اعمال 22
22
1«کاکالار، بووآلار، بو گپلَری کی ایندی اؤزومدَن دفاع ائدمَک ایچی سیزه دئییرَم، ائشیتینز.»
2اوندا کی اوللار ائشیتدیلَر کی پولُس عِبرانی دیلده اوللار اینان دانیشیر، آرتیق بیسَس اولدولار. پولُس دئدی:
3«من بیر یهودییام، کیلیکیه ولایتینینگ تارسوس شَهرینده آنادان اولموشام آما بو شَهرده اورشلیمده بویوک اولموشام. جَدلَریمیزه وئریلَن شَریعتی تمام و کمال گامالائیلدان اؤرگنمیشَم و تارئ ایچی غیرتلییام، ائله اولهیین کی بوگؤنکی گؤن سیز دا ائله بئلهیینَینز. 4من، بو طَریقت اَهلینه، اؤلوم حَدّینَنچاز جور و جَفا ائدیم. من اوللاری توتیردیم و آتیردیم زندانا. هم کیشیلَری، هم ده آروادلاری. 5ائله اولهیین کی ائنگ بویوک کاهِن و شیخلَر شوراسینینگ واریسی منیم بو گپیمه گواهلیگ وئره بیلیرلَر. من بو آداملاردان یهودی کاکالار ایچی نامهلَر آلدیم و گئتدیم دَمِشق شَهرینه تا اؤرداکی طَریقت اَهلینی باغلایام و گتیرَم بورا اورشلیمه تا جَزالارینی چَکلَّر.
6«ائله بئله کی یولدا گئدیردیم و دَمِشقه یاخین ایدیم، تقریبا ظُهر چاغی ایدی کی بیردَن بیر بویوک ایشّیق گؤیدَن دئییریمه ایشّیلادی. 7من دؤشدوم یئره و بیر سَس ائشیتدیم کی منه دئییردی: ”شائول، شائول، نه ایچی منی زَجر وئریرَینگ؟“ 8خبر آلدیم: ”یا رَب، سن کیمَینگ؟“ جواب گلدی: ”من ناصِرهلی عیسایام، ائله او کی بئلَسینه زَجر وئریرَینگ.“ 9او آداملار کی منیم اینن ایدیلار، ایشّیقی گؤردولَر آما اؤنونگ سَسینی کی منیم اینن دانیشیردی آنگلامادیلار. 10دئدیم: ”یا رَبّ، من نه ایش گؤرهسیم؟“ رَب منه دئدی: ”تور آیاقی و گئد دَمِشق ایچینه و اؤردا، واری او ایشلَر کی سَنینگ ایچی مَعین اولموش تا گؤرَینگ، سَنه دئییلَر.“ 11و بو خاطره کی او ایشّیقینگ ایشّیلهمکی سَبرسینه گؤزلَریم گؤره بیلمئیردی، یانیمداکیلار اَلیمدَن توتدولار و گلدیک دَمِشق ایچینه.
12«دَمِشقده، بیر حَنانیا آدلی کیشی کی شَریعته گؤره رووآل ائدمکده چوخ غیرتلی ایدی و واری اؤردا زندلیگ ائدَن یهودیلار اؤندان خوب دئییرلَردی، 13گلدی منیم یانیما، توردو پهلیمه و بئلمه دئدی: ”شائول کاکا، گؤزلَرینگ گؤرسون!“ ائله او آن گؤزلَریم آچیلدی و اؤنو گؤردوم. 14او دئدی: ”جَدلَریمیز تارئسی سَنی مَعین ائدمیش تا اؤنونگ سئدیگینی بیلَینگ و او صالح خادمی گؤرَینگ و آغیزیندان سؤزلَر ائشیدَینگ. 15چونکی واری کَس یانیندا سن اؤنونگ ایچی بیر شاهد اولارانگ و هَرنهیه کی گؤرموشَینگ و ائشیتمیشَینگ گواهلیگ وئرهرَینگ. 16ایندی نه ایچی معطل ائدیرَینگ؟ تور آیاقی اؤنونگ آدینی چاغیر، تَعمید غُسلی توت و گُناهلارینگدان آرّین!“
17«اوندا کی بؤکولموشدوم اورشلیمه و مَعبدده دُعا ائدیردیم، حالدان گئتدیم 18و رَبّی گؤردوم کی منه دئییر: ”تئز اول و فوری اورشلیمدَن چیخ یازّیا. بو سَبریه کی اوللار او گواهلیگی کی سن منیم بارهمده وئریرَینگ قبول ائدمزلَر. 19من دئدیم: ”یا رَبّ، اوللارینگ اؤزلَری بیلیرلَر کی من بو عبادتگاهدان او عبادتگاها گئدیردیم و اوللاری کی سنه ایمان وارلاری ایدی زندانا آتیردیم و ووروردوم 20و اوندا کی سنینگ شاهدینگ، اِستیفان قانینی تؤکورلَردی منیم اؤزوم اؤردا تورموشدوم و بونو تصدیق ائدیردیم و اؤنو اؤلدورَنلَرینگ قابالارینی ساخلاییردیم.“ 21رَب منه دئدی: ”گئد، بو سَبریه کی من سَنی ایراق یئرلَره غیرییهودیلار یانینا یوللایارام.“
22بو سؤزنچاز خلخ پولُسا قولاق آسیرلاردی. اوندان سورا سَسلَرینی اوجالتدیلار و دئدیلَر: «بیر بئلهیین آدامی یئر اوستوندَن نابود ائدینز چونکی دئرّی قالماگی روآ دهییل.» 23ائله بئله کی اوللار داد چَکیرلَردی و عابالارینی باشلاری ایجینده تکان وئریرلَردی و گؤیه تورپاق سوریرلاردی، 24فرمانده دستور وئردی کی پولُسی گتیرَلَّر قَلعه ایچینه و دئدی کی اؤنا شلّاق وورالّار و بئلَسیندَن بازجولیگ ائدلَّر تا معلوم اولا کی نه ایچی خلخ بئلهیین اؤنونگ ضدّینه داد چَکیرلَر. 25آما اوندا کی پولُسی باغلاییرلاردی تا بئلَسینی شلّاق وورالّار، پولُس بیر اَفسره کی اؤردا تورموشدو دئدی: «آیا قانون بو اجازهیی سیزه وئریر کی بیر آدامی کی روم تَبعهسی دیر، بوندان ایلَری کی محاکمه اولا شلّاق ووراینز؟» 26او اَفسر بونو ائشیدَنده، او فرمانده یانینا گئتدی و بئلَسینه دئدی: «هئچ بیلیرَینگ کی نه ایش گؤرورَینگ؟ بو سَبریه کی بو کیشی روم تَبعهسی دیر.» 27اوندا او فرمانده گلدی پولُس یانینا و بئلَسینه دئدی: «منه دئ گؤرَم، سن روم تَبعهسییانگ؟» پولُس جواب وئردی: «بَله.» 28او فرمانده دئدی: «من روم تَبعهسی اولماک ایچی چوخ پیل خَرج ائدمیشَم.» پولُس دئدی: «آما من آنادان اولاندان روم تَبعهسییام.»
29بئله، اوللار کی قرار ایدی پولُسی بازجولیگ ائدلَّر فوری اؤزلَرینی چَکدیلَر قیراقا و او فرمانده دا قورخدو. بو سَبریه کی بیلدی پولُس روم تَبعهسی دیر و او بیر روملییی باغلامیش.
پولُس یهود شوراسینینگ حُضوروندا
30آما او گؤنونگ صاباسی، فرمانده کی چوخ گؤینو سئیردی بیله کی یهودیلار گرچَکدَن نه ایچی پولُسی مُتَّهم ائدمیشلَر، پولُسی آچدی و باش کاهِنلَره و بوتون شورا آداملارینا فرمان وئردی تا ییغیلَلَّر. اوندا او دا پولُسی گتیردی آشاغی اوللار حُضورونا.
Currently Selected:
اعمال 22: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
