کولُسیلیلَر 2
2
1بو خاطره کی سئیرَم بیلَینز سیزینگ ایچی و اوللار ایچی کی لائودیکیه شَهرینده دیرلَر و واری او آداملار ایچی کی منی ایز ایزه گؤرمهمیشلَر، نهیین سخت تَقلّی ائدیرَم، 2تا دِلگرم اولالّار و مُحبّتده بیر بیره قوشولماک اینان او کامل اطمینانینگ واری فروانلیگیندان بَهره آپارالّار، ائله او اطمینان کی فَهمدَن سَرچشمه توتیر و بو یولدان تارئ سِرّینه یعنی مَسیحه ائتیشلَّر، 3ائله او مَسیح کی حِکمت و مَعرفتینگ واری خَزینهلَری اؤندا پنهان دیر. 4بونو دئییرم تا بئله هئچ کَس سیزی قانع ائدن بَحثلَر اینن آلداتمایا. 5چون هر چند جِسمده اؤردا دهییلم، آما روحدا سیزینگ ایننَم و سیزینگ نَظمینزی و مَسیحده اولان ایمانینزینگ اُستوارلیگینی گؤروَمکدَن، شادلیگ ائدیرَم.
مَسیحده زندلیگ ائدمَک
6پس ائله اولهیین کی رَب مَسیح عیسایی قبول ائدینز، ائله اولهیین ده مَسیح عیسادا رووآل ائدینز، 7اؤندا ریشه ائدینز و بَنا اولینز و ائله اولهیین کی تعلیم توتدونز، ایماندا اُستوار اولینز و شُکر ائدمکدَن داشینز.
8هوشکار اولینز کی هئچکَس سیزی فَلسفه اینن و پؤک حُقّه اینن اَسیر ائدمئیه کی انسان رَسمینه گؤره و بو دنیانینگ اِبتدایی اُصولونا گؤره دیر، نه مَسیحه گؤره. 9چونکی تارئلیگینگ بوتون دؤلولوگو، جِسمانی لحاظدان، مَسیحده مَنزل واری، 10و سیز مَسیحده، کی بوتون رَئیسلیگینگ و اِقتدارینگ باشی دیر، دؤلموشانز. 11مَسیحده سُنّت ده اولدونز، بیر رَقم سُنّت اولماک کی بشر اَلی اینن دهییل. بو سُنّت اولماک، جسمدهکی کیم اولدوگوموزو دالدان چیخارتماک اینان دیر، مَسیح ائدَن سُنّت اینن دیر، 12و تَعمید غُسلیندا مَسیح اینان تاپشیریلدینز و مَسیح اینان ده دئرّیلدینز، تارئنینگ قُوّتلی عَملینده اولان ایمان طریقیندَن، ائله او تارئ کی مَسیحی اؤلومدَن دئرّیتدی.
13و سیزلَر کی خطالارینزدا و جسمینزینگ سُنّت اولمادیگیندا اؤلموشدونز تارئ سیزی مَسیح اینن بئلینه دئرّیتدی و بیزیم واری خطالاریمیزی باغیشلادی، 14و قَرضینگ سَندینی کی قانونلاری اینان بیزیم ضدّیمیزه یازیلمیشدی و بیزیم ضدّیمیزه تورموشدو آیاقی، باطل ائدی. او بونو صَلیبه میخلهمَک اینان، آرادان گؤتوردو. 15مَسیح صلیب اوستونده، رَئیسلَرینگ و اِقتدارلیلَرینگ اَلیندهکی اَسلحهلری آلدی و اوللارا پیروز اولدو و بئللَرینی واری کَس یانیندا رُسوا ائدی.
16پس قؤیمانز هئچ کَس یئمگ و ایچمهگینز سبرسینه، یا دا عیدلری و تازّا آییی و مُقدّس شنبه گؤنونو ساخلاماک سبرسینه، سیزه حکم ائده. 17بوللار ایندیدَن بئله گلن زادلارینگ بیر کؤلگهسی دیر، آما اوللارینگ اَصلی مَسیحکی دیر. 18قؤیمانز بیری کی ریاضَت چکمکه و فرشتهلَری پَرست ائدمَکه اِصرار واری، سیزی قابلیتینزدَن آتا. بیر بئلهیین آدام اؤزونو، رؤیادا گؤردوگو زادلار اینان مَشغول ائدیر و او آدامینگ نَفْسانی فکری اؤنو سَببسیز غَرّه ائدمیش. 19بیر بئلهیین آدام سِفت یاپیشمامیش باشا، او باشا کی بوتون بدن اؤندان تَغذیه اولیر و بیر بیره وَصل اولیر، مَفصللَری و بندلَری طریقیندَن، و بئله بدن، تارئدان سَرچشمه توتان رُشد اینان، رُشد ائدیر.
20اگر مَسیح اینن بو دنیانینگ اِبتدایی اُصوللارینا اؤلدونز، نه ایچی او آداملار لهیین کی اینگار حلی بو دنیاکی دیرلار، اؤنونگ اَمرلَریندَن اطاعت ائدیرَینز، او اَمرلَر کی دئییرلَر، 21«لَمس ائدمه! دادما! اَل وورما!» 22بوللارینگ واریسی او زادلار بارهسینده دیرلَر کی ایشلهنمک اینن آرادان گئدیرلَر و انسان حکملاری و تَعلیملَری اوستوندَن دیرلَر. 23گرچکدَن ده اوندا کی بو انسان دؤزهتَن مَذهبدَن و ریاضَت چکمَکدَن و بدنه سخت توتماکدان دانیشیلیر، بو گپ حِکمتلی ظاهر اؤزونه توتیر، آما بو دستورلار بوندا کی جِسمینگ هَوی و هَوسی جلوسینی توتالّار، هئچ ایش اَللَریندَن گلمئیر.
Currently Selected:
کولُسیلیلَر 2: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
