اعمال 21
21
پولُس گئدیر اورشلیمه
1اوللاردان آیریلاندان سورا، دریا یولوندان یولا دؤشدوک و مستقیم کوس جَزیرهسینه گئتدیک. او گؤنونگ صاباسی، رودِس جَزیرهسینه و اؤردان دا پاتارا بندرینه ائتیشدیک. 2اؤردا بیر کشتی بولدیک کی فینیقیهیه گئدیردی. اؤنا میندیک و گئتدیک. 3قِپرسی چَپ طَرفیمیزده گؤرَنده، اوندان گچدیک و سوریهیه ساری گئتدیک. صور بندرینده کشتیدَن ائندیک، بو سَبریه کی اؤردا کشتینینگ اوکونو خالی ائدهسیلر ایدی. 4شاگردلَری بولدوک و یئتدی گؤن اؤردا اوللار یانیندا قالدیک. بو شاگردلَر تارئ روحونونگ هدایتی اینن، پولُسا دئییرلَردی کی گئدمهیه اورشلیمه. 5اؤردا قالماگیمیز گؤنلَری باش اولاندان سورا، یولا دؤشدوک و سَفریمیزینگ یولونو ایلَری توتدوک. شاگردلرینگ واریسی آروادلاری و اوشاقلاری اینان بیزی شَهرینگ یازّیسینَنچاز بدرقه ائدیلَر. اؤردا دریا قیراقیندا دیز ووردوک، دُعا ائدیک و 6بیر بیر اینن خدافظلیگ ائدیک. اوندان سورا بیز کشتییه میندیک و اوللار دا دؤندولَر اؤز ائولرینه.
7بیز صور بندریندَن سَفریمیزینگ قالیقینی کی دریا یولوندان ایدی گئتدیک و ائتیشدیک پْتولامائیس شَهرینه. اؤردا کاکالاری گؤردوک و بیر گؤن دا یانلاریندا قالدیک. 8او گؤنونگ صاباسی، اؤردان چیخدیک و قیصریه شَهرینه گلدیک. گئتدیک مُبشّر فیلیپُس ائوینه، کی او یئتدی نفرینگ بیری ایدی کی اورشلیمده خدمت ائدمک ایچی سَچیلمیشلَردی، و اؤنونگ یانیندا قالدیک. 9فیلیپُس دؤرد قیز واریدی کی نَبوّت ائدیرلَردی. اوللار اَره گئدمهمیشلَردی.
10نئچه گؤن ایدی اؤردا ایدیک کی بیر آگابوس آدلی نَبی، یهودیهدَن گلدی. 11او گلدی بیزیم یانیمیزا، پولُس بئلیباغیسینی گؤتوردو و اؤز اَلرینی و قیچلَرینی اؤنونگ اینان باغلادی و دئدی: «تارئنینگ قُدّوس روحو دئییر: ”اورشلیمدهکی یهودیلار بو بئلیباغی اَیهسینی ائله بئلهیین باغلایارلار و غیرییهودیلار اَلینه وئرهرلَر.“»
12بونو ائشیدَنده، بیز و اؤرداکی آداملار پولُسا یالواردیک کی گئدمهیه اورشلیمه. 13آما پولُس جواب وئردی: «بو نه ایش دیر کی گؤرورَینز؟ آغلاییراینز و منیم اؤرهکیمی قیریرَینز. چونکی من حاضرم رَب عیسا آدی سَبرسینه نه فقط دؤشَم زندانا، بلکی اورشلیمده اؤلَم.» 14اوندا کی گؤردوک مُجاب اولمئیر، اَل گؤتوردوک و دئدیک: «قؤی تا رَبّینگ سئدیگی اولونا.»
15او گؤنلَردَن سورا، اَلیاقیمیزی ییغدیک و اورشلیمه ساری یولا دؤشدوک. 16قیصریهده زندلیگ ائدَن شاگردلرینگ بیر پاراسی بیزیماینن گلدیلر و بئلَمیزی آپاردیلار بیر مِناسون آدلی آدام ائوینه تا اؤردا قالاک. مِناسون، قِپرسلی ایدی و قَدیمکی شاگردلرینگ بیری ایدی.
پولُس، یَعقوب گؤرمَکینه گئدیر
17اوندا کی ائتیشدیک اورشلیمه، کاکالار خوشحاللیگ اینن بیزیم پیشوازیمیزا گلدیلَر. 18او گؤنونگ صاباسی پولُس بیزیم اینن، یَعقوب گؤرمَکینه گئتدی. واری شیخلَر دا اؤردا ایدیلر. 19پولُس اوللارا سالام وئردی و اوندا، واری او ایشلَری کی تارئ اؤنونگ خدمتی طَریقیندن غیرییهودیلار آراسیندا گؤرموش ایدی، تَک تَک اوللارا تعریف ائدی. 20اوللار بونو ائشیدَنده، تارئیا عزّت ائدیلَر و پولُسا دئدیلر: «کاکا، گؤرورَینگ کی یهودیلار آراسیندا نئچه مینگ نفر ایمان گتیرمیشلَر و واریسی ده شَریعت ایچی غیرت وارلاری. 21اوللار آراسیندا، سنینگ بارهینگده بئله دئییلیر کی سن واری او یهودیلارا کی غیرییهودیلار آراسیندا زندلیگ ائدیرلَر، اؤرگدیرَینگ کی موسای پیغمبر شَریعتیندَن ایز بؤکلّر و بئللرینه دئییرینگ کی اوشاقلارینی سُنّت ائدمئیلَّر و رَسملریمیزه گؤره رووآل ائدمئیلَّر. 22پس ایندی نهیین اولاسی؟ اوللار حتما ائشیدهرلر کی سن گلمیشَینگ. 23پس بو ایشی کی بئلینگه دئییرک، گؤر. بیزیم یانیمیزدا دؤرد کیشی وار کی بیر نَذر وارلاری. 24بو کیشیلَری آپار و اوللار اینان بئلینه طاهر اولماگ رَسمینی یئرینه ائتیردینز. اوللارینگ خَرجینی ده وئر تا باشلارینی قیرخَلَّر. بئله واری کَس بیلر کی سنینگ بارهینگده دئییلن گپ گرچَک دهییل، بلکی سنینگ اؤزونگ ده موسا شَریعتینه گؤره زندلیگ ائدیرَینگ. 25آما او غیرییهودیلار بارهسینده کی ایمان گتیرمیشلر، بیز اؤز حکمیمیزی بیر نامه ایچینه یازمیشاک و بئللرینه یوللامیشاک کی، بُتلارا تقدیم اولان خورَکیدَن، قاندان، بوغولموش حیوانلارینگ اَتیندَن و عِفّتسیزلیگدن اؤزلَرینی ایراق ساخلایاسیلار.»
26پس، او گؤنونگ صاباسی، پولُس او آداملاری گؤتوردو و اوللار اینان طاهر اولماگ رَسمینی یئرینه ائتیشتیردی و گئتدی مَعبده تا اعلام ائده کی هاچان اوللارینگ طاهر اولماگی گؤنلَری باش اولیر و اوللارینگ هر بیرسی ایچی قُربانلوق تقدیم اولیر.
پولُسی مَعبدده توتیرلار
27بیر زاد قالمامیشدی او یئتدی گؤن کی طاهر اولماگ گؤنلَری ایدی تؤکنه کی نئچه یهودی آسیا منطقهسیندَن، پولُسی مَعبدده گؤردولَر. اوللار بوتون جمعیتی جوشاردیلار و پولُسی توتدولار، 28اوللار لیکهلهییرلردی کی: «یهود کیشیلَری، کؤمَک ائدینز؛ بو کیشی ائله او آدام دیر کی واری یئرده واری کَسه بیزیم خلخیمیز ضدّینه، شَریعت ضدّینه و بو یئر ضدّینه تَعلیم وئریر. بوندان برگذر، او حتّی یونانلیلاری دا گتیرمیش مَعبد ایچینه و بو مُقدّس یئری نَجس ائدمیش.» 29بو سَبریه کی اوللار بوندان ایلَری اَفِسُسلی تْروفیموسو شَهر ایچینده پولُس اینان گؤرموشلَردی و گمان ائدیرلَردی کی پولُس اؤنو گتیرمیش مَعبد ایچینه.
30اوندا بوتون شَهر آدامی جوشدولار! خلخ هر یاندان هُجوم گتیردیلَر و پولُسی توتدولار و مَعبددَن یازّیا سئریدیلر و فوری پولُس دالی آردیندان مَعبد درلَرینی باغلادیلار. 31ائله اوندا کی سئیرلَردی پولُسی اؤلدورَلَّر، روملی گُردانینگ فرماندهسینه خبر گلدی کی اورشلیمینگ واری یئرینده شلوغ دؤشموش. 32او فرمانده فوری سربازلاری و اَفسرلَری گؤتوردو و هُجوم آپاردیلار جمعیته ساری. خَلخینگ گؤزو فرماندهیه و سربازلارا دؤشَنده، پولُسی وورماکدان اَل ساخلادیلار. 33اوندا او فرمانده گلدی ایلَری، پولُسی توتدو و فرمان وئردی کی اؤنو ایکّی زَنجیر اینن باغلایالّار. اوندا دا جمعیتدن خبر آلدی کی او کیم دیر و نه ایش گؤرموش. 34جمعیتینگ بیر پاراسی داد وورورلاردی و بیر زاد دئییرلردی، بیر پارا داهاسی دا بیر آیری زاد دئییرلردی. فرمانده کی شلوغ سَبرسینه حالیسی اولمادی کی گپینگ گرچَکی نه دیر، فرمان وئردی کی پولُسی آپارالّار قَلعه ایچینه. 35پولُس قَلعهنینگ پلّهلرینه ائتیشنده، جمعیتینگ خشمی سَبرسینه سربازلار مجبور اولدولار پولُسی اَللری اوستونده آپارالّار. 36اوللارینگ قولونجوندان گلَن جمعیت، لیکلهییرلردی کی: «اؤنو اؤلدورینز!»
پولُس خَلخاینن دانیشیر
37حلی پولُسی آپارمامیشلاردی قَلعه ایچینه کی پولُس فرماندهیه دئدی: «اولور سیزه بیر زاد دئیهم؟» فرمانده دئدی: «بئیه سن یونانلی دیل بیلیرَینگ؟ 38بئیه سن ائله او مِصرلی دهییلینگ کی بیر مُدّت بوندان ایلَری شورش یولا سالدی و دؤرد مینگ آدام اؤلدورَنی اؤزو اینن آپاردی بیابانا؟» 39پولُس جواب وئردی: «من یهودییام، کیلیکیه ولایتینینگ تارسوس شَهرینینگ خلخیندنم. من بیر بینام و نیشان شَهرینگ آدامی دهییلم. سیزه یالواریرام کی قؤیاینز تا بو خلخ اینن دانیشام.» 40فرمانده کی اجازه وئردی، پولُس توردو پلّهلَر اوستونه. اَلی اینن خلخه اشاره ائدی. اوندا کی واری کَس بیسَس اولدو، بئللری اینن عِبرانی دیلده دانیشدی و دئدی:
Currently Selected:
اعمال 21: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
