کولُسیلیلَر 3
3
تازّا زندلیگ مَسیحده
1پس اگر مَسیح اینن دئرّیلمیشَینز، او زادلار قولونجوندا اولینز کی اوخاریدا دیر، اؤردا کی مَسیح وار و تارئنینگ ساغ اَلینده اوتورموش. 2فکرینزی قؤیونز او زادلار اوستونه کی اوخاریدا دیر، نه او زادلار اوستونه کی یئر اوستونده دیر. 3چونکی سیز اؤلموشانز و زندلیگینز مَسیح اینن تارئدا پنهان دیر. 4اوندا کی مَسیح کی سیزینگ زندلیگینز دیر، ظاهر اولا، اوندا سیز ده اؤنونگ اینان شوکتده ظاهر اولارانز.
5پس، هر نهیی کی وجودینز ایچینده یئره تَعلّق واری، اؤلدورینز؛ یعنی عِفّتسیزلیگی، ناپاکلیگی، هَوی و هَوسی، پیس خواستهیی و طمعی کی ائله بُتپرستلیگ دیر. 6ائله بو زادلار سبرسینه دیر کی تارئ غَضّبی نافرمانلیگ اولادلارینا گلیر. 7بیر زامان سیز ده بوللاردا رووآل ائدیردینز، اوندا کی اوللاردا زندلیگ ائدیردینز. 8آما ایندی اوللارینگ واریسینی قؤیاسینز قیراقا؛ یعنی خشمی، غَضّبی، بدجنسلیگی، بوهتان وورماکی و زشت سؤزلَری آغیزینزدان. 9بیر بیره یالان دئمَینز، چونکی او قَدیمکی آداملیگی عَمللَری اینَن دالینزدان چیخارتمیشانز، 10و او تازّا آداملیگی گئیمیشینز، کی حقیقی مَعرفتده تازّالانیر تا بئلَسینی یارادانینگ شمایلینه چیخه. 11بو تازّا آداملیگدا، نه یونانلی نه یهودی، نه سُنّت اولونموش نه ده سُنّت اولونماموش، نه بَربَر نه سَکایی، نه غُلام نه ده آزاد داها معنی یوخو دور، بلکی مَسیح واری زاد دیر و واری زاددا دیر.
12پس تارئنینگ سچیلمیش آداملاری لهیین کی مُقدّس و عَزیز دیرلَر، دلرَحملیگی، مهربانلیگی، گؤنگول آلچاقلیگی، مُلایملیگی و صَبری سالینز دالینزا. 13بیر بیری تَحمّل ائدینز و اگر بیری او بیرسیندان بیر گِئلیلیگ واری، بیر بیری باغیشلاسینلار. ائله اولهیین کی رَب، سیزی باغیشلامیش، سیز دا باغیشلایاسینز. 14بوللارینگ واریسی اوستوندن ده مُحبّتی گئیینز کی واری زادی بیر تمام و کمال بیرلیکده، بیره بیره پیوند وئریر.
15قؤینز مَسیحنینگ صُلح و سلامتلیگی اؤرهکلرینزده حکم سؤره، ائله او صُلح و سلامتلیگ کی گرچکدَن بیر بدنده بئلَسینه چاغیرلدینز. و شُکر ائدن اولینز. 16قؤینز تا مَسیحنینگ کلامی فراوانلیگ اینن سیزده مَنزل ائده، بوتون حِکمت اینن بیر بیره تعلیم وئرینز و بیر بیری نَصیحت ائدینز، مزمورلار و ییرلَر و روحانی نَغمهلَر ییرلهینز، او شُکر ائدمک اینان کی اؤرهکینزده تارئیا وارینز. 17هر ایش کی گؤرورَینز، سؤزده یا ده عَملده، واری ایشی رَب عیسانینگ آدیندا گؤرونز و اؤنونگ طریقیندَن بووآ تارئیی شُکر ائدینز.
ایماندارلار رابطهلَری
18آروادلار، اَرلرینزدَن اطاعت ائدینز، ائله اولهیین کی رَبده بئلهیین یاراشیر. 19اَرلَر، آروادلارینزی چوخ سئينز و اوللار اینان آچّیلیگ ائدمهینز. 20اولادلار، واری زاددا آنا و بووآینزدان اطاعت ائدینز، چونکی بو، رَبّی خُشنود ائدیر. 21بووآلار، اولادلارینزی خشمه گتیرمَینز، تا ائدمئیه کی مأیوس اولالّار. 22غُلاملار، واری زاددا اوللاردان کی بو دنیادا اَربابینز دیرلَر اطاعت ائدینز، نه فقط اوندا کی گؤزلَری دَمیندهیَینز، او آداملار لهیین کی خلخی راضی ائدمَک قولونجوندا دیرلار، بلکی صِدق دل اینن و رَب قورخوسو اینان. 23هر ایش کی گؤرورَینز اؤرهکدن گؤرونز، ائله کی اینگار اونو رَب ایچی ائدیرَینز، نه آداملار ایچی، 24چونکی بونو بیلیرَینز کی رَبدَن، اَجرینز ایچی میراث آلارانز. سیز رَب مَسیحی خدمت ائدیرَینز. 25چونکی پیس ایش گؤرَن آدام، گؤردوگو پیس ایشینگ عَوضینی آلار، فرق قؤیماک یوخ دور.
Currently Selected:
کولُسیلیلَر 3: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
