کولُسیلیلَر 4
4
1اَربابلار، غُلاملارینز اینن عدالت و انصاف اینن رووآل ائدینز، چونکی بیلیرَینز کی سیز ده گؤیده بیر اَرباب وارینز.
2دُعادا استقامت اینن ایلَری گئدینز و دُعادا شُکر ائدمک اینن، هوشکار اولینز. 3بیزیم ایچی ده دعا ائدینز کی تارئ، کلام ایچی بیر در بیزیم اوستومیزه آچا تا مَسیح سِرّینی اعلام ائدَک، ائله او سِرّ کی اؤنونگ سَبرسینه زنداندایام، 4دعا ائدینز تا ائله اولهیین کی لازیم دیر، اونو آچیق دئیَم. 5او آداملار اینن کی کلیسادان یازّیا دیرلار، حِکمتلی رووآل ائدینز و وَختی خوب ایشلهدینز. 6قؤینز تا سؤزونز همیشه فِیضلی اولا و دوز اینن آرّی اولموش اولا، تا بئله بیلَینز کی هر آدامینگ جوابینی نهیین وئرهسینز.
آخیری سلاملار
7تیخیکوس منیم احوالیمدان کامل سیزه دئیَر. او بیر عَزیز کاکا و وفالی خادم دیر و رَبده منیم یانیم سورا خدمت ائدیر. 8من اؤنو ائله بو مَقصودا سیزینگ یانینزا یوللامیشام تا بیلَینز کی بیز نهیینَک و تا او، سیزینگ اؤرهکلَرینزه قُوّت وئره. 9اونِسیموس، وافالی و عزیز کاکامیز کی سیزینگ بیرینزدن دیر، اؤنونگ اینان گلیر یانینزا. اوللار هرنهیی کی بوردا اولونموش سیزه دئیهرلَر.
10آریستارخوس کی منیم اینن زنداندا دیر، بئلینزه سالام ائتیردیر؛ برنابانینگ عموسی اوغلو، مَرقُس، بئلینزه سالام ائتیردیر. ایلرتر مَرقُس بارهسینده سیزه قدغن ائدمیشم کی اگر گلدی یانینزا، اؤنو خوش ایز اینن قبول ائدینز. 11عیسا کی یوستوس چاغیریلیر، سیزه سالام ائتیردیر. تارئ پادشاهلیگی ایشینده اولان همکارلاریم آراسیندا فقط بو نئچه آدام، سُنّت اولونموش یعنی یهودی دیرلار و بوللار اولموشلار منیم تَسلّیم. 12اِپافراس کی سیزینگ بیرینزدَن دیر و مَسیح عیسانینگ بیر نوکری دیر، سیزه سالام ائتیردیر. او همیشه دُعالاریندا سیزینگ ایچی تَقلّی ائدیر، تا سیز بالغ و خاطر جمع آداملار لهیین اُستوار قالانز و تارئ سئدیگینی کامل یئرینه ائتیردَینز. 13چون من شاهدم کی او سیزینگ ایچی و اوللار ایچی کی لائودیکیه و هیراپولیس شَهرلَرینده دیرلر، ناغاد چوخ زحمت چکمیش. 14عزیز طبیب لوقا و ائله بئله ده دیماس بئلینزه سالام ائتیردیرلَر. 15لائودیکیهدهکی کاکالارا و نیمفایا و اؤنونگ ائویندهکی کلیسانینگ آداملارینا منیم سلامیمی ائتیردینز.
16بو نامه سیزینگ آراینزدا اوخولاندان سورا، بیر طرح ائدینز کی لائودیکیه کلیساسیندا دا اوخولا؛ سیز ده لائودیکیهیه یازدیگیم نامهیی اوخوینز.
17آرخیپوسا دئیینز: «هوشکار اول تا او خدمتی کی رَبده بئلینگه وئریلمیش تمام و کمال یئرینه ائتیردَینگ.»
18من، پولُس، بو سلامی اؤز اَلیم اینن یازیرام. منیم زنجیرلریمی بو زنداندا یادا گتیرینز. تارئنینگ فِیضی سیزینگ اینن اولسون.
Currently Selected:
کولُسیلیلَر 4: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
