اعمال 19
19
پولُس اَفِسُسدا
1اوندا کی آپولُس قُرِنتُس شَهرینده ایدی، پولُس او ولایتینگ ایچیندهکی یئرلَردن گچندن سورا، اَفِسُس شَهرینه ائتیشدی. اؤردا نئچه شاگرد بولدو 2و اوللاردان خبر آلدی: «ایمان گتیرنده، تارئنینگ قُدّوس روحونو آلدینز؟» اوللار دئدیلر: «یو، بیز تارئنینگ قُدّوس روحونونگ وارلیگیندان هئچ خبر یوخوک.» 3پولُس بئللرینه دئدی: «پس نه بَنا بُنیادا تَعمید غُسلی توتدینز؟» اوللار دئدیلر: «یحیا تَعمیدی.» 4پولُس دئدی: «یحیا اوللاری کی توبه ائدیرلَردی تَعمید وئریردی و خلخه دئییردی اؤنا کی اؤزوندن سورا گلَسی ایدی ایمان گتیرَلَّر، یعنی عیسایا.» 5اوللار بونو ائشیدَنده، رَب عیسا آدیندا تَعمید توتدولار. 6پولُس اَلینی اوللار اوستونه قؤیاندا، تارئنینگ قُدّوس روحو اوللارا گلدی و اوللار آیری دیللره دانیشماکا و نَبوّت ائدمگه باشلادیلار. 7او کیشیلَر واری بئلینه، تقریبا اون ایکّی نفر ایدیلر.
8پولُس گئتدی یهودیلارینگ عبادتگاهینا. او اؤچ آی جرأت اینن اؤردا دانیشیردی و تارئ پادشاهلیگی بارهسینده بحث ائدیردی و اوللاری مُجاب ائدیردی. 9آما اوندا کی اوللارینگ بیر پاراسی سَرسَختلیگ ائدیرلَردی و ایمان گتیرمئیرلَردی و جماعت جلوسیندا بو طَریقت اَهلینه یعنی ایمان گتیرَنلَره پیس دئییرلردی، پولُس، اؤزونو اوللار آراسیندان چَکدی قیراقا، شاگردلَری گؤتوردو و هر گؤن تیرانوس تالاریندا بحث ائدیردی و دانیشیردی. 10ایکّی ایل بئلهیین گچدی، ائله کی آسیا منطقهسینده زندلیگ ائدنلرینگ واریسی، هم یهودی، هم ده یونانلی، رَبّینگ کلامینی ائشیتدیلر.
اِسکیوا اوغوللاری
11تارئ پولُس اَللریاینن عَجیب و غَریب مُعجزهلَر ائدیردی، 12ائله کی خلخ حتّی پولُس بَدنینه دهیَن یاغلوغلاری و پیشبندلری گؤتورورلَردی و آپاریرلاردی مَریضلَر ایچی. اوللارینگ مَریضلیگلَری خوب اولیردی و شیطانلی روحلار اوللاردان یازّیا چیخیرلَردی.
13پس بیر پارا دورهگرد جینگیر کی یهودی ایدیلار، تلاش ائدیلَر کی اوللار اوستونه کی شیطانلی روحلارا گرفتار ایدیلار رَب عیسا آدینی دئیَلَّر. اوللار دئییرلردی: «سیزی، پولُس اعلام ائدیگی عیسایا آند وئریرَک!» 14بو ایشی گؤرَنلَر، اِسکیوانینگ یئتدی اوغوللاری ایدیلار. اِسکیوا یهودیلارینگ بیر باش کاهِنلَریندَن ایدی. 15آما او شیطانلی روح اوللارا جواب وئردی کی: «عیسایی تانیییرام، پولُسی ده تانیییرام، آما سیز کیمَینز؟» 16او کیشی کی وجودی ایچینده شیطانلی روح وار ایدی، اوللارا حمله ائدی و اوللارینگ واریسینا گؤج اولدو و بئللرینی ائله ووردو کی لیت و یارالی او ائودن قاچدیلر.
17اَفِسُس شَهرینده زندلیگ ائدنلَرینگ واریسی، چه یهودی چه یونانلی، بو دؤشَن تَفاقدان خبر اولدولار. اوللارینگ واریسینینگ جانینا قورخو دؤشدو و رَب عیسانینگ آدینا حُرمَت ائدیرلَردی. 18ائله بئله ده، چوخ آدام اوللاردان کی ایندی ایمان گتیرمیشلردی گَلدیلَر و عالم آشکار اؤز ایشلَرینه اعتراف ائدیلَر. 19بوندان ایلَری جادوگرلیگ ائدَنلَرینگ چوخو ده، اؤز کتابلارینی گتیردیلر و واری کَسینگ گؤزو دَمینده یاندیردیلار. او کتابلارینگ قیمتینی کی حساب ائدیلَر، اَلّیمینگ نُقره سِکّهسی ایدی. 20پس رَبّینگ کلامی ائله بئله داغیلیردی و قوّت توتیردی.
21بو تَفاقلاردان سورا، پولُس تارئ روحونونگ هدایتی اینن، تَصمیم توتدو کی مَقدونیه منطقهسی و اَخائیه منطقهسینینگ یولوندان اورشلیمه گئده. پولُس دئییردی: «اؤرا گئدیگیمدن سورا، روم شَهرینی ده گؤرهسیم.» 22اوندا بئلَسینه کؤمَک ائدنلرینگ ایکّی نفرینی، یعنی تیموتائوسی و اِراستوسی مَقدونیهیه یوللادی و اؤزو بیر مُدّت آسیا منطقهسینده قالدی.
اَفِسُسداکی شلوغ
23او موقعده، طَریقت اَهلینینگ بارهسینده بیر بویوک شلوغ دؤشدو. 24بیر دیمیتریوس آدلی نُقره کار کی نُقره مُجسمهلَر آرتِمیسدَن دوزهتیردی و بو یولدان صَنعتکارلار ایچی چوخ ایش گتیریردی، 25صنعتکارلاری و بو حرفهده ایش گؤرَنلَری بیر یئره کُپ ائدی و دئدی: «کیشیلَر، بیلیرَینز کی بیزیم مال و منالیمیز بو حرفهدن دیر. 26ائله بئله کی گؤرورَینز و ائشیدیرَینز، نه فقط اَفِسُسدا، بلکی تقریبا آسیا منطقهسینینگ واری یئرینده بو پولُس چوخ آداملاری مُجاب ائدمیش و یولدان چاخارتمیش و دئییر کی آدامیزاد اَلی اینن دؤزلَن تارئلار، تارئ دهییللَر. 27و بو خطر وار کی نه فقط بیزیم کسب و کاریمیز رونقدن دؤشه، بلکی بویوک الههمیز آرتِمیسینگ مَعبدی ده هئچ ساییلا و حتّی آرتِمیس الههمیز کی واری آسیا منطقهسینده و دنیانینگ واری یئرینده پَرست اولونیر، اؤز عَظمتینی اَلدن وئره.»
28اوللار بونو ائشیدَنده، سَخت عصبانی اولدولار و داد چَکیرلَردی کی: «اَفِسُسلیلارینگ آرتِمیسی بویوک دیر!» 29پس بوتون شَهرده شلوغ دؤشدو. خلخ واری بئلینه تاماشا میدانینا ساری قاچدیلار. اوللار گایوس و آریستارخوسی کی مَقدونیهلی ایدیلر و پولُس هَمسفرلَریندَن ایدیلَر، سئریده سئریده اؤزلَری اینن آپاریرلاردی. 30پولُس سئیردی خلخ ایچینده آلهیینه چیخه آما شاگردلر قؤیمادیلار. 31حتّی آسیا منطقهسینینگ بیر پارا بویوک اَفسرلریندن کی پولُس یولداشلاریندان ایدیلَر، بئلَسینه پیغام یوللادیلار، یالواردیلار کی قیچ آتمایا تاماشا میدانینا.
32جمعیتینگ بیر پاراسی بیر زاد دئییرلردی، بیر پارا داهاسی، بیر آیری زاد. خلخ گیج و ویج اولموشلاردی و اوللارینگ چوخو هئچ بیلمئیرلَردی نه ایچی کُپ اولموشلار. 33جماعتینگ بیر پاراسی گمان ائدیرلَردی کی بو شلوغ اسکندر باشی آلتیندا دیر، ائله او اسکندر کی یهودیلار اؤنو آتمیشلاردی ایلَری. اسکندر اؤز اَلی اینن اشاره ائدیردی و سئیردی کی جماعت جلوسیندا اؤزوندَن دفاع ائده. 34آما اوندا کی اوللار بیلدیلر کی اسکندر یهودی دیر، واری کَس بئلینه، ایکّی ساعاته یاخین داد چَکیرلردی کی: «اَفِسُسلیلارینگ آرتِمیسی بویوک دیر!»
35شَهرینگ داروغهسی خلخی بیسَس ائدندن سورا، دئدی: «ای اَفِسُس کیشیلَری، کیم دیر کی بیلمئیه اَفِسُس شَهری بویوک آرتِمیس مَعبدینینگ ناتّوری دیر و اؤنونگ گؤیدَن نازل اولان مُقدّس داشینینگ محافظی دیر؟ 36پس ایندی کی هئچکَس بو حَقیقتی حاشا ائدهبیلمَز، سیز آرام اولاسینز و هئچ ایشی تَلَسیق گؤرمئیهسینز. 37بو سَبریه کی بو کیشیلَر کی گتیرمیشَینز بورا، نه بیزیم مَعبدیمیزی غارت ائدمیشلَر، نه ده الههمیزه کُفر دئمیشلر. 38پس اگر دیمیتریوس و یانینداکی صنعتکارلار بیر کَسدَن شکایت وارلاری، مَحکمه دری آچیق دیر و والیلار دا اؤردا دیرلَر. شکایتلرینی آپارسینلار اؤرا. 39آما اگر بوندان آرتیق بیر زاد قولونجوندایاینز، اونو شَهرینگ مَجلسینده حَل ائدهسینز. 40بو خاطره کی گرچَکدن بو خطر وار کی بوگؤنکی تَفاقلار سَبرسینه، شورش ائدمَکه مُتَّهم اولاک. اگر بئلهیین اولا، باشارماک بیر قانع ائدَن دلیل بو شورش ایچی گتیرَک.» 41داروغه بونو دئدی و جمعیتی داغیتدی.
Currently Selected:
اعمال 19: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
