اعمال 23
23
1پولُس شورا آداملارینا گؤز تؤکدو و دئدی: «کاکالار، من بوگؤنانچاز راحت وجدان اینان تارئ حُضوروندا زندلیگ ائدمیشَم.» 2پولُس بونو دئیَنده، ائنگ بویوک کاهِن، حَنانیا، پولُس یانیندا توران آداملارا، فرمان وئردی کی یوموروق اینان وورالّار پولُس آغیزی ایچینه. 3اوندا پولُس حَنانیایا دئدی: «تارئ سنی وورار. ای آغارمیش دیوار! سن اوتورموشانگ اؤرا تا شَریعته گؤره منه حکم ائدَینگ، آما شَریعتینگ برعکسینه فرمان وئریرَینگ تا منی وورالّار؟ 4او آداملار کی پولُس یانینا تورموشلاردی، دئدیلر: «سن تارئنینگ ائنگ بویوک کاهِنینا اِهانَت ائدیرَینگ؟»
5پولُس دئدی: «کاکالار، من بیلمئیردیم کی او، ائنگ بویوک کاهِن دیر؛ بو سَبریه کی توراتدا یازیلمیش کی: ”اؤز خَلخینگ رئیسینه پیس دئمه.“»
6اونداکی پولُس بیلدی کی اوللارینگ بیر پاراسی صَدوقی فِرقهسیندن و بیر پاراسی ده فَریسی فِرقهسیندن دیرلَر، شورا دا اوجا سَس اینن دئدی: «کاکالار، من بیر فَریسییم بیر فَریسی آدامینگ دا اوغلویام. اؤلولَردَن دئرّیلمک امیدی سَبرسینه دیر کی مُحاکمه اولیرام.» 7پولُس بونو دئیَنده، فَریسیلَر و صَدوقیلَر آراسیندا جَر و بَحث دؤشدو و جمعیت ایکّی بئیله اولدو. 8بو سَبریه کی صَدوقیلر دئییرلَر کی نه اؤلولَردَن دئرّیلمَک وار، نه فرشته وار، نه ده روح وار، آما فَریسیلَر بوللارینگ واریسینا اعتقاد وارلاری.
9اوندا چوخ سَر و صدا یولا دؤشدو! بیر پارا تورات معلّملَری کی فَریسی فِرقهسیندن ایدیلَر، توردولار آیاقی و سَخت ضدّ ائدیلَر و دئدیلر: «بیز بو آدامدا هئچ خطا گؤرمئیرَک. هاردان معلوم کی بیر روح یا دا بیر فرشته اؤنونگ اینان دانیشمامیش اولا.» 10جَر و بَحث ائله اوخاری توتدو کی فرمانده قورخدو کی اوللار پولُسی تیکهلهیَلَّر. پس سربازلارا فرمان وئردی کی گئدَلَّر آشاغی و پولُسی اوللار آراسیندان گؤتورَلَّر و آپارالّار قَلعه ایچینه.
11ائله او گئجه، رَب توردو پولُس یانینا و دئدی: «اؤرهکینگ قایم اولسون! چونکی ائله اولهیین کی اورشلیمده منیم بارهمده گواهلیگ وئرمیشَینگ، رومدا ده گواهلیگ وئرهسینگ.»
پولُس اؤلدورمَکینینگ نقشهسی
12صابا سَحری، یهودیلار بیر نقشه چَکدیلر و بئلینه آند ایچدیلَر کی تا پولُسی اؤلدورمهیَلَّر، نه بیر زاد یئیهرلَر، نه ده بیر زاد ایچرلَر. 13قیرخ نفردن آرتیق آدام، بو نقشهده اَل وارلاری ایدی. 14اوللار گئدیلَر باش کاهِنلَر و شیخلَر یانینا و دئدیلر: «بیز سَخت آند ایچمیشَک کی تا پولُسی اؤلدورمَهیَک، چؤرهک قؤیماک آغیزیمیزا. 15پس ایندی سیز و شورا آداملاری، روم فرماندهسیندَن سئیینز کی پولُسی گتیره سیزینگ یانینزا، بو ماهانا کی سئیرَینز قَضیهسینی دقیقتَر بیلَینز. بیز ده آمادهیاک کی بوندان ایلَری کی بورا ائتیشه بئلَسینی اؤلدورَک.»
16پولُسینگ باجیسی اوغلو اوللارینگ نقشهسیندن خبر اولدو، پس گئتدی قَلعهیه و پولُسی خبر ائدی.
17پولُس ده اَفسرلرینگ بیرسینی چاغیردی و دئدی: «بو جاهالی آپار فرمانده یانینا، بو سَبریه کی بیر گپ واری کی اؤنا دئیه.» 18اَفسر ده اؤنو گؤتوردو آپاردی فرمانده یانینا و دئدی: «زندانی پولُس منی چاغیردی و مندن سئدی کی بو جاهالی گتیرَم سنینگ یانینگا؛ بیر گپ واری کی سنه دئیه.»
19فرمانده ده او جاهالینگ اَلیندن توتدو، اؤنو چَکدی بیر قیراقا و خلوتده بئلَسیندَن خبر آلدی: «سئیرَینگ منه نه دئیَنگ؟»
20پولُسینگ باجیسی اوغلو دئدی: «یهودیلار بیر بیر اینن قرار کَسمیشلَر تا سَندن سئیلَّر کی صابا پولُسی آپارانگ شورایا، بو ماهانا کی سئیرلَر اؤنونگ قَضیهسینی دقیقتَر بیللَّر. 21آما سن مُجاب اولما کی بو ایشی گؤرَینگ، بو سَبریه کی اوللار آداملارینینگ قیرخ نفریندن آرتیقی، پولُس ایچی کمین ائدمیشلَر. اوللار آند ایچمیشلر کی تا پولُسی اؤلدورمهیَلَّر، نه بیر زاد یئیَلَّر نه ده بیر زاد ایچَلَّر. ایندی ده آماده دیرلار و فقط معطل دیرلَر کی سن اوللار سئدیگینی قبول ائدینگ.»
22فرمانده، او جاهالی مُرخص ائدی و اؤنا قَدغَن ائدی کی: «هئچکَسه دئمه کی بو زادلاری منه خبر وئرمیشَینگ.»
پولُسی قیصریهیه آپاریرلار
23اوندا فرمانده، ایکّی نفر اَفسرلردن چاغیردی و بئللرینه دئدی: «ایکّی ایز پیادا سرباز، یئدمیش آتلی سرباز و ایکّی یوز نیزهلی سرباز آماده ائدینز تا گئجه ساعت دوقوز دا قیصریه شَهرینه گئدَلَّر. 24پولُس ایچی ده آت آماده ائدینز و اؤنو ساغ و سالامت آپارینز والی فِلیکْس یانینا.»
25بیر نامه ده یازدی کی بئله یازیلمیشدی:
26«کْلودیوس لیسیاسدان
عالیجناب والی فِلیکْسه:
سالاملار،
27یهودیلار بو آدامی توتدولار و سئیرلَردی بئلَسینی اؤلدورَلَّر، آما من سربازلاریم اینان گئدیم و اؤنو قورتاردیم، بو سَبریه کی ائشیدمیشدیم کی روم تَبعهسی دیر. 28من سئیردیم بیلَم کی اؤنو نه جُرما مُتَّهم ائدمیشلَر، پس بو آدامی آپاردیم اوللارینگ شوراسینا 29و بیلدیم کی اؤز شَریعتلری بارهسینده مُتَّهم اولموش و بئله بیر جُرم ائدمَمیش کی اؤلومه یا دا زندانا لایق اولا. 30اوندا کی بیلدیم اؤنونگ ضدّینه نقشه چَکمیشلر، اؤنو فوری یوللادیم سیزینگ یانینزا و اؤنو مُتَّهم ائدنلَره دا فرمان وئردیم تا او شکایتی کی بو آدامدان وارلاری گتیرَلَّر سیزینگ حُضورونزا.»
31پس سربازلار، آلدیگیلاری فرمانا گؤره پولُسی گؤتوردولَر و ائله گئجه اؤنو آنتیپاتْریس شَهرینه آپاردیلار. 32او گؤنونگ صاباسی سربازلارینگ قالیقی قَلعهیه بؤکولدولَر و فقط آتلی سربازلار پولُس یانی سورا گئتدیلَر. 33اوللار قیصریه شَهرینه ائتیشنده، او نامهیی وئردیلر والییه و پولُسی دا گتیردیلَر اؤنونگ حُضورونا. 34والی ده نامهیی اوخودو و پولُسدان خبر آلدی کی هانی ولایتینگ آدامی دیر. اوندا کی بیلدی کی پولُس کیلیکیه ولایتینینگ دیر، 35دئدی: «سنی مُتَّهم ائدنلَر بورا ائتیشنده، سنینگ سؤزلَرینگه قولاق آسارام.» و فرمان وئردی کی پولُسی هیرودیس کاخیندا ساخلایالّار و بئلَسینی گؤزلهیلَّر.
Currently Selected:
اعمال 23: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
