو ائشیدنلَر واسطهسینه بیزه ثابت اولدو، 4ائله اولهیین کی تارئ ده، نیشانالار و عجیب ایشلَر اینن و رَقم به رَقم مُعجزهلَر اینن و قُدّوس روحونگ عَطالاری اینن کی اوللاری اؤز سئدیگینه گؤره بَهر ائدیردی، گواهلیگ وئردی.
نجاتینگ بَنا بُنیادینی قؤیان
5چونکی تارئ ایندیدن بئله گلن دنیایی فرشتهلَر اطاعتینه چیخارتمادی، ائله او دنیا کی اونونگ بارهسینده دانیشیراک. 6زَبور کتابیندا بیر یئرده گواهلیگ وئریلمیش کی:
«آدام نه دیر کی سَن اؤنونگ فکرینده اولانگ،
یا دا آدامیزاد نه دیر کی سَن اؤنونگ قیدینده اولانگ؟
7سَن اؤنو بیر آز مُدّت فرشتهلَردن آشاغیتر قؤیدونگ؛
سن اؤنونگ باشینا شوکت و حُرمَت تاجینی قؤیموشانگ،
8و واری زادی اؤنونگ قیچلَری آلتینا اطاعته چیخارتدینگ.»
ایندی، تارئ واری زادی اؤنونگ اطاعتینه چیخارتماک اینان، هئچنهیی ویل ائدمهدی کی اؤنونگ اطاعتی آلتیندا اولمایا. بیز ائله ایندی، حلی دا گؤرمئیرک کی واری زاد اؤنونگ اطاعتی آلتیندا اولا. 9آما اؤنو گؤرورَک کی بیر آز مُدّت فرشتهلَردن آشاغیتر اولدو، یعنی عیسایی، آما ایندی شوکت و حُرمَت تاجی قؤیولموش باشینا، بو سَبریه کی اؤلوم زَجرینی چکدی تا تارئ فِیضی وَسیلهسینه واری کَس یئرینه اؤلومو دادا.
10چون بئله یاراشیردی کی تارئ، کی واری زادینگ وارلیگی اؤنونگ ایچی و اؤنونگ وسیلهسینه دیر، بونونگ ایچی کی چوخ اوغوللاری شوکته ائتیشتیره، اوللار نجاتینینگ بَنا بُنیادینی قؤیانی، زَجر طریقیندَن، کامل ائده. 11چون او کی مُقدّس ائدیر و اوللار کی مُقدّس اولیرلار، واریسی بیر بووآدان دیرلار. بو خاطره دیر کی، عیسا عار یوخو کی اوللاری کاکا چاغیرا، 12ائله اولهیین کی زَبور کتابیندا دئییر:
«سنینگ آدینگی کاکالاریما اعلام ائدهرم؛
جماعت اورتاسیندا، سنه حَمد و ثنا ییری، ییرلهیَرَم.»
13و گئنه اِشعیای پیغمبر کتابیندا دئییر:
«من اؤنا توکّل ائدهرَم.»
و گئنه دئییر کی:
«باخ، من و تارئ منه وئردیگی اولادلار.»
14پس بو خاطره کی، اولادلار بَدنده و قاندا شَریک دیرلَر، ائله بئلهیین ده اؤنونگ اؤزو ائله بو زادلاردا شریک اولدو تا اؤلوم طریقیندَن، اؤنو کی اؤلوم قُدرتینی واری یعنی اِبلیسی، نابود ائده، 15و واری اوللاری کی اؤلوم قورخوسو سبرسینه، بوتون عُمرلاری اَسیر ایدیلار، آزاد ائده. 16چون گرچکدَن کی او، فرشتهلَره کؤمَک ائدمئیر، بلکی ابراهیم پیغمبر نَسلینه کؤمَک ائدیر. 17پس لازیم ایدی کی او واری لحاظدان کاکالاری لهیین اولا تا بئله بیر رَحملی و وفالی ائنگ بویوک کاهِن اولا، تارئ خدمتینده، تا خَلخ گُناهلارینینگ باغیشلانماکی ایچی قُربانلوق ائده. 18چونکی اؤنونگ اؤزو امتحان اولاندا زَجر چکمیش، باشاریر اوللارا کی امتحان اولیرلار کؤمک ائده.
Currently Selected:
عِبرانلیلَر 2: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
