اعمال 20
20
پولُس مَقدونیهیه و یونانا گئدیر
1شلوغ یاتاندان سورا، پولُس یوللادی شاگردلر قولونجونا و بوندان سورا کی بئللَرینی تشویق ائدی، اوللار اینان خدافظلیگ ائدی و گئتدی مَقدونیه منطقهسینه. 2اوندا کی او منطقهلَردَن گچمیشدی و اؤرالارینگ ایماندارلارینی چوخ تشویق ائدمیشدی، گلدی یونانا. 3پولُس اؤچ آی اؤردا قالدی. اوندا کی پولُس سئیردی کشتی اینن گئده سوریهیه، یهودیلار اؤنونگ ضدّینه نقشه چَکدیلَر. پس تَصمیم توتدو کی مَقدونیه یولوندان دؤنه. 4اوللار کی پولُسا قوشولموشلاردی بوللار ایدیلار: بیریهلی سوپاتِروس کی پیرروس اوغلو ایدی، تَسالونیکلی آریستارخوس و سِکوندوس، دِربهلی گایوس، تیموتائوس و آسیالی تیخیکوس و تْروفیموس. 5بوللار بیزدن ایلَری گئدیلَر و تْروآس شَهرینده بیزه منتظر اولدولار. 6آما بیز خَمیر مایاسیز چؤرهک عیدی گؤنلَریندَن سورا، کشتی اینن فیلیپی شَهریندَن گئتدیک و بئش گؤندَن سورا ائتیشدیک تْروآسا اوللار یانینا. بیز یئتدی گؤن اؤردا قالدیک.
پولُس تْروآسدا
7هفتهنینگ اَوّلکی گؤنونده بیز چؤرهک تیکهلَمک ایچی بئلینه ییغیلدیک. پولُس خلخ ایچی دانیشیردی و بو سَبریه کی سئیردی او گؤنونگ صاباسی اؤردان گئده، گئجه یارییانچاز سؤزلَرینی اوزاتدی. 8ییغیلدیگیمیز بالاخانادا چوخ چیراغ وار ایدی. 9بیر اِفتیخوس آدلی جاهال پنجره قیراقیندا اوتورموشدو و ائله بئله کی پولُس حلی سؤزلَرینی اوزاتیردی، او جاهال یوآش یوآش بیر آغیر اوخویا گئتدی. بیردن اؤچونجو طبقهدن دؤشدو آشاغی و اؤنو گؤتورَنده گؤردولَر کی اؤلموش. 10آما پولُس گئتدی آشاغی، اؤزونو آتدی اؤنونگ اوستونه و بئلَسینی قوجاقلادی و دئدی: «تلواسهیه دؤشمَینز، جان واری!» 11اوندا کی پولُس گئتدی اوخاری و چؤرهکی تیکهلدی و یئدی، سَحرنچاز اوللار اینان دانیشدی، اوندان سورا دا اؤردان گئتدی. 12خلخ، او جاهالی کی دئرّیلمیشدی آپاردیلار و چوخ تَسلّی توتموشلاردی.
13بیزلَر دا ایلَرتر کشتییه ساری یولا دؤشدوک و کشتی اینن گئتدیک آسوس شَهرینه تا ائله اولهیین کی پولُس قرار قؤیموشدو اؤنو اؤردا میندیرَک کشتییه. بو سَبریه کی اؤزو سئمیشدی اؤرانچاز قورّولوق یولوندان گئده. 14پولُسی آسوسدا گؤرَنده، اؤنو کشتییه میندیردیک و میتیلینی شَهرینه گئتدیک. 15اؤردان کشتی اینن گئتدیک و صاباسینا گلدیک خیوس جَزیرهسینینگ قَرشیسینه. بیر گؤندَن سورا ده ائتیشدیک ساموس جَزیرهسینه و او گؤنونگ صاباسی ده میلیتوس شَهرینده ایدیک. 16بو سَبریه کی پولُس تَصمیم توتموشدو دریا یولوندان اَفِسُس یانیندان گچه تا مجبور اولمایا کی وختینی آسیادا تَلَف ائده. بو خاطره کی پولُس تَلَسیردی و سئیردی کی اگر اولسا پِنتیکاست گؤنونده اورشلیمده اولا.
پولُس اَفِسُس شیخلَری اینن دانیشیر
17پولُس میلیتوسدان پیغام یوللادی اَفِسُسا و کلیسانینگ شیخلَریندَن سئدی تا گلَلَّر یانینا. 18اوللار گلَنده بئللَرینه دئدی: «سیزینگ اؤزونز بیلیرَینز کی اَوّلکی گؤندَن کی قیچ قؤیدوم آسیا منطقهسینه، نهیین بوتون وخت سیزینگ آراینزدا زندلیگ ائدمیشَم 19و رَبّی بوتون گؤنگول آلچاقلیگ اینان، گؤز یاشی اینان و او سَختلیگلَر اینن کی یهودیلارینگ نقشهلَری طَریقیندَن باشیما گلدی، خدمت ائدمیشَم، 20و نهیین او زادلارینگ اعلام ائدمَکیندَن کی سیزینگ ایچی فایده واری ایمیش کوتاهلیگ ائدمهمیشم و چه جمع ایچینده، چهده ائودَن ائوه سیزه تَعلیم وئرمیشَم. 21هم یهودیلارا هم ده یونانلیلارا گواهلیگ وئرمیشَم کی توبه اینن تارئیا ساری دؤنلَّر و رَبّیمیز عیسا مَسیحه ایمان گتیرَلَّر. 22ایندی دا، باخینز، تارئ روحوندان اطاعت ائدمَک اینن گئدیرَم اورشلیمه و هئچ بیلمئیرَم دا کی اؤردا باشیما نه گلر؛ 23بهغیری بو کی تارئنینگ قُدّوس روحو منه گواهلیگ وئریر کی هر شَهرده زندان و مُصیبت منیم یولومو گؤزلهییر. 24آما من نه جانیمی حسابا گتیریرَم، نه ده جانیما اؤز یانیمدا اَرزش قؤییرام. فقط بو کی باشارام اؤز وظیفهمی و او خدمتی کی رَب عیسادان بئلمه وئریلمیش یئرینه ائتیشتیرَم و تارئ فِیضینینگ خوش خَبرینه گواهلیگ وئرَم. 25ایندی، باخینز، من بیلیرَم کی سیزینگ هئچ بیرینز داها منیم ایزیمی گؤرمَز. سیزلَر کی من آراینزدان گچمیشَم و تارئ پادشاهلیگینینگ خوش خَبرینی بئلَینزه اعلام ائدمیشَم. 26بو سَبریه ده بوگؤن گواهلیگ وئریرَم کی من واری کَسینگ قانیندان آرّییام، 27بو خاطره کی من تارئنینگ واری سئدیگینی بی کم و کسر بئلَینزه اعلام ائدیم. 28اؤزونزو و بوتون او سؤرویی گؤزلهینز. ائله او سؤرو کی تارئنینگ قُدّوس روحو سیزی قؤیموش تا اوللارا ناظرلیگ ائدَینز، تا تارئنینگ کلیساسینی کی اؤز قانی اینان اؤنو آلمیش چوبانلیگ ائدَینز. 29بیلیرَم کی منیم گئدمَکیمدَن سورا، درّنده قوردلار گلَرلَر سیزینگ آراینزا و سؤرویه رَحم ائدمَزلَر. 30سیزینگ اؤز آراینزدان بیر پارا آداملار کی اگری گپلَر چالیرلار، تورارلار آیاقی تا شاگردلَری یولدان چیخارتالّار و اؤزلَرینه قوشالّار. 31پس هوشکار اولینز، یادینزدا ساخلاتینز کی من اؤچ ایل، گئجه گؤندوز گؤز یاشی اینان واریکَسه یول گؤرسَدمکدن، اَل چَکمهدیم. 32ایندی دا سیزی تارئیا و اؤنونگ فِیضینینگ کلامینا تاپشیریرام کی قادر دیر سیزی بَنا ائده و واری سَچیلیلَر آراسیندا سیزه میراث وئره. 33منیم گؤزوم هئچکَسینگ نُقرهسی، طلاسی یا دا رَختی قولونجوندا دهییلمیش. 34اؤزونز بیلیرَینز کی ائله بو اؤز اَللَریم، اؤز احتیاجلاریمی و یانیمداکیلارینگ احتیاجینی برطَرف ائدمیش. 35واری زاددا بئلَینزه گؤرسَدمیشَم کی، چوخ ایش گؤرمَک اینن بیز ضعیف آداملارا کؤمَک ائدهسیک و رَب عیسانینگ سؤزلَرینی یادیمیزدا ساخلاتاسیک کی نهیین اؤزو دئدی: ”وئرمَک، آلماکدان یئ دیر.“»
36پولُس بو سؤزلری تؤکَدندن سورا، دیز ووردو و اوللارینگ واریسی اینان دُعا ائدی. 37اوللارینگ واریسی آغلاشدیلار و پولُس بوینونا آسیلدیلار و اؤنو ماچ ائدیلَر. 38واری زاددان آرتیق، پولُسینگ بو سؤزو کی دئدی داها اؤنونگ ایزینی گؤرمَزلَر، اوللاری غَملی ائدی. اوندا دا کشتییانچاز اؤنونگ یانی سورا گئتدیلَر.
Currently Selected:
اعمال 20: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
